ভাৰত আৰু পাকিস্তানৰ (Pak India War) মাজত আৰম্ভ হৈছে অঘোষিত যুদ্ধ৷ ৭ মে’ত ভাৰতে পাকিস্তান আৰু পাক অধিকৃত কাশ্মীৰত সন্ত্ৰাসবাদী ঘাটিক লক্ষ্য কৰি চলোৱা মিছাইল আক্ৰমণৰ পিছতে দুয়োখন দেশৰ মাজৰ পৰিস্থিতি উত্তেজনাপূৰ্ণ হৈ পৰিছে।
আনহাতে, বিগত প্ৰায় ১০ দিন ধৰি পাকিস্তানে সীমান্তত যুদ্ধবিৰতি চুক্তি উলংঘন কৰি আহিছে। ইয়াৰ মাজতে শেহতীয়াভাৱে বৃহস্পতিবাৰে নিশা পাকিস্তানে জম্মুত কৰে ৰকেট আক্ৰমণ।
জম্মু বিমানবন্দৰকে ধৰি কেইবাটাও স্থানত পাকিস্তানে আকাশমাৰ্গেৰে আক্ৰমণ কৰে। অৱশ্যে ভাৰতীয় এই আক্ৰমণ প্ৰতিহত কৰে যদিও জম্মুত যথেষ্ট পৰিমাণৰ ক্ষয়-ক্ষতিৰ খবৰ আহিছে। এনে পৰিস্থিতিত ভাৰতেও পাকিস্তানক যোগ্য প্ৰত্যুত্তৰ আগবঢ়াবলৈ সাজু হৈছে।
তাৰ মাজতে অসমৰ মুখ্যমন্ত্ৰী ডঃ হিমন্ত বিশ্ব শৰ্মাই এক গুৰুত্বপূৰ্ণ আহ্বান জনাইছে। বৰ্তমান অসমত চলি আছে ব’হাগ বিহুৰ বতৰ। ৰাজ্যৰ বিভিন্ন প্ৰান্তত অনুষ্ঠিত হৈ আছে বিহু অনুষ্ঠান। কিন্তু ভাৰত-পাক সীমান্তত সংঘটিত পাক আক্ৰমণত বহু নিৰীহ লোকে প্ৰাণ হেৰুৱাবলগা হোৱা ঘটনাৰ বাবে মুখ্যমন্ত্ৰীয়ে বিহু সমিতিসমূহলৈ বিশেষ বাৰ্তা প্ৰদান কৰিছে।
সামাজিক মাধ্যমযোগে মুখ্যমন্ত্ৰীয়ে এই অসমবাসীলৈ এই বাৰ্তা প্ৰেৰণ কৰিছে। মুখ্যমন্ত্ৰীয়ে শুকুৰবাৰে সামাজিক মাধ্যমযোগে ১০ মে’ৰ পৰা ৰাজ্যত সকলো বিহু অনুষ্ঠান বাতিল কৰিবলৈ আহ্বান জনাইছে। দেশৰ সাম্প্ৰতিক পৰিস্থিতিৰ পৰিপ্ৰেক্ষিতত মুখ্যমন্ত্ৰীয়ে ৰঙালী বিহুৰ সকলো অনুষ্ঠান বাতিল কৰিবলৈ আহ্বান জনাইছে।
বাৰ্তাটোত মুখ্যমন্ত্ৰীয়ে কয়, “বিগত এমাহত আমি অসংখ্য সাংস্কৃতিক অনুষ্ঠানৰ জৰিয়তে সমগ্ৰ অসমতে আনন্দ-উৎসাহেৰে আমাৰ প্ৰাণৰো প্ৰাণৰ বিহুটি উদযাপন কৰিছোঁ। এই অনুষ্ঠানসমূহত আপোনালোক সকলোৰে সক্ৰিয় অংশগ্ৰহণ আৰু অৱদানৰ বাবে আন্তৰিকতাৰে ধন্যবাদ জনাইছোঁ।”
তেওঁ লগতে কয়, “কিন্তু এতিয়া এই উদযাপন সামৰাৰ সময় আহি পৰিছে। আমি বিনম্ৰতাৰে আহ্বান জনাব বিচাৰিছোঁ যে অহা ১০ মে’ৰ পৰা পূৰ্ব নিৰ্ধাৰিত বাকী থকা সকলো অনুষ্ঠান সৌজন্যতাৰে বাতিল কৰা হওক। আহক, আমি এই সুন্দৰ তথা বৰ্ণাঢ্য উদযাপনৰ ইমানতে সামৰণি পেলাই ঐক্য আৰু সংহতিৰ চানেকি দাঙি ধৰোঁ৷”
