কেন্দ্ৰীয় চৰকাৰে দেশত লোকসভা আৰু বিধানসভা নিৰ্বাচন একেলগে অনুষ্ঠিত কৰাৰ বাবে পদক্ষেপ গ্ৰহণ কৰিছে। তাৰ বাবে শুকুৰবাৰে দেশত ‘এক ৰাষ্ট্ৰ, এক নিৰ্বাচন’ (One nation, one election) অনুষ্ঠিত কৰাৰ সম্ভাৱনাৰ বিষয়ে অধ্যয়ন কৰিবলৈ কেন্দ্ৰীয় চৰকাৰে প্ৰাক্তন ৰাষ্ট্ৰপতি ৰামনাথ কোবিন্দৰ নেতৃত্বত এখন সমিতি গঠন কৰিছে। আনহাতে, কেন্দ্ৰীয় চৰকাৰৰ এই পদক্ষেপ সন্দৰ্ভত প্ৰতিক্ৰিয়া প্ৰকাশ কৰিছে অসমৰ মুখ্যমন্ত্ৰী ডঃ হিমন্ত বিশ্ব শৰ্মাই (Chief Minister Dr. Himanta Biswa Sarma)।
মুখ্যমন্ত্ৰীয়ে কয় যে কেন্দ্ৰীয় চৰকাৰৰ এই পদক্ষেপত (Step of the Central Government) তেওঁ সুখী। আনহাতে, প্ৰধানমন্ত্ৰীয়ে এই ক্ষেত্ৰত এক সাহসী আৰু ঐতিহাসিক সিদ্ধান্ত গ্ৰহণ কৰা বুলিও তেওঁ উল্লেখ কৰে।ইয়াৰ উপৰি একে সময়তে দেশত লোকসভা আৰু বিধানসভা নিৰ্বাচন অনুষ্ঠিত হ’লে যথেষ্টখিনি ৰাজহ ৰাহি হ’ব বুলি মুখ্যমন্ত্ৰীয়ে কয়। ইয়াৰ দ্বাৰা দেশৰ উন্নয়নমূলক কামৰ গতি ত্বৰান্বিত হ’ব বুলিও তেওঁ উল্লেখ কৰে।
উল্লেখ্য যে অহা ১৮-২২ ছেপ্টেম্বৰত চৰকাৰে সংসদৰ বিশেষ অধিবেশন আহ্বান কৰাৰ এদিন পিছতে এই পদক্ষেপৰ কথা ঘোষণা কৰা হৈছে । প্ৰধানমন্ত্ৰী নৰেন্দ্ৰ মোদীয়ে ইতিমধ্যে লোকসভা আৰু বিধানসভা নিৰ্বাচনবোৰ একেলগে অনুষ্ঠিত কৰাৰ ওপৰত গুৰুত্ব প্ৰদান কৰি আহিছে । সেয়ে ৰামনাথ কোবিন্দক এই বিষয়টো সন্দৰ্ভত অধ্যয়নৰ বাবে দায়িত্ব প্ৰদান কৰাৰ সিদ্ধান্তই চৰকাৰে যে বিষয়টো গম্ভীৰভাৱে লৈছে সেয়া প্ৰকাশ পোৱা বুলি সূত্ৰই দাবী কৰে।
