মুখ্যমন্ত্ৰী হিচাপে শপত গ্ৰহণ ঝাৰখণ্ড মুক্তি মৰ্চাৰ নেতা হেমন্ত ছ’ৰেনৰ

ASSAM TIMES POST
নিউজ ডেক্সঃ ঝাৰখণ্ড মুক্তি মৰ্চাৰ নেতা হেমন্ত ছ’ৰেনে দেওবাৰে মুখ্যমন্ত্ৰী হিচাপে শপত গ্ৰহণ কৰে৷ এই শপত গ্ৰহণ অনুষ্ঠানত বিভিন্ন ৰাজ্যৰ বহু নেতা উপস্থিত আছিল৷ দেওবাৰে তেওঁ ৰাঁচীৰ ম’হাৰবাদী খেলপথাৰত দিনৰ ২ বজাত শপত গ্ৰহণ কৰে৷ তেওঁক শপত বাক্য পাঠ কৰায় ঝাৰখণ্ডৰ ৰাজ্যপাল দ্ৰৌপদী মুৰণুৱে৷

এই শপত গ্ৰহণ অনুষ্ঠানত কংগ্ৰেছ নেতা ৰাহুল গান্ধী, পশ্চিম বংগৰ মুখ্যমন্ত্ৰী মমতা বেনাৰ্জী, মধ্য প্ৰদেশৰ মুখ্যমন্ত্ৰী কমল নাথ, চত্তীশগড়ৰ মুখ্যমন্ত্ৰী ভূপেশ বাঘাল, ৰাজস্থানৰ মুখ্যমন্ত্ৰী অশোক ঘেহলটৰ লগতে ডিএমকেৰ সভাপতি এম কে ষ্টেলীন, আম আদমী পাৰ্টীৰ সাংসদ সঞ্জয় সিং আৰু আৰ জে ডিৰ কাৰ্যবাহী সভাপতি তেজস্বী যাদৱ উপস্থিত আছিল৷

এই অনুষ্ঠানত হেমন্ত ছ’ৰেনৰ পিতৃ তথা ঝাৰখণ্ড মুক্তি মৰ্চাৰ প্ৰধান শিবু ছ’ৰেনো উপস্থিত আছিল৷ ইপিনে, সমাজবাদী পাৰ্টীৰ সভাপতি অখিলেশ যাদৱ আৰু আম আদমী পাৰ্টীৰ প্ৰধান অৰবিন্দ কেজৰিৱাল শপত গ্ৰহণ অনুষ্ঠানত উপস্থিত নাথাকিল৷

একেটা অনুষ্ঠানতে কংগ্ৰেছ নেতা আলামগিৰ আলম, ৰাজ্যিক কংগ্ৰেছ সভাপতি ৰামেশ্বৰ অ’ৰাঅন আৰু আৰ জে ডিৰ বিধায়ক সত্যেন্দ্ৰ ভকটাই কেবিনেট মন্ত্ৰী হিচাপে শপত বাক্য পাঠ কৰে৷ উল্লেখ্য যে প্ৰাক্তন প্ৰধানমন্ত্ৰী ড° মনমোহন সিঙৰ মন্ত্ৰীসভাত ৰামেশ্বৰ অ’ৰাঅন এজন ৰাজ্যিক পৰ্যায়ৰ কেন্দ্ৰীয় মন্ত্ৰী আছিল৷