মহাৰাষ্ট্ৰৰ প্ৰাক্তন মন্ত্ৰী তথা এন চি পি নেতা বাবা ছিদ্দিকীৰ হত্যাকাণ্ড (Baba Siddiqui’s murder)ৰ অন্যতম প্ৰধান অভিযুক্ত শিৱকুমাৰ (Main accused Shivakumar)ক দেওবাৰে আৰক্ষীয়ে গ্ৰেপ্তাৰ (Police arrested) কৰে। মূল ঘটনাটোৰ পিছত ২৯ দিন ধৰি আৰক্ষীৰ চকুত ধূলি মাৰি তেওঁ পলাই আছিল। আৰক্ষীয়ে জনোৱা মতে, মুম্বাইৰ গেংষ্টাৰ লৰেন্স বিষ্ণয়ৰ ভাতৃ আনমোল বিষ্ণয়ে তেওঁৰ সৈতে নিয়মীয়াকৈ সংস্পৰ্শত আছিল। নেপাললৈ পঠিয়াবলৈও পৰিকল্পনা কৰিছিল। কিন্তু তাৰ পূৰ্বেই শিৱকুমাৰ ধৰা পৰে।
যোৱা ১২ অক্টোবৰত দশেৰা উৎসৱৰ সময়ত বান্দ্ৰাত ছিদ্দিকীক গুলীয়াই হত্যা কৰা হৈছিল। ঘটনাস্থলীত তিনিজন আক্ৰমণকাৰীয়ে তেওঁক গুলীচালনা কৰে। তাৰে দুজনক মুম্বাই আৰক্ষীয়ে গ্ৰেপ্তাৰ কৰে। কিন্তু শিৱকুমাৰ পলাই আছিল। তদন্তকাৰীয়ে দাবী কৰিছে যে ছিদ্দিকী হত্যাৰ সময়ত শিৱকুমাৰেই গুলী চলাইছিল। উত্তৰ প্ৰদেশৰ বাহৰেইচৰ পৰা তেওঁক গ্ৰেপ্তাৰ কৰা হয়। উত্তৰ প্ৰদেশ আৰক্ষীয়েও মুম্বাই আৰক্ষীৰ লগতে এই গোচৰত সহায় কৰে।
দেওবাৰে আৰক্ষীয়ে শিৱকুমাৰৰ লগতে আন চাৰিজন লোকক গ্ৰেপ্তাৰ কৰে। আটাইকেইজনে অভিযুক্তক পলায়ন কৰাত সহায় কৰিছিল বুলি অভিযোগ উঠিছে। তাৰ সমান্তৰালকৈ তেওঁলোক কিবা নহয় কিবা প্ৰকাৰে ছিদ্দিকীক হত্যাৰ মূল চক্ৰান্তত জড়িত হৈ পৰিছিল। উত্তৰ প্ৰদেশৰ এছটিএফৰ ডেপুটি-এছপি প্ৰমেশ শুক্লাই কয়, “শিৱকুমাৰ আনমোল বিষ্ণয়ৰ সংস্পৰ্শত আছিল। প্ৰায়ে স্নেপচাটৰ জৰিয়তে কথা পাতিছিল। হত্যাৰ পৰিকল্পনা কাৰ্যকৰী কৰিবলৈ শিৱকুমাৰ আৰু তেওঁৰ সহযোগীসকলক আগ্নেয়াস্ত্ৰ, কাৰ্টিজ, একাধিক ছীম কাৰ্ড আৰু মোবাইল ফোন দিয়া হৈছিল। শুভম লংকৰ আৰু মহম্মদ ইয়াচিন আখতাৰে তেওঁলোকক এইবোৰ দিছিল।” উল্লেখ্য যে ছিদ্দিকী হত্যাকাণ্ডৰ চক্ৰান্তৰ আঁৰৰ অন্যতম মূল ব্যক্তি শুভম বুলি আৰক্ষীয়ে প্ৰকাশ কৰিছে। এতিয়াও তেওঁ পলাতক। দেশৰ বিভিন্ন প্ৰান্তত তেওঁক বিচাৰি আৰক্ষীয়ে অভিযান চলাই আছে।
আৰক্ষীয়ে জনোৱা মতে, শিৱকুমাৰে ছিদ্দিকীক হত্যা কৰাৰ বাবে ১২ অক্টোবৰৰ নিশাটো বাছি লৈছিল। কাৰণ তেওঁলোকে ভাবিছিল যে উৎসৱমুখৰ পৰিৱেশত হত্যা কৰি পলায়ন কৰাটো সহজ হ’ব। কিন্তু ঘটনাস্থলীৰ পৰাই আৰক্ষীয়ে আটক কৰে দুই দুর্বৃত্তক। শিৱকুমাৰে কেনেবাকৈ তাৰ পৰা পলাবলৈ সক্ষম হয়। আন দুজন আক্ৰমণকাৰী হৈছে ধমৰৰাজ কাশ্যম আৰু গুৰমেল সিং।
ঘটনাস্থলীৰ পৰা পলায়ন কৰাৰ পিছত শিৱকুমাৰে মোবাইল ফোনটো ভাঙি পেলায়। ইয়াৰ পিছত তেওঁ পোনে পোনে পুনেলৈ যায়। তাৰ পৰা ঝান্সী হৈ লক্ষ্ণৌলৈ যায়। ইয়াৰ পিছত তেওঁ বাহৰেচলৈ যায়। তাৰ পৰাই তেওঁ নেপাললৈ পলায়নৰ পৰিকল্পনা কৰিছিল। আৰক্ষীৰ তথ্য অনুসৰি, এই ২৯ দিন শিৱকুমাৰ আনমোলৰ সংস্পৰ্শত আছিল। তেওঁৰ নিৰ্দেশতে বিভিন্ন ঠাইত আশ্ৰয় লৈছিল। ধৃত ধমৰৰাজৰ ককায়েক অনুৰাগ কাশ্যপেও তেওঁক এই কামত সহায় কৰিছিল। দেওবাৰে শিৱকুমাৰৰ সৈতে তেওঁকো গ্ৰেপ্তাৰ কৰে আৰক্ষীয়ে।
উল্লেখ্য যে ছিদ্দিকী হত্যাকাণ্ডৰ সৈতে জড়িত ২৩ জন লোকক আৰক্ষীয়ে এতিয়ালৈকে গ্ৰেপ্তাৰ কৰিছে। এতিয়াও বিচাৰি আছে শুভম লংকৰ আৰু জীশান আখতাৰক। জিশানো অন্যতম প্ৰধান চক্ৰান্তকাৰী। তদন্তকাৰীয়ে দাবী কৰিছে যে তেওঁ গুলীচালনা কৰা লোকসকললৈ ধন প্ৰেৰণ কৰিছিল।
