বিশ্বৰ তিনি শক্তিশালী নেতাৰ সৈতে কেমেৰাৰ একেটা ফ্ৰেমত বন্দী হৈছে তেৱোঁ। তেওঁ নৰেন্দ্ৰ মোদী, ভ্লাদিমিৰ পুটিন আৰু ছি জিনপিঙৰ ঠিক পিছফালে থিয় হৈ আছিল। শনিবাৰে প্ৰধানমন্ত্ৰীয়ে ছ’চিয়েল মিডিয়াত ছবিখন পোষ্ট কৰাৰ পিছতে এই চতুৰ্থজন ব্যক্তিক লৈ আলোচনা আৰম্ভ হয়। ৩৬ বছৰীয়া ভাৰতীয় কূটনীতিবিদ সিদ্ধাৰ্থ বাবু ২০১৭ বেটচৰ আই এফ এছ বিষয়া। মাত্ৰ ২৬ বছৰ বয়সতে ইউ পি এছ চি উত্তীৰ্ণ হৈছিল। মেধাৰ তালিকাত ১৫ নম্বৰ স্থান লাভ কৰিছিল।
সিদ্ধাৰ্থ ডাঙৰ-দীঘল হয় কেৰালাৰ কোচিত। স্কুলীয়া শিক্ষাও তাতেই গ্ৰহণ কৰিছিল। ইয়াৰ পিছত ২০০৮ চনত মেকানিকেল ইঞ্জিনিয়াৰিঙৰ শিক্ষা গ্ৰহণ কৰিবলৈ আৰম্ভ কৰে। কেৰালাৰ কোটামংগলামৰ চৰকাৰী অভিযান্ত্ৰিক মহাবিদ্যালয়ত নামভৰ্তি কৰে। ২০১২ চনত অভিযান্ত্ৰিক বিষয়ত স্নাতক ডিগ্ৰী লাভ কৰি কলেজীয়া শিক্ষা সমাপ্ত কৰি ই-কমাৰ্চ কোম্পানী এটাত কাম কৰিবলৈ আৰম্ভ কৰে। সেই কোম্পানীটোত দুবছৰতকৈ অধিক সময় কাম কৰাৰ পিছত তেওঁৰ মন সলনি হয়। তেওঁ ইউ পি এছ চিৰ বাবে প্ৰস্তুতি আৰম্ভ কৰে। এই পৰীক্ষাৰ বাবে তেওঁ ইতিহাস আৰু ৰাজনীতি বিজ্ঞানক বিষয় হিচাপে বাছি লৈছিল।
অৱশ্যে প্ৰথম প্ৰয়াসত উত্তীৰ্ণ হ’ব নোৱাৰিলে। অৱশেষত ২০১৭ চনত ইউ পি এছ চিত উত্তীৰ্ণ হৈ সৰ্বভাৰতীয় পৰ্যায়ত ১৫ নম্বৰ স্থান লাভ কৰি আই এফ এছৰ বিষয়া হয়। ভাৰতীয় কূটনীতিবিদসকলে অন্ততঃ এটা বিদেশী ভাষাত পাকৈত হ’ব লাগিব। আই এফ এছ বিষয়া হোৱাৰ পিছত সিদ্ধাৰ্থে দিল্লীৰ ফৰেইন ছাৰ্ভিচ ইনষ্টিটিউটত মেণ্ডেৰিন ভাষা শিকিছিল। তাত আন্তঃৰাষ্ট্ৰীয় সম্পৰ্ক, কূটনৈতিক আলোচনা, বৈদেশিক নীতি, প্ৰট’কল আৰু অন্যান্য প্ৰাসংগিক বিষয়ৰ প্ৰশিক্ষণো লাভ কৰে।
তেওঁ চীনতো আই এফ এছ বিষয়া হিচাপে কাম কৰি আহিছে। ২০১৮ চনৰ পৰা ২০২২ চনলৈ (এই সময়ছোৱাতে কৰোনা মহামাৰী সংঘটিত হয়। চীন, ভাৰতকে ধৰি বিভিন্ন দেশত লকডাউন আৰোপ কৰা হৈছিল) তেওঁক বেইজিংস্থিত ভাৰতীয় দূতাবাসত দায়িত্ব অৰ্পণ কৰা হৈছিল। পিছলৈ ২০২২ চনত আমেৰিকাৰ কেলিফোৰ্ণিয়াৰ মণ্টেৰীত অৱস্থিত মিডলবেৰী ইনষ্টিটিউট ফৰ ইণ্টাৰনেশ্যনেল ষ্টাডিজত ইংৰাজীৰ পৰা মেণ্ডেৰিনলৈ আৰু মেণ্ডেৰিনৰ পৰা ইংৰাজীলৈ অনুবাদৰ শিক্ষা গ্ৰহণ কৰে। ২০২৪ চনত তেওঁ তাৰ পৰাই দোভাষী সংক্ৰান্ত বিষয়তো ডিগ্ৰী লাভ কৰে।
২০২৪ চনত সিদ্ধাৰ্থ দিল্লীলৈ উভতি আহি বৈদেশিক পৰিক্ৰমা মন্ত্ৰালয়ৰ অধীনস্থ সচিব হিচাপে নিযুক্তি লাভ কৰে। বৰ্তমান তেওঁ মন্ত্ৰালয়ৰ পূব এছিয়া বিভাগত উপ-সচিব হিচাপে কৰ্মৰত। বৈদেশিক পৰিক্ৰমা মন্ত্ৰালয়ৰ এই বিভাগে চীন, জাপান, দক্ষিণ কোৰিয়া আৰু উত্তৰ কোৰিয়াৰ সৈতে ভাৰতৰ সম্পৰ্ক চোৱাচিতা কৰে। অৰ্থাৎ এই দেশসমূহৰ সৈতে দিল্লীৰ সম্পৰ্ক সঠিকভাৱে বজাই ৰখাটো তেওঁৰ দায়িত্ব। তেওঁ প্ৰধানমন্ত্ৰী আৰু অন্যান্য চৰকাৰী শীৰ্ষ বিষয়াসকলৰ বাবে দোভাষী হিচাপেও কাম কৰে।
