এইবাৰ মণিপুৰৰ মুখ্যমন্ত্ৰী এন বীৰেণ সিঙৰ (Manipur CM Biren Singh) পৈত্রিক ঘৰত আক্ৰমণৰ চেষ্টা। বৃহস্পতিবাৰে নিশা ইম্ফলত বীৰেণ সিঙৰ পৈত্রিক ঘৰত আক্ৰমণৰ চেষ্টা চলায় একাংশ ক্ষুব্ধ ৰাইজে। পৰিস্থিতি নিয়ন্ত্ৰণৰ বাবে আৰক্ষীয়ে গুলীচালনা কৰে। অৱশ্যে নিৰাপত্তাৰক্ষীৰ প্ৰচেষ্টাত এই আক্ৰমণ ৰোধ কৰা হয়। ঘটনাৰ সময়ত অৱশ্যে ঘৰত কোনো লোক উপস্থিত নাছিল।
উল্লেখযোগ্য যে বীৰেণ সিং ইম্ফলৰ আন এটা ঘৰত থাকে। উক্ত ঘৰটো নিৰাপত্তাৰ কটকটীয়া বেষ্টনিত আছে। ইফালে ৰাজ্যখনত মুখ্যমন্ত্ৰীৰ ঘৰত আক্ৰমণৰ এই চেষ্টাক লৈ সৃষ্টি হৈছে উত্তেজনাৰ। পিছত এক্স হেণ্ডেলত (টুইটাৰ) মণিপুৰ আৰক্ষীয়ে জনায় যে মুখ্যমন্ত্ৰীৰ ব্যক্তিগত ঘৰত আক্ৰমণৰ কোনো চেষ্টা কৰা হোৱা নাই।
এজন আৰক্ষী বিষয়াই সংবাদ সংস্থা পিটিআইক জনোৱা মতে, ইম্ফলৰ হাইংগাং অঞ্চলত মুখ্যমন্ত্ৰীৰ পৈত্রিক ঘৰত আক্ৰমণৰ প্ৰয়াস কৰা হৈছিল। দুটা দলে বেলেগ বেলেগ দিশৰ পৰা ঘৰৰ কাষ চাপি আহিছিল। ঘৰৰ পৰা ১০০-১৫০ মিটাৰ দূৰত্বত নিৰাপত্তাৰক্ষীয়ে তেওঁলোকক বাধা প্ৰদান কৰে।
দলটোক ছত্ৰভংগ দিবলৈ আৰ এ এফ আৰু ৰাজ্যিক আৰক্ষীৰ জোৱানসকলে কন্দুৱা গেছ প্ৰক্ষেপ কৰে। সমগ্ৰ অঞ্চলটোত বিদ্যুৎ কৰ্তন কৰা হয়। ঘৰৰ সন্মুখত অধিক বেৰিকেড নিৰ্মাণ কৰা হয়। ঘৰৰ সন্মুখৰ পথত টায়াৰ জ্বলাই প্ৰতিবাদ সাব্যস্ত কৰে প্ৰতিবাদকাৰীয়ে। অৱশ্যে আৰক্ষীৰ সূত্ৰ অনুসৰি, এই ঘটনাত কোনো লোক আহত হোৱা নাই।
