কাৰাগাৰত বন্দী গেংষ্টাৰ লৰেন্স বিষ্ণয়ৰ ভাতৃ আনমোল বিষ্ণয়ৰ (Anmol Bishnoi) বিষয়ে তথ্য প্ৰদান কৰিলে নগদ ধনৰ পুৰস্কাৰ ঘোষণা কৰিছে ৰাষ্ট্ৰীয় তদন্ত সংস্থা, নিয়াই। আনমোলক ধৰাই দিব পাৰিলে ১০ লাখ টকাৰ পুৰস্কাৰ দিয়া হ’ব বুলি জানিবলৈ দিয়ে।
ইয়াৰ মাজতে দিল্লী আৰক্ষীয়ে জনোৱা মতে, বিগত ৪৮ ঘণ্টাত দেশৰ বিভিন্ন চহৰত লৰেন্স বিষ্ণয় গেঙৰ ৭ জন বন্দুকধাৰীক গ্ৰেপ্তাৰ কৰা হৈছে। ছলমান খানৰ ঘৰৰ সন্মুখত গুলীচালনা কৰাৰ লগতে এন চি পি নেতা বাবা ছিদ্দিকীক হত্যা কৰাৰ অভিযোগত গ্ৰেপ্তাৰ হয়।
ইয়াৰ পূৰ্বে আনমোল ওৰফে ভানুৰ বিৰুদ্ধে পঞ্জাবী গায়ক সিদ্ধু মুছেৱালাৰ হত্যাকাণ্ডত সহায় কৰা, অভিনেতা ছলমান খানৰ ঘৰৰ সন্মুখত গুলীচালনা কৰাকে ধৰি বিভিন্ন অপৰাধমূলক কামত জড়িত থকাৰ অভিযোগ উত্থাপন হৈছিল। ভুৱা পাছপ’ৰ্টৰ সহায়ত দেশ এৰি পলায়ন কৰাৰ অভিযোগো আছে লৰেন্সৰ ভাতৃৰ বিৰুদ্ধে। ইয়াৰ উপৰি ২০২২ চনত ৰুজু হোৱা দুটা গোচৰৰ চাৰ্জশ্বীটত আনমোলকে ধৰি ১৪জন লোকৰ নাম উল্লেখ কৰা হৈছে।
তদন্তকাৰী সংস্থাটোৰ মতে, আনমোলে জনপ্ৰিয় ব্যৱসায়ী, গায়ক, অভিনেতা আদি হত্যাৰ পৰিকল্পনা কৰিছিল। তদন্তকাৰী সংস্থাটোৱে অভিযোগনামাত প্ৰকাশ কৰিছে যে তেওঁ পাকিস্তানৰ বিভিন্ন সন্ত্ৰাসবাদী নেতা আৰু খালিস্তানৰ সমৰ্থকৰ সৈতে জড়িত।
আনহাতে, শুকুৰবাৰে দিল্লী আৰক্ষীয়ে জনোৱা মতে, পঞ্জাৱ, হাৰিয়ানা, ৰাজস্থান আৰু দিল্লীত তালাচী চলাই লৰেন্স বিষ্ণয়ৰ দলটোৰ ৭ জন বন্দুকধাৰীক গ্ৰেপ্তাৰ কৰা হৈছে। ৪৮ ঘণ্টীয়া অভিযানত কেইবাটাও অস্ত্ৰ-শস্ত্ৰও উদ্ধাৰ কৰা হয়।
আৰক্ষীয়ে দাবী কৰিছে যে ছলমান খানৰ ঘৰৰ সন্মুখত সংঘটিত হোৱা গুলীচালনা আৰু বাবা ছিদ্দিকীৰ হত্যাকাণ্ডৰ সৈতে তেওঁলোকৰ সম্পৰ্ক আছে। অনাগত দিনত আক্ৰমণৰ বাবে তেওঁলোকৰ হাতত এখন তালিকাও সাজু আছিল। এই অভিযুক্তসকল আন কোনো অপৰাধৰ সৈতে জড়িত আছে নেকি সেই বিষয়েও তদন্ত চলি আছে।
