কলকাতাৰ (Kolkata) গাৰ্ডেন ৰিচত অৱস্থিত এটা ৫ মহলীয়া অট্টালিকা ভাঙি পৰে। দেওবাৰে মাজনিশা কলকাতা পৌৰসভাৰ ১৩৪ নং ৱাৰ্ডৰ গাৰ্ডেন ৰিচৰ ফতেহপুৰ বেনাৰ্জী পাৰা লেনত সংঘটিত হয় এই ঘটনা। পাঁচ মহলীয়া অট্টালিকাটোৰ চাৰিওফালে কেইবাটাও জুপুৰি আছে।
এই অট্টালিকাটো ভাঙি তাৰ ওপৰতে পৰে। আনহাতে, দুৰ্ঘটনাৰ পিছত ঘটনাস্থলীত উপস্থিত হয় বিধায়ক তথা মেয়ৰ ফিৰহাদ হাকিম। অগ্নিনিৰ্বাপক মন্ত্ৰী সুজিত বসুও উপস্থিত হয়। ফিৰহাদে জনোৱা মতে, ১৫ জন লোকক উদ্ধাৰ কৰা হৈছে।
ইয়াৰে দুজনৰ মৃত্যু হৈছে। আনহাতে, আহতসকলৰ ৭ জনক স্থানীয় চিকিৎসালয়ত আৰু এজনক এছএছকে ম হাস্পতালত ভৰ্তি কৰোৱা হৈছে। বাকীসকলক প্ৰাথমিক চিকিৎসাৰ অন্তত ঘৰলৈ যাবলৈ দিয়া হয়। নিহত দুগৰাকীৰ নাম ছেম বেগম আৰু হাছিনা খাতুন। মেয়ৰৰ উপৰি অগ্নিনিৰ্বাপক বাহিনীৰ মন্ত্ৰী তথা নগৰপাল বিনীত গোৱেল আৰু অন্যান্য জ্যেষ্ঠ বিষয়াসকল ঘটনাস্থলীত উপস্থিত হয়। দুৰ্যোগ সঁহাৰি বাহিনী আৰু অগ্নিনিৰ্বাপক বাহিনীয়ে এতিয়াও উদ্ধাৰ অভিযান চলাই আছে।
প্ৰত্যক্ষদৰ্শীৰ মতে, গাৰ্ডেন ৰিচ থানাৰ অন্তৰ্গত অঞ্চলটোৰ বহুমহলীয়া ভৱনটোত কেইবাদিনো ধৰি নিৰ্মাণৰ কাম চলি আছিল। দেওবাৰে নিশা প্ৰায় ১২ বজাত বিকট শব্দ কৰি ওচৰৰ এটি ঘৰৰ ওপৰত ভাঙি পৰে। লগে লগে ঘটনাস্থলীত উপস্থিত হয় আৰক্ষী। দুৰ্যোগ সঁহাৰি দল আৰু অগ্নিনিৰ্বাপক বাহিনীক সেই স্থানত উপনীত হ’বলৈ যথেষ্ট সময় লাগে।
কাৰণ উক্ত স্থানত উপনীত হোৱাৰ পথটো যথেষ্ট সংকীৰ্ণ আছিল। ইয়াৰ লগে লগে স্থানীয় বাসিন্দাসকলৰ মাজত ক্ষোভ বিয়পি পৰে। চাৰিওফালে কংক্ৰিটৰ ধ্বংসাৱশেষ বিয়পি পৰে। আনহাতে, ধ্বংসাৱশেষৰ তলত কোনো লোক আবদ্ধ হৈ আছে নেকি তাৰ অনুসন্ধান চলি আছে। ইফালে এই ঘটনাই স্থানীয় ৰাইজৰ মাজত আতংকৰ সৃষ্টি কৰিছে।
