উত্তৰ-পূৰ্বাঞ্চলৰ অতিকৈ পুৰণি সৰ্ববৃহৎ কাৰবি যুৱ মহোৎসৱ (Karbi Youth Festival)ৰ গৌৰৱোজ্জল সোণালী জয়ন্তী বৰ্ষৰ কাৰ্যসূচী আজিৰে পৰা আনুষ্ঠানিকভাবে আৰম্ভ হ’ল৷ ৮ দিনীয়া কাৰ্যসূচীৰে ৰংমিলিৰ হাঁহিৰ দেশত উৰিল কাৰবি লোক কৃষ্টি সংস্কৃতিৰ সাংস্কৃতিক বিজয় ধ্বজা৷ সৰু বৰ পাহাৰৰ মনোৰম প্ৰাকৃতিক আৰু নৈসৰ্গিক পৰিবেশৰ মাজতে মন পৰশা জন-জাতীয় নৃত্য গীতেৰে উদ্ভাসিত হ’ল তাৰলাংচৰ বাকৰি৷
কাৰবি পৰাম্পৰাগত লোক- কৃষ্টি সংস্কৃতিৰ অমিয় সুবাসেৰে আমোল মোলাইছে কাৰবি সাংস্কৃতিক প্ৰকল্প ৷ জিলাখনত বসবাস কৰা প্ৰতিটো জনগোষ্ঠীৰ পৰাম্পৰাগত কৃষ্টি সংস্কৃতিক অগ্ৰাধিকাৰ দি উদ্যোক্তাসকলে তাৰালাংচত সংস্কৃতিৰ পৃথিৱীখনত এক সকীয়া পৰিচয় লাভ কৰিবলৈ সক্ষম হৈছে৷
৮২৭ বিঘাজোৰা মাটিকালিৰ তাৰালাংচৰ বাকৰিত শিল্পীগ্ৰাম, বিভাগীয় প্ৰদৰ্শনীস্থলী, বজাৰ গৃহ, ক্ৰীড়াংগন, জনগোষ্ঠীয় আৱাস গৃহ, জনগোষ্ঠীয় নৃত্য আৰু কলা প্ৰদৰ্শনীৰ বাবে (আচেথাই) মঞ্চসমূহ বিভিন্ন আলোক সজ্জাৰে ন-কইনাৰ দৰে সজাই পৰাই তোলা হৈছে ৷ ১৯৭৪ চনৰ পৰাৰ পৰা ধাৰাবাহিকভাবে অনুষ্ঠিত হৈ অহা যুৱ মহোৎসৱটিয়ে উত্তৰ পূৰ্বাঞ্চলৰ অন্যতম শ্ৰেষ্ট আৰু পুৰণি যুৱ মহোৎসৱ হিচাপে পৰিগণিত হৈ আহিছে ৷
গৌৰৱোজ্জল সোণালী জয়ন্তী বৰ্ষ গৰকা কাৰবি যুৱ মহোৎসৱটি এইবাৰ আকৰ্ষণৰ কেন্দ্ৰবিন্দু হৈ পৰিব প্ৰায় ৭০ ফুট উচ্চতাৰ কাৰবি নথেংপি (প্ৰাসাদ)৷ আজি আনুষ্ঠানিক ভাবে আৰম্ভ হোৱে মহোৎসৱটিৰ দ্বিতীয় দিনৰ কাৰ্যসূচী অনুসৰি ১৯৭৪ চনতে ডিফুৰ কাৰবি ক্লাৱত জন্ম লাভ কৰা কাৰবি যুৱ মহোৎসৱৰ স্মৃতি হিছাপে কাৰবি ক্লাৱৰ পৰাই বিভিন্ন প্ৰান্তৰ ৩৪টা মাণ্ডলিক কমিটি আৰু বিভিন্ন জিলাৰ পৰা আমন্ত্ৰিত ১৬টা মাণ্ডলিক কমিটিৰে মুঠ ৫০টা মাণ্ডলিক কমিটিৰ ৫ সহস্ৰাধিক শিল্পীয়ে হাতে হাতে চেংপি, চেংচ’, চেংবৰুক, চং আদিৰে শোভাবৰ্দ্ধিত হোৱাৰ লগতে মূৰত পহ’ ৱজাৰু,আংনি, পুৰুষৰ গাত চইক’ চয়াং,তিৰুতাৰ গাত পিনি, পেকক, কঁকালত ৱামকক, দুই হাতত চংনক আদিৰে কাৰবি ৰিচ’ নিমচ’ সকলে বৰ্ণিল শোভাযাত্ৰা উলিয়াই তাৰালাংচৰ হেমফু মুক্ৰাঙ পতাকা উত্তোলন থলীত উপস্থিত হয়। সাংস্কৃতিক শোভা যাত্ৰাৰ নেতৃত্ব বহন কৰে কেচিএছৰ সভাপতি চন্দ্ৰছিং ক্ৰ’ই৷
পিছত কাৰবি আংলং স্বায়ত্তশাসিত পৰিষদৰ মুখ্যকাৰ্যবাহী সদস্য ডঃ তুলিৰাম ৰংহাঙৰ দ্বাৰা হেম্ফু মুক্ৰাংত থলীত ৫০ উদ্ধোধন কৰাৰলপিছত কেচিএছৰ সভাপতি চন্দ্ৰছিং ক্ৰই ৫০ সংখ্যক কাৰবি যুৱ মহোৎসৱৰ পতাকা উত্তোলন কৰে৷ আজিৰ কাৰ্যসূচীত লাউচ, কম্বোডিয়া, ম্যানমাৰ, ভিয়েটনাম, ঘানা, ইথ’পিয়া, মালৱি ৰাষ্ট্ৰপতি আৰু ইণ্টাৰনেছনেল ষ্টুডেন্টছ হিছাপে অতিথি হিছাপে উপস্থিত থাকে৷
ইয়াৰোপৰি কাৰবি ৰজা লংচিং ৰংহাঙ, লিনডকপ’ চিণ্ঠং ৰংবং, লিনডকপ’ আমৰি ৰংবং, ডুমৰা ৰজা হলিচিং ৰংহাঙ, সাংসদ হৰেণছিং বে’, বিধান সভাৰ উপাধ্যক্ষ ডাঃ নোমল মমিন, বিধায়কদ্বয় বিদ্যাছিং ইংলেং, দৰচিং ৰংহাঙ, পদ্মশ্ৰী ধনেশ্বৰ ইংতি, কাৰবি লোক-কৃষ্টি সংস্কৃতিৰ গৱেষক লুণছে তিমুঙ, কেচিএছৰ প্ৰতিষ্ঠাপক সম্পাদক ৰয় ইংহি, কাৰবি লাম্মেট আমেইৰ সভাপতি বাৰিম ইংতিকে প্ৰমুখ্য কৰি বিভিন্ন ৰাজনৈতিক অৰাজনৈতিক দলৰ সভাপতি-সম্পাদক আৰু নেতা কৰ্মী উপস্থিত থাকে ৷ ইয়াৰ পিছত কাৰবি সাংস্কৃতিক প্ৰকল্পস্থলীত বিভিন্ন বিপনী, শিল্পী গ্ৰাম, পৰাম্পৰাগত গাওঁ, মুল বজাৰ, বিভাগীয় প্ৰদৰ্শনী আদি উদ্ধোধন কৰা হয়৷
