বেলুচিস্তানৰ সন্ত্ৰাসবাদী ঘাটিত আক্ৰমণৰ পিছদিনাই পাকিস্তানে ইৰাণৰ ওপৰত প্ৰতি ক্ষেপণাস্ত্ৰ আক্ৰমণ (Pakistan’s counter-missile attack on Iran) চলায়। বৃহস্পতিবাৰে পুৱতি নিশা পাকিস্তান-ইৰাণ সীমান্তৰ ছাৰাভান চহৰত ধাৰাবাহিক বিস্ফোৰণে কঁপাই তোলে। কেইবাটাও আন্তঃৰাষ্ট্ৰীয় সংবাদ মাধ্যমৰ সূত্ৰ মতে, পাকিস্তানৰ আক্ৰমণৰ ফলত ইৰাণত ৪ টা শিশু আৰু ৩ গৰাকী মহিলাই প্ৰাণ হেৰুৱাইছে (4 children and 3 women have lost their lives in Iran)।
উল্লেখযোগ্য যে মঙলবাৰে ইৰাণে পাকিস্তানৰ বেলুচিস্তানত থকা সন্ত্ৰাসবাদী সংগঠন জৈছ আল আদালৰ ঘাটিত মাৰাত্মক ক্ষেপণাস্ত্ৰ আৰু ড্ৰোন আক্ৰমণ চলায়। ফলত বেলুচিস্তানত ২ টা শিশুৰ মৃত্যু হয়। আহত হয় তিনিজন লোক। এই আক্ৰমণ সহ্য কৰা নহ’ব বুলিও সকীয়াই দিয়ে পাকিস্তানে। ইয়াৰ ফল ভুগিব লাগিব বুলিও ভাবুকি দিয়ে পাকিস্তানে। এই সতৰ্কবাণীৰ কেইঘণ্টামান পিছতে সেনাই ইৰাণৰ সন্ত্ৰাসবাদী ঘাটিক লক্ষ্য কৰি প্ৰতি আক্ৰমণ চলায়।
