লোকসভা নির্বাচনৰ প্রতি লক্ষ্য ৰাখি বিজেপি নেতৃত্বাধীন কার্বি আংলং (Karbi Anglong) স্বায়ত্ত শাসিত পৰিষদে পৰিষদৰ ২৬টা সমষ্টিত উন্নয়নমূলক আঁচনিৰ খতিয়ান দাঙি ধৰাৰ লগতে বিভিন্ন উন্নয়নমূলক আঁচনিৰ আধাৰশিলা আৰু নিৰ্মাণ সম্পূর্ণ হোৱা আঁচনিৰ উদ্বোধন (Inauguration of foundation stone of development scheme and completion of scheme) সমাপ্ত কৰাৰ পাছত এইবাৰ দুয়োখন পার্বত্য জিলাৰ গাঁৱে-ভুঁঞে, চহৰে-নগৰে উন্নয়নৰ খতিয়ান ল’বলৈ যাব বিজেপিৰ নেতা-কর্মীসকলে।
আজি ডিফুৰ তাৰালাংছ’ত থকা কার্বি পিপুলচ হলত সাংবাদিকৰে সৈতে হোৱা এক বার্তালাপত আগন্তুক নৱবৰ্ষত কার্বি আংলং স্বায়ত্ত শাসিত পৰিষদে ল’বলগীয়া কেতবোৰ গুৰুত্ব পূর্ণ পদক্ষেপ আৰু পৰিকল্পনা সদৰি কৰে। ৰংহাঙে জিলাখনত বসবাস কৰা সকলো জাতি-জনগোষ্ঠী আৰু ধর্মাৱলম্বী লোকক খ্রীষ্টমাছ, নৱবৰ্ষ আৰু কাৰবি নববর্ষৰ শুভেচ্ছা জ্ঞাপন কৰে। বিগত পৰিষদৰ নিৰ্বাচনত দুয়োখন পার্বত্য জিলাৰ জনসাধাৰণে ২৬টা পৰিষদীয় সমষ্টিত বিজেপিৰ প্রার্থীক বিজয়ী কৰি অনাৰ বাবে ধন্যবাদ জ্ঞাপন কৰি নির্বাচনৰ সময়ত অসমৰ মুখ্যমন্ত্রী ড: হিমন্ত বিশ্ব শর্মাই দিয়া প্রতিশ্রুতিসমূহ এতিয়া পৰিষদ আৰু অসম চৰকাৰে ৰূপায়ণ কৰি আছে বুলি প্রকাশ কৰে। এই উদ্দেশ্য আগত ৰাখি ২৬টা পৰিষদীয় সমষ্টিত ঐক্য-বিজয় আৰু সমৃদ্ধি ৰেলী অনুষ্ঠিত কৰা হ’ল বুলি সদৰি কৰে ৰংহাঙে।
মুখ্যমন্ত্ৰীগৰাকীয়ে প্ৰদান কৰা প্রতিশ্রুতিসমূহ আখৰে আখৰে পালন কৰাৰ বাবে বিজেপি নেতৃত্বাধীন পৰিষদখন বদ্ধপৰিকৰ বুলি উল্লেখ কৰি জনসাধাৰণে বাট-পথ, বিশুদ্ধ খোৱা পানী, শিক্ষানুষ্ঠান আদিকে ধৰি উন্নয়নমূলক আঁচনিসমূহৰ দ্বাৰা লাভাম্বিত হৈছে নে নাই তাৰ খতিয়ান ল’বলৈ বিজেপি নেতা-কর্মীসকল লোকসভা নিৰ্বাচনৰ পূর্বে দুয়োখন পার্বত্য জিলাৰ গাঁৱে ভূঞে, নগৰে-চহৰে যাব বুলি উল্লেখ কৰি ইয়াৰ প্রতিবেদন প্রদান কৰিব বুলি জানিবলৈ দিয়ে। মুখ্যমন্ত্রীৰ নিৰ্বাচনী প্রতিশ্রুতি অনুসৰি দুয়োখন জিলাত ২৫০১ কোটি টকাৰ আঁচনিৰ আধাৰশিলা স্থাপন কৰাৰ লগতে কাম আৰম্ভ কৰা হৈছে। অসম মালাৰ জৰিয়তে ৯২০ কোটি টকাৰ পথ নির্মাণ কৰি থকা হৈছে।
ইয়াৰোপৰি কাজিৰঙা-ৰংমংবে-ডকমকাৰ মাজত ৩০০ কোটি টকা ব্যয় সাপেক্ষে পথ নির্মাণৰ পৰিকল্পনা লোৱা হৈছে। আগন্তুক নৱবৰ্ষৰ প্রথম সপ্তাহত তাৰালাংছ’ত নির্মাণ সম্পূর্ণ হোৱা অসমৰ ভিতৰতে প্রথম ৩০০০ আসন বিশিষ্ট অত্যাধুনিক প্রেক্ষাগৃহ উদ্বোধন কৰাৰ লগতে বিভিন্ন উন্নয়নমূলক আঁচনিসমূহ উদ্বোধন কৰা হ’ব বুলিও সদৰি কৰে ৰংহাঙে।
