লোকসভা নিৰ্বাচনলৈ মাজত মাথোঁ প্ৰায় দুটা মাহ। তাৰ পূৰ্বে আজিৰে পৰা আৰম্ভ হৈছে বাজেট (Budget 2024) অধিবেশন। এই বাজেট অধিবেশনৰ ফালে সকলোৰে দৃষ্টি নিবদ্ধ হৈ আছে। কিয়নো নিৰ্বাচনৰ পূৰ্বে কেন্দ্ৰই বাজেটত বহুখিনি সকাহ প্ৰদান কৰিব পাৰে বুলি ৰাজনৈতিক বিশ্লেষকসকলৰ মত। বিগত কেইমাহমানত প্ৰধানমন্ত্ৰী নৰেন্দ্ৰ মোডীয়ে বাৰে বাৰে দাবী কৰি আহিছে যে তেওঁ চাৰিটা জাতিৰ কথা জানে।
সেইকেইটা হৈছে মহিলা, যুৱক, দৰিদ্ৰ আৰু কৃষক। বিত্তমন্ত্ৰী নিৰ্মলা সীতাৰমণেও কয় যে লোকসভা নিৰ্বাচনৰ পূৰ্বে অন্তৱৰ্তীকালীন বাজেটত এই চাৰিটা গোটৰ লোক তেওঁৰ অগ্ৰাধিকাৰ তালিকাত থাকিব। এই পৰিপ্ৰেক্ষিতত বিত্ত মন্ত্ৰালয়ৰ সূত্ৰই জনোৱা মতে, ১ ফেব্ৰুৱাৰীত কেন্দ্ৰৰ অন্তৱৰ্তীকালীন বাজেটত কোনো বৃহৎ নীতিগত ঘোষণা নহ’লেও মহিলা, যুৱক-যুৱতী, দৰিদ্ৰ আৰু কৃষকসকলৰ বাবে বেলট বাকচত উপকৃত হ’ব পৰাকৈ কিছু ‘উপহাৰ’ থাকিব।
মন্ত্ৰালয়ৰ সূত্ৰই ইংগিত দিয়ে যে কৃষকৰ বাবে প্ৰধানমন্ত্ৰী কিষাণ আঁচনিত কিছু সালসলনি হ’ব পাৰে। বৰ্তমান পিএম কিষাণ আঁচনিৰ অধীনত কৃষকসকলে বছৰি ৬ হাজাৰ টকা পায়। ইয়াক ৮ হাজাৰ টকালৈ বৃদ্ধি কৰিব পাৰে।
কেন্দ্ৰীয় চৰকাৰৰ স্বাস্থ্য বীমা আঁচনি আয়ুষ্মান ভাৰতৰ অধীনত বীমা কৰা ধনৰাশি ৫ লাখৰ পৰা ১০ লাখলৈ বৃদ্ধি হ’ব পাৰে। ইয়াৰ সমান্তৰালকৈ গ্ৰাম্য দৰিদ্ৰ লোকৰ বাবে ১০০ দিনৰ কৰ্ম আঁচনিৰ বাবে পুঁজিৰ আবণ্টন বৃদ্ধি কৰাৰ উপৰি আন কিছুমান ঘোষণাৰো সম্ভাৱনা আছে।
ইয়াৰ পূৰ্বে বিত্ত মন্ত্ৰালয়ৰ সূত্ৰই ইংগিত দিছিল যে এইবাৰ মধ্যবিত্তীয় কৰ্মচাৰীক সকাহ দিয়াৰ উদ্দেশ্যে আয়কৰৰ নূন্যতম হাৰ ৫০ টকাৰ পৰা বৃদ্ধি কৰাৰ ধাৰণা আছে।
ইয়াৰ ফলত বছৰি ১২৫০ টকা কৰ হ্ৰাস পাব। চাড়ে পাঁচ লাখ পৰ্যন্ত মুঠ আয়ৰ কোনো কৰ দিব নালাগিব। একে সময়তে পুৰণি আৰু নতুন দুয়োটা কৰ গাঁথনিতে ‘মানক কৰ্তন’ৰ পৰিমাণ ৫০ হাজাৰ টকাৰ পৰা ৬০ হাজাৰ টকালৈ বৃদ্ধি কৰিব পাৰে। ২০১৯ চনৰ লোকসভা নিৰ্বাচনৰ পূৰ্বেও অন্তৱৰ্তীকালীন বাজেটত আয়কৰ ৰেহাইৰ সীমা বৃদ্ধি কৰা হৈছিল। পাঁচ লাখ টকা পৰ্যন্ত আয়ৰ ওপৰত কোনেও আয়কৰ দিব নালাগিব বুলি ঘোষণা কৰা হৈছিল।
সাধাৰণতে লোকসভা নিৰ্বাচনী বৰ্ষত নিৰ্বাচনৰ পিছত যেতিয়া নতুন চৰকাৰ গঠন হয়, তেতিয়া পূৰ্ণাংগ বাজেট দাখিল কৰা হয়। কিন্তু চৰকাৰী ব্যয় আৰু কামত বাধা নপৰিবলৈ হ’লে লোকসভা নিৰ্বাচনৰ পূৰ্বে ‘ভোট অন একাউণ্ট’ বা অন্তৱৰ্তীকালীন বাজেট দাখিল কৰা হয়। সেইবাবেই ৩১ জানুৱাৰী বুধবাৰৰ পৰা আৰম্ভ হৈছে সংসদৰ বাজেট অধিবেশন। প্ৰথমদিনা দুয়ো সদনক সম্বোধন কৰিব ৰাষ্ট্ৰপতি দ্ৰৌপদী মুৰ্মুৱে।
সাধাৰণতে ৰাষ্ট্ৰপতিৰ ভাষণৰ পিছত সংসদত বিত্তীয় জৰীপ উত্থাপন কৰা হয়, যাতে বিদায়ী বিত্তীয় বৰ্ষৰ বৈধতা থাকে। কিন্তু এইবাৰ ভোটদানৰ পূৰ্বে অন্তৱৰ্তীকালীন বাজেট হোৱাৰ বাবে বুধবাৰে সংসদত দাখিল কৰা নহ’ব বিত্তীয় সমীক্ষা। বৰঞ্চ উক্ত বিত্তীয় জৰীপ জুলাই মাহত সম্পূৰ্ণ বাজেটৰ পূৰ্বে দাখিল কৰা হ’ব। বৃহস্পতিবাৰে একেলগে ষষ্ঠখন বাজেট দাখিল কৰিব বিত্তমন্ত্ৰী সীতাৰমণে। উল্লেখযোগ্য যে মোৰাৰজী দেশাইৰ পিছত এইবাৰ বিত্তমন্ত্রীয়ে এই কাম কৰিবলৈ ওলাইছে৷
