শুকুৰবাৰে নিশাটো জে’লত কটোৱাৰ পিছত শনিবাৰে পুৱা মুকলি আকাশৰ তললৈ ওলাই আহে তেলেগু ছুপাৰষ্টাৰ আল্লু অৰ্জুন (Allu Arjun)। শুকুৰবাৰে তেলেংগানাৰ নিম্ন আদালতে তেওঁক ১৪ দিনৰ কাৰাদণ্ডৰ নিৰ্দেশ দিছিল।
পিছত উচ্চ ন্যায়ালয়ে তেওঁক অন্তৱৰ্তীকালীন জামিন মঞ্জুৰ কৰে যদিও আইনী প্ৰক্ৰিয়া সম্পূৰ্ণ নোহোৱাত তেওঁ নিশাটো জে’লতে থাকিবলগা হয়। তেওঁক হায়দৰাবাদৰ চাঞ্চলগুৰা কাৰাগাৰত ৰখা হৈছিল। তাৰ পৰা মুকলি হৈ আল্লু অৰ্জুন শনিবাৰে পুৱা ঘৰলৈ যায়।
পুৱা প্ৰায় ৬.৩৫ বজাত চাঞ্চলগুৰা জে’লৰ পিছফালৰ দুৱাৰেদি ওলাই অহা দেখা গ’ল আল্লু অৰ্জুনক। তেওঁৰ পিতৃ আল্লু অৰবিন্দ আৰু শহুৰেক কাঞ্চাৰলা চন্দ্ৰশেখৰ ৰেড্ডীয়ে তেওঁক ঘৰলৈ নিবলৈ আহে।
তেওঁলোকৰ সৈতে অভিনেতাগৰাকীয়ে নিজৰ জুবিলী হিলছৰ ঘৰলৈ উভতি যায়। ইফালে অন্তৱৰ্তীকালীন জামিন লাভ কৰাৰ পিছতো অভিনেতাগৰাকীক শুকুৰবাৰে নিশা কিয় জে’লৰ পৰা মুকলি কৰি দিয়া নহ’ল বুলি তেওঁৰ অধিবক্তাই অসন্তুষ্টি প্ৰকাশ কৰে।
উচ্চ ন্যায়ালয়ৰ নিৰ্দেশৰ প্ৰতিলিপি কাৰাগাৰ কৰ্তৃপক্ষই নিশাৰ ভিতৰতে লাভ কৰাৰো অভিযোগ উত্থাপন কৰে। কিন্তু ইয়াৰ পিছতো তেওঁক বিভিন্ন অজুহাত দেখুৱাই মুকলি কৰি দিয়া নহ’ল বুলি অভিযোগ তুলিছে। ইয়াৰ বিৰুদ্ধে আইনী ব্যৱস্থা গ্ৰহণ কৰা হ’ব বুলিও আল্লুৰ অধিবক্তাই জানিবলৈ দিয়ে।
উল্লেখ্য যে ৫ ডিচেম্বৰত মুক্তি পায় আল্লু অৰ্জুনৰ ব্লক ব্লাষ্টাৰ ছবি ‘পুষ্পা ২: দ্য ৰুল’। ইয়াৰ পূৰ্বে ৪ ডিচেম্বৰৰ নিশা হায়দৰাবাদত ছবিখনৰ প্ৰিমিয়াৰত এক দুৰ্ঘটনা সংঘটিত হয়। প্ৰিমিয়াৰ উপলক্ষে আল্লুৱে নিজে সন্ধ্যা থিয়েটাৰত উপস্থিত হয়। সেই সময়ত তেওঁক চাবলৈ তাত বহু অনুৰাগীয়ে ভিৰ কৰে।
কিন্তু পৰিস্থিতি নিয়ন্ত্ৰণৰ বাহিৰলৈ যোৱাত পদপিষ্ট হৈ মৃত্যু হয় এগৰাকী মহিলাৰ। উক্ত ঘটনাত হায়দৰাবাদ আৰক্ষীয়ে আল্লুৰ বিৰুদ্ধে এফআইআৰ দাখিল কৰে আৰু শুকুৰবাৰে তেওঁক গ্ৰেপ্তাৰ কৰা হয়।
আনহাতে, আল্লুক গ্ৰেপ্তাৰ কৰিবলৈ জুবিলী হিলছৰ ঘৰলৈ যায় আৰক্ষী।
অভিযোগ অনুসৰি, অভিনেতাজনক কাপোৰ সলনি কৰিবলৈও সময় দিয়া হোৱা নাছিল। হঠাৎ তেওঁৰ শোৱনি কোঠালৈ সোমাই যায় আৰক্ষী। আল্লুৱে পুৱাৰ আহাৰ শেষ নকৰাকৈয়ে আহিবলগা হয়। আৰক্ষীৰ এই আচৰণত তেওঁ অসন্তুষ্টিও প্ৰকাশ কৰে।
তাৰ পিছত তেওঁক শুকুৰবাৰে নিম্ন আদালতত হাজিৰ কৰা হয়। তাৰ পৰাই তেওঁক ১৪ দিনৰ কাৰাদণ্ডৰ নিৰ্দেশ দিয়া হয়। সেই সময়ত আল্লুৱে গ্ৰেপ্তাৰৰ প্ৰত্যাহ্বান জনাই তেলেংগানা উচ্চ ন্যায়ালয়ৰ কাষ চাপে আৰু তেওঁৰ বিৰুদ্ধে থকা এফআইআৰ খাৰিজ কৰিবলৈ আবেদন জনায়।
অৱশ্যে পৰৱৰ্তী সময়ত তেওঁ উচ্চ ন্যায়ালয়ৰ পৰা চাৰি সপ্তাহৰ অন্তৱৰ্তীকালীন জামিন লাভ কৰে। ৫০ হাজাৰ টকাৰ বণ্ডত জামিন লাভ কৰে অভিনেতাজনে। উচ্চ ন্যায়ালয়ে কয় যে আল্লুৱে গোচৰৰ পৰা সম্পূৰ্ণ সকাহ পাবলৈ নিম্ন আদালতত আবেদন কৰিব লাগিব।
