প্ৰধানমন্ত্ৰী নৰেন্দ্ৰ মোদীয়ে (PM Modi) পুনৰ ছ’চিয়েল মিডিয়াত ভিডিঅ’ বাৰ্তা দি যুৱক-যুৱতীসকলক ধন্যবাদ জনায়। শুকুৰবাৰে দিয়া এই ভিডিঅ’ বাৰ্তাটোত বৃহস্পতিবাৰে তেওঁৰ ভিডিঅ’ বাৰ্তাই লাভ কৰা গুৰুত্ব সন্দৰ্ভত উল্লেখ কৰিছে।
শুকুৰবাৰে নিশা প্ৰায় ১১ বজাত ছ’চিয়েল মিডিয়াত ৪০ ছেকেণ্ডৰ ভিডিঅ’ মুকলি কৰি মোদীয়ে কয়, “ধন্যবাদ বন্ধুসকল। যোৱা নিশা আপোনালোকৰ সৈতে যোগাযোগ কৰাৰ সুযোগ পাইছিলোঁ। মই পোষ্ট কৰা ভিডিঅ’টোৰ প্ৰতি সঁহাৰি জনাই পৰামৰ্শ দিয়াৰ বাবে আপোনালোক সকলোকে ধন্যবাদ।”
বক্তব্যৰ শেষত প্ৰধানমন্ত্ৰীয়ে পুনৰ এবাৰ ধন্যবাদ জনাই কয় যে প্ৰেম অব্যাহত থাকিব। যোগাযোগ অধিক ‘সক্ৰিয়’ ৰূপত বৃদ্ধি পাই থাকিব। ভিডিঅ’টোৰ কেপচনত লিখা আছে, “কালি মোৰ ভিডিঅ’টো চাই মূল্যৱান পৰামৰ্শ প্ৰেৰণ কৰা সকলো যুৱক-যুৱতীক ধন্যবাদ।”
উল্লেখ্য যে বৃহস্পতিবাৰৰ বাৰ্তাৰ সময়ত প্ৰধানমন্ত্ৰীয়ে সম্বোধন কৰিবলৈ ‘মিত্ৰ’ৰ পৰিৱৰ্তে ‘ফ্ৰেণ্ডছ’ বাক্যাংশ ব্যৱহাৰ কৰিছিল। সেই ধাৰাবাহিকতা বজাই ৰাখি শুকুৰবাৰেও তেওঁ কয় ‘ফ্ৰেণ্ডছ’। অনুমান কৰা হৈছে যে তেওঁৰ এই সম্বোধন যুৱক-যুৱতীসকলক অধিক ওচৰলৈ অনাৰ উদ্দেশ্যেৰে কৰা হৈছিল।
শুকুৰবাৰে অনুষ্ঠিত কেবিনেট বৈঠকত প্ৰধানমন্ত্ৰীয়ে মন্ত্ৰীসকললৈ দিয়া বাৰ্তা আছিল যে ইনষ্টাগ্ৰামত সক্ৰিয় হৈ যুৱ সমাজৰ সৈতে সংযোগ বৃদ্ধিৰ বাবে ৰিল বনাব লাগে, মূলতঃ জেন জিৰ বাবে। মোদীয়ে নিজেই প্ৰথমে জনসংযোগ আৰম্ভ কৰি তেওঁৰ পৰামৰ্শ অনুসৰণ কৰিলে।
বৃহস্পতিবাৰে ভিডিঅ’ বাৰ্তাযোগে প্ৰধানমন্ত্ৰীয়ে ঘোষণা কৰে যে নীট কেলেংকাৰী আৰু প্ৰশ্নকাকত ফাদিল ৰোধৰ বাবে এখন খচৰা বিধেয়ক প্ৰস্তুত কৰা হৈছে। শুকুৰবাৰে কেবিনেটে এই বিষয়ত আলোচনা কৰিব। সোমবাৰে সংসদত গৃহীত হ’ব এই বিধেয়ক।
প্ৰধানমন্ত্ৰীৰ এই বাৰ্তাৰ পিছতে গুৰুগ্ৰামৰ এখন চিকিৎসালয়ত কেন্দ্ৰীয় মন্ত্ৰী জে পি নাড্ডাৰ পৰা ফলৰ ৰস খাই সমাজকৰ্মী সোণম ৱাংচুকে অনশনৰ অন্ত পেলায়। সেই সময়ত তেওঁৰ পত্নী গীতাঞ্জলি আংমো আৰু কেন্দ্ৰীয় মন্ত্ৰী জিতেন্দ্ৰ সিং চিকিৎসালয়খনত উপস্থিত আছিল।
অৱশ্যে ৱাংচুকে অনশন ভংগ কৰিলেও চিজেপিৰ প্ৰতিষ্ঠাপক অভিজিৎ দীপকেয়ে কয় যে শিক্ষামন্ত্ৰী ধৰ্মেন্দ্ৰ প্ৰধানে পদত্যাগ নকৰালৈকে দিল্লীৰ যন্তৰ-মন্তৰত শান্তিপূৰ্ণ প্ৰতিবাদ অব্যাহত থাকিব। এনে পৰিস্থিতিত প্ৰধানমন্ত্ৰীয়ে জেন জিক সন্তুষ্ট কৰিবলৈ ‘ফ্ৰেণ্ডছ’ সম্বোধন কৰি পুনৰ ছ’চিয়েল মিডিয়াত এটা ভিডিঅ’ পোষ্ট কৰে।
