অসমৰ নতুন ৰাজ্যপাল হিচাপে শপত (Sworn in as new Governor of Assam) গ্ৰহণ লক্ষ্মণ প্ৰসাদ আচাৰ্য (Laxman Prasad Acharya)ৰ। গুৱাহাটীৰ শ্ৰীমন্ত শংকৰদেৱ কলাক্ষেত্ৰ (Srimanta Sankaradeva Kalakshetra)ৰ আন্তৰ্জাতিক প্ৰেক্ষাগৃহত আয়োজিত এক অনুষ্ঠানত গুৱাহাটী হাইকোৰ্টৰ মুখ্য ন্যায়াধীশ বিজয় বিষ্ণয়ে (High Court Chief Justice Vijay Bishnoy) নতুন ৰাজ্যপালক শপতবাক্য পাঠ কৰায়। আনহাতে, ৰাষ্ট্ৰপতিৰ নিযুক্তি-পত্র পাঠ কৰে ৰাজ্য চৰকাৰৰ মুখ্য সচিব ৰবি কোটাই। শপত গ্ৰহণ অনুষ্ঠানত পত্নীসহ মুখ্যমন্ত্রী ডঃ হিমন্ত বিশ্ব শৰ্মাৰ উপৰি কেইবাগৰাকী মন্ত্রী-বিধায়ক তথা চৰকাৰী বিষয়া উপস্থিত থাকে।
উল্লেখ্য যে লক্ষ্মণ প্ৰসাদ আচাৰ্যক অসমৰ লগতে মণিপুৰৰ ৰাজ্যপালৰ দায়িত্বও প্ৰদান কৰা হৈছে। ছিকিমৰ ৰাজ্যপাল হিচাপে কাৰ্যনিৰ্বাহ কৰি অহা লক্ষ্মণ প্ৰসাদ আচাৰ্য উত্তৰ প্ৰদেশৰ বাসিন্দা আৰু আৰ এছ এছ তথা ভাৰতীয় জনসংঘৰ এগৰাকী সক্ৰিয় সদস্য আছিল। আনহাতে, গঠনৰ সময়ৰে পৰাই তেওঁ বিজেপিৰ সদস্য হিচাপে সক্ৰিয় ৰাজনীতিত অংশগ্ৰহণ কৰি আহিছে।
