বুধবাৰে মুখ্যমন্ত্ৰী হিমন্ত বিশ্ব শৰ্মাই (Himanta Biswa Sarma) উদ্বোধন কৰে ৰাজ্যৰ এতিয়ালৈকে আটাইতকৈ দীঘল উৰণ সেতু নীলাচল উৰণ সেতু (Nilachal Bridge)। সেতুখন উদ্বোধন কৰি দিয়া ভাষণত মুখ্যমন্ত্ৰীয়ে আগন্তুক দিনৰ বিভিন্ন প্ৰকল্পৰ কথা ঘোষণা কৰে। তেওঁ কয় যে চৰকাৰে শীঘ্ৰে ৰাজ্যজুৰি ১০০০ খন দলং নিৰ্মাণৰ কাম আৰম্ভ কৰিব। কামাখ্যা গে’টৰ পৰা মালিগাঁৱলৈ ২.৬ কিলোমিটাৰ দৈৰ্ঘ্যৰ উৰণীয়া সেতু উদ্বোধন কৰি হিমন্ত শৰ্মাই কয় যে ৰাজ্য চৰকাৰে শেহতীয়াকৈ ৮৪২ খন সৰু-ডাঙৰ দলং নিৰ্মাণ সম্পূৰ্ণ কৰিছে।
তেওঁ কয়, “মই ঘোষণা কৰি সুখী যে আৰু ১০০০খন দলঙৰ কাম শীঘ্ৰে হাতত লোৱা হ’ব। ২০২৬ চনৰ ভিতৰত এই সকলোবোৰ প্ৰকল্প সম্পূৰ্ণ হ’ব। মানুহে কয় যে গুৱাহাটী উত্তৰ-পূবৰ গে’টৱে, কিন্তু আমি ইয়াক দক্ষিণ-পূব এছিয়াৰ বাবে গে’টৱে হিচাপে গঢ়ি তুলিব বিচাৰো।” লগতে তেওঁ কয়, “আজি আমি জনসাধাৰণৰ বাবে নীলাচল ফ্লাই অ’ভাৰ মুকলি কৰিছো। এইখন গুৱাহাটীৰ অন্যতম ব্যস্ত পথত নিৰ্মাণ কৰা হৈছিল আৰু সময়মতে সম্পূৰ্ণ কৰাটো পি ডব্লিউ ডি বিভাগৰ বাবে এক বৃহৎ প্ৰত্যাহ্বান আছিল।”
মুখ্যমন্ত্রীয়ে গুৱাহাটী আৰু অসমৰ অন্যান্য চহৰৰ প্রায় এক ডজন পথ প্রকল্পৰ কথাও ঘোষণা কৰে। ইয়াৰে কিছু সংখ্যক পৰিকল্পনা আৰু কিছুমান বিভিন্ন পর্যায়ত নিৰ্মাণৰত অৱস্থাত আছে৷ তেওঁ কয়, “বৰ্তমান ব্ৰহ্মপুত্ৰৰ ওপৰত উৰণ সেতু আৰু দলঙৰ দৰে ২২ টা বৃহৎ প্ৰকল্পৰ কাম চলি আছে। ইয়াৰে ২১ টা প্ৰকল্প সম্পূৰ্ণ হোৱাৰ অন্তিম পৰ্যায়ত আছে।”
