শিক্ষাৰ ক্ষেত্ৰত দুৰ্নীতি, নীট প্ৰশ্নকাকত ফাদিল আৰু কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত অনশন আৰম্ভ কৰিছিল সোণম ৱাংচুকে (Sonam Wangchuk)। বৃহস্পতিবাৰে মাজনিশা চিকিৎসালয়ত তেওঁ কেন্দ্ৰীয় মন্ত্ৰী জে পি নাড্ডা আৰু জিতেন্দ্ৰ সিঙৰ উপস্থিতিত ২৬ দিনীয়া অনশন ভংগ কৰে।
কিন্তু বিতৰ্কই পিছ এৰা নাই। মন্ত্ৰীগৰাকীয়ে পদত্যাগ কৰাৰ পূৰ্বে কিয় অনশনৰ পৰা আঁতৰি গ’ল সোণম ৱাংচুক? এতিয়া বহুতে এই প্ৰশ্ন উত্থাপন কৰিছে। আনকি কেন্দ্ৰৰ সৈতে ‘বুজাবুজি’ৰ অভিযোগো উত্থাপন হৈছে। তাৰ মাজতে এইবাৰ তেওঁ মুখ খুলিছে।
চিকিৎসালয়ৰ পৰা এটা ভিডিঅ’ পোষ্ট কৰি সমালোচকক বাৰ্তা প্ৰদান কৰে তেওঁ। ককৰোচ জনতা পাৰ্টীৰ (চিজেপি) আন্দোলনৰ সমৰ্থনত অনশন কৰি আছিল সোণম ৱাংচুকে। সংগঠনটোৰ নেতাসকলে তেওঁৰ অনশন ভংগ কৰাৰ সিদ্ধান্তক আদৰণি জনায়। কিন্তু ছ’চিয়েল মিডিয়াত বহুতে এই সিদ্ধান্তক সমালোচনা কৰিছে।
শুকুৰবাৰে নিশা সোণম ৱাংচুকে এটা ভিডিঅ’ পোষ্ট কৰি তেওঁলোকক কয়, “২৬ দিনৰ অনশনৰ অন্তত এতিয়া মোৰ আন্তৰিকতাৰ প্ৰমাণ কৰিব লাগিব নেকি? মই এই ভিডিঅ’টো বনাইছোঁ দুখ, আচৰিত, খং আৰু শোকৰ মিশ্ৰিত অনুভূতিৰে।
বহুত শাৰীৰিক টান, বিবাদ, ধৰ্মঘটৰ মাজত ২০ বা ২২ তাৰিখে মোৰ বাকী থকা সকলো শক্তি লৈ ওলাই আহিবলগীয়া হৈছিল। মোৰ পেশীবোৰ নষ্ট হৈ গৈছে, মোৰ অভ্যন্তৰীণ অংগ আৰু মগজুৰ অপূৰণীয় ক্ষতি হৈছে, মোৰ ওজন ১১ কিলোগ্ৰাম কমিছে, তাৰ পিছতো মই প্ৰমাণ কৰিব লাগিব যে মোৰ অনশন কিমান নিখুঁত আছিল?”
সোণমে কয় যে শুকুৰবাৰে পুৱাৰে পৰা বহু লোকে তেওঁক ফোন কৰি বা তেওঁৰ ওচৰলৈ আহি বিভিন্ন ছ’চিয়েল মিডিয়া পোষ্ট দেখুৱাইছে। অনশন ভংগ কৰাৰ সিদ্ধান্তক লৈ উত্থাপিত হৈ থকা প্ৰশ্নবোৰ সোণমৰ দৃষ্টিত পৰিছিল চিকিৎসালয়ত থকাৰ সময়তে।
অভিযোগ মতে, কেৱল নড্ডা আৰু জিতেন্দ্ৰৰ জৰিয়তে কিয় অনশন ভংগ কৰিলে, আন কাৰোবাৰ যোগেদি কিয় কৰা নহ’ল? কিয় তেওঁ শিক্ষামন্ত্ৰীৰ পদত্যাগৰ দাবীৰ পৰা পিছুৱাই গ’ল? এনে প্ৰশ্ন উত্থাপন হৈছে। একাংশই এখোজ আগুৱাই গৈ কেন্দ্রীয় চৰকাৰে সোণমৰ সৈতে ‘বুজাবুজি’ত উপনীত হোৱা বুলি অভিযোগ উত্থাপন কৰিছে৷
এই সকলোবোৰ সমালোচনা দেখাৰ পিছত সোণমে এটা ভিডিঅ’ মেছেজ দিয়াৰ সিদ্ধান্ত লয়। তাত তেওঁ কয়, “সঁচাকৈয়ে যদি বুজাবুজি হ’বলগা আছিলেই তেন্তে তাৰ বাবে ২৬ দিন কোনোবাই নোখোৱাকৈ থাকিলহেঁতেন নেকি? আপোনালোকে দেখিছে যে অন্য লোকে বুজাবুজিত কেনেদৰে উপনীত হয়।
সেইদৰে কৰিছোঁ নেকি? মই এটা বিলাসী শীততাপ নিয়ন্ত্ৰিত কোঠাত বহি বুজাবুজিত উপনীত হ’ব নোৱাৰিলোঁহেঁতেননে? দিল্লীৰ গৰমত নোখোৱাকৈ, ৰাস্তাৰ কাষত কিয় বহিবলগা হ’ল? ” অৱশ্যে, তেওঁ এই কঠিন সময়ত তেওঁৰ কাষত থিয় দিয়াসকলকো ধন্যবাদ জনায়।
উল্লেখ্য যে সোণম ৱাংচুকে অনশন ভংগ কৰিলেও চিজেপি নিজৰ দাবীত অটল। দিল্লীত শিক্ষামন্ত্ৰীৰ পদত্যাগৰ দাবীত ধৰ্ণা কাৰ্যসূচী চলি আছে। সংগঠনটোৰ মুখপাত্ৰ আশুতোষ ৰাংকাই মন্ত্ৰীগৰাকীৰ পদত্যাগৰ বাহিৰে আন কোনো কথাতেই পিছুৱাই নাযায় বুলি মন্তব্য কৰিছে। ইতিমধ্যে চিজেপিৰ প্ৰতিনিধিয়ে কেন্দ্ৰৰ সৈতে বৈঠকত মিলিত হৈছে। প্ৰশ্নকাকত ফাদিল ৰোধ কৰিবলৈ প্ৰয়োজনীয় পদক্ষেপৰ বিষয়েও আলোচনা কৰা হৈছে।
সোণমৰ অনশনৰ সন্দৰ্ভত ৰাংকাই কয় যে এই সিদ্ধান্তত তেওঁলোক সুখী। কাৰণ তেওঁলোকো সোণমৰ স্বাস্থ্যৰ প্ৰতি চিন্তিত আছিল। চিজেপিয়ে কেইবাবাৰো উপবাস ভংগ কৰিবলৈ অনুৰোধ জনাইছিল। অৱশ্যে ইয়াৰ লগত আন্দোলনৰ দাবীৰ কোনো সম্পৰ্ক নাই।
