ৰাজ্যৰ বিভিন্ন প্ৰান্তৰ লগতে বহিঃ ৰাজ্যত উচ্ছেদিত তথা সন্ত্ৰাসিত লোকে আশ্ৰয় গ্ৰহণ কৰিছে কাৰ্বি আংলং (Karbi Anglong) জিলাত। আজি ডিফুত এক সংবাদমেল (Press conference in Diphu)ৰ আয়োজন কৰি এই অভিযোগ উত্থাপন কৰিছে কাৰ্বি ছাত্ৰ সন্থা (Karbi Students Union)ই। সংগঠনটোৰ সভাপতি মিৰজেং ক্ৰʼই আজিৰ সংবাদমেলত উল্লেখ কৰা অনুসৰি শেহতীয়াকৈ কাৰ্বি আংলং জিলাৰ সিংহাসনৰ খনবামন এলেকা, ডিফুৰ পানবাৰী, ৰংনিহাং-২, বৰলাংফেৰ, খটখটী আদি এলেকাত একাংশ অচিনাক্ত তথা সন্দেহজনক লোকে অনুপ্ৰৱেশ আৰম্ভ কৰিছে।
বিগত ৩-৪ টা দিনত সংগঠনটোৱে বিহাৰ, মণিপুৰ, ধুবুৰী, সোনাপুৰ আদি ঠাইৰ পৰা অহা এনে কেতবোৰ লোকক আটক কৰিবলৈ সক্ষম হৈছে। এইসকল লোক সংশ্লিষ্ট এলেকাৰ পৰা উচ্ছেদিত অথবা হিংসাত্মক পৰিস্থিতিৰ বাবে পাহাৰীয়া জিলাখনত আশ্ৰয় লোৱা বুলি সংগঠনটোৱে অনুমান ব্যক্ত কৰে।
বিহাৰৰ পৰা অহা চাৰিজন এনে অনুপ্ৰবেশকাৰী একাংশৰ হাতত আনকি ভুৱা প্ৰমাণপত্ৰ আৰু ডমিচিল চাৰ্টিফিকেট লাভ কৰা বুলিও কাৰ্বি ছাত্ৰ সন্থাৰ সভাপতি গৰাকীয়ে অৱগত কৰে। কোনো অচিনাক্ত লোকে অনুপ্ৰৱেশকাৰী সকলক এনে ভুৱা নথি-পত্ৰৰ যোগান ধৰা বুলি মন্তব্য কৰি এই সন্দৰ্ভত সংশ্লিষ্ট কৰ্তৃপক্ষক অৱগত কৰোৱা বুলি উল্লেখ কৰে। আনহাতে, খটখটী আৰু ডিফুৰ বিভিন্ন স্থানত ধুবুৰী আৰু সোনাপুৰৰ পৰা উচ্ছেদিত হোৱা একাংশ লোকে আশ্ৰয় লোৱাৰ বিপৰীতে মণিপুৰৰ হিংসাত্মক পৰিস্থিতিৰ পৰিপ্ৰেক্ষিতত ৰাজ্যখনৰ পৰা আহি সিংহাসনৰ খনবামন এলেকাত একাংশ লোকে আশ্ৰয় লোৱাৰ তথ্য লাভ কৰা বুলি ছাত্ৰনেতাগৰাকীয়ে জানিবলৈ দিয়ে।
কাৰ্বি আংলঙৰ ৰাইজক এনে অনুপ্ৰবেশ সন্দৰ্ভত সজাগ হোৱাৰ লগতে এনে কোনো তথ্য পালেই লগে লগে সন্থাক অৱগত কৰোৱাৰ আহ্বান জনায়। কাৰ্বি ছাত্ৰ সন্থাই স্থানীয় লোকৰ সহযোগত উক্ত ঠাইসমূহ ভ্ৰমণ কৰি এনে অনুপ্ৰবেশকাৰীক চিনাক্ত কৰাৰ চেষ্টা চলাব বুলি সংবাদ মেলত কয়। এনে লোকক কোনো কাৰণতে আশ্ৰয় প্ৰদান নকৰিবলৈ সংগঠনটোৱে জিলাবাসীক আহ্বান জনায়। সোনাপুৰৰ উচ্ছেদ অভিযানৰ বাবে চৰকাৰৰ পদক্ষেপক আদৰণি জনাই ছাত্ৰ সংগঠনটোৱে ঠিক সেইদৰে কাৰ্বি আংলং জিলাৰ পিজিআৰ-ভিজিআৰ এলেকাটো অনুৰূপ ধৰণে উচ্ছেদ অভিযান চলোৱাৰ আহ্বান জনায়।
আনহাতে, জিলাখনত দীৰ্ঘদিন ধৰি দৰমহাৰ পৰা বঞ্চিত হৈ থকা টেট শিক্ষকসকলৰ দৰমহা শীঘ্ৰেই মুকলি কৰি দিয়াৰ বাবে সভাপতি ক্ৰʼই কাৰ্বি আংলং স্বায়ত্বশাসিত পৰিষদক দাবী জনায়। একাংশ শিক্ষকে দৰমহাৰ অভাৱৰ বাবে শ্ৰেণী বৰ্জনৰ প্ৰসংগ উল্লেখ কৰি সমাগত ছমহীয়া পৰীক্ষাৰ পৰিপ্ৰেক্ষিতত ছাত্ৰ-ছাত্ৰীসকলৰ ক্ষতিৰ প্ৰতি লক্ষ্য ৰাখি শ্ৰেণী বৰ্জনৰ সিদ্ধান্ত বৰ্জনৰ আহ্বান জনায়। দৰমহা বঞ্চিত শিক্ষকসকলক প্ৰাপ্য দৰমহা লাভৰ ক্ষেত্ৰত ছাত্ৰ সংগঠনটোৱে সহযোগিতা আগবঢ়াই যাব বুলি সভাপতি ক্ৰʼৱে সংবাদমেলত উল্লেখ কৰে।
