নেপালত পুনৰ সংঘটিত হৈছে বিমান দুৰ্ঘটনা (Flight Crashed)। বুধবাৰে নেপালৰ কাঠমাণ্ডুৰ ত্ৰিভুৱন আন্তঃৰাষ্ট্ৰীয় বিমানবন্দৰৰ পৰা উৰণৰ কিছু সময়ৰ পিছতে সূৰ্য এয়াৰলাইন্সৰ এখন বিমান দুৰ্ঘটনাগ্ৰস্ত হয়। ক্ৰু আৰু যাত্ৰীকে ধৰি মুঠ ১৯ জন লোকক লৈ উৰামৰা বিমানখনত অগ্নিকাণ্ড সংঘটিত হয়।
লগে লগে বিমানখন ক’লা ধোঁৱাই আৱৰি ধৰে। বিমানবন্দৰৰ কৰ্মচাৰী আৰু নিৰাপত্তাৰক্ষীয়ে ততাতৈয়াকৈ উদ্ধাৰৰ কাম আৰম্ভ কৰে। সম্প্ৰতি বিমানবন্দৰটোৰ সেৱা বন্ধ কৰি দিয়া হৈছে।
বুধবাৰে পুৱা বিমানখনে উৰামৰাৰ সময়ত বতৰ বেয়া আছিল। উৰণৰ কিছু সময়ৰ পিছতে যাত্ৰীবাহী বিমানখনত অগ্নিকাণ্ড সংঘটিত হয়। টি আই এৰ মুখপাত্ৰ প্ৰেমনাথ ঠাকুৰে জনোৱা মতে, পুৱা প্ৰায় ১১ বজাত সংঘটিত হয় এই দুৰ্ঘটনা। লগে লগে উদ্ধাৰৰ কাম আৰম্ভ হয়। বিমানখনত থকা লোকসকলক উদ্ধাৰ কৰা হৈছে। আনহাতে, পাইলটজনকো উদ্ধাৰ কৰি স্থানীয় চিকিৎসালয়লৈ লৈ যোৱা হয়। অগ্নিনিৰ্বাপক বাহিনী আৰু আৰক্ষীয়ে অব্যাহত ৰাখিছে উদ্ধাৰ অভিযান।
জানিব পৰা মতে, পাইলট মনীষ শাক্যক সংকটজনক অৱস্থাত উদ্ধাৰ কৰা হয়। তেওঁক শিনামংগলৰ এখন চিকিৎসালয়লৈ লৈ যোৱা হয়। বিভিন্ন সূত্ৰৰ তথ্য অনুসৰি, কমেও ১৩ জন যাত্ৰীৰ মৃত্যু হৈছে। উদ্ধাৰ হৈছে তেওঁলোকৰ মৃতদেহ।
ইফালে দক্ষিণ এছিয়া টাইমছৰ বাতৰি অনুসৰি, বিমানখন ৰাণৱেৰ পৰা ছিটিকি পৰে। শেহতীয়া তথ্য অনুসৰি, ১৯ জন লোকৰ ভিতৰত ১৮ জনৰ মৃত্যু হয়।
উল্লেখ্য যে ২০১০ চনৰ পৰা নেপালত এটাৰ পিচত আন এটা বৃহৎ বিমান দুৰ্ঘটনা সংঘটিত হৈ আহিছে। বিগত ১৪ বছৰত কমেও ১২টা এনে দুৰ্ঘটনা সংঘটিত হৈছে, য’ত বহু লোকে প্ৰাণ হেৰুৱাইছে। চলিত বৰ্ষৰ জানুৱাৰী মাহতো য়েটি এয়াৰলাইন্সৰ এখন বিমান উৰণৰ পিছতে দুৰ্ঘটনাগ্ৰস্ত হৈছিল। পোখাৰাত অগ্নিকাণ্ড সংঘটিত হৈ বিমানখন দুৰ্ঘটনাগ্ৰস্ত হয়। উক্ত বিমানখনত মুঠ ৭২ জন লোক আছিল আৰু সকলোৰে মৃত্যু হয়।
