কাৰবি আংলং (Karbi Anglong) জিলাৰ অসম-নাগালেণ্ড সীমাৰ বৰজানত স্হাপন কৰা হ’ব দেশৰ ভিতৰতে আটাইতকৈ বৃহৎ সৌৰশক্তি চালিত বিদ্যুত উৎপাদিত প্ৰকল্প (Solar power plant to be set up at Barjan)৷
ইতিমধ্যে কাৰবি আংলং স্বায়ত্ত্বশাসিত পৰিষদে এই বৃহৎ সৌৰশক্তি চালিত বিদ্যুত প্ৰকল্পটোৰ বাবে ১৮০০০ বিঘা মাটি এ পি ডি চি এলক প্ৰদান কৰিছে ৷ প্ৰথম অৱস্থাত লাংকাইজান এলেকাত মাটি দিয়াৰ কথা আছিল যদিও বিভিন্ন সংগঠনৰ বিৰোধিতাৰ বাবে অসম-নাগালেণ্ড সীমান্তৰ বৰজানত দিয়া হৈছে মাটি ৷ কিন্ত সৌৰশক্তিৰ পৰা ১০০০ মেগাৱাট বিদ্যুত উৎপাদন কৰিব লগা প্ৰকল্পটোৰ বিৰোধিতা কৰিছে ৰাজনৈতিক সংগঠন জইন্ট কঅডিনেশ্বন কমিটি ফৰ প্ৰটেক অটনমি (জেচিচিপিএ) (JCCPA) নামৰ সংগঠনটোৱে ৷
আজি ডিফুৰ জিলা প্ৰেছ ক্লাৱত আয়োজিত এক সংবাদমেলত সংগঠনটোৰ আহবায়ক খৰছিং টেৰণ, সাধাৰণ সম্পাদক ৰবীন্দ্ৰ ৰংপিয়ে এই বৃহৎ প্ৰকল্পটোৰ বিৰোধিতা কৰে৷ নেতাদুগৰাকীয়ে কয় যে সৌৰশক্তিৰ পৰা বিদ্যুত উৎপাদন কৰা প্ৰকল্পসমূহ মৰুভূমি এলেকা বা অব্যাহতি ভূমিত হ’ব লাগে ৷ কিন্তু বৰ্তমান পৰিষদে কৃষিভূমি এই প্ৰকল্পৰ বাবে দিছে৷ এই এলেকাত থকা বনাঞ্চলে প্ৰাকৃতিক ভাৰসাম্য ৰক্ষা কৰি আহিছে৷ বনাঞ্চলৰ বাহঁ কাঠ হ’ল স্হানীয় বাসিন্দাসকলৰ জীৱন আৰু জীৱিকা ৷
সেয়ে এই বৃহৎ প্ৰকল্পই স্হানীয় খাতিখোৱা জনতাক চৰকাৰে পেতে মৰাৰ ব্যৱস্থা কৰিছে৷ ১০০০ বা ২০০০ বিঘা মাটি দিলে সংগঠনটোৱে প্ৰতিবাদ নকৰিলেহেঁতেন বুলি কৈ কয় যে এই বিষয়ত পৰিষদে নিজৰ স্হিতি ৰাজহুৱা কৰিব লাগে ৷ কাৰণ এ পি ডি চি এল অসম চৰকাৰৰহে অধীন ৷ সেয়ে এই প্ৰকল্পৰ পৰা কাৰবি আংলঙৰ জনতাৰ কি লাভ হ’ব সেয়াও কব লাগে বুলি কয় নেতা কেইগৰাকীয়ে৷
