ভাৰতৰ বৈদেশিক সচিব বিক্ৰম মিশ্ৰীয়ে (Vikrant Misri) এক্স একাউণ্ট লক কৰিছে । শেহতীয়াকৈ তেওঁক কেন্দ্ৰ কৰি অনলাইন আক্ৰমণ আৰু পৰিয়ালৰ প্ৰতি কৰা জঘন্য মন্তব্যৰ বাবে এই পদক্ষেপ লোৱা বুলি কোৱা হৈছে।
আনহাতে, এই ঘটনা সন্দৰ্ভত এআইএমআইএমৰ সভাপতি আছাদুদ্দিন ওৱাইছিয়ে কয়, “বিক্ৰম মিশ্ৰী এজন সৎ, কঠোৰ পৰিশ্ৰমী আৰু দেশপ্ৰেমিক কূটনীতিবিদ। মনত ৰখাটো গুৰুত্বপূৰ্ণ যে সিদ্ধান্ত আমোলাৰ নহয়, ৰাজনৈতিক নেতৃত্বৰ।”
কংগ্ৰেছৰ কেৰালা শাখাই এক বিবৃতিত কয়, “হিমাংশী নাৰৱালৰ পিছত এতিয়া বিক্ৰম মিশ্ৰী লক্ষ্য। যুদ্ধ শ্বহীদৰ পত্নীক কেৱল ‘ঘৃণা নাই, হিংসা নাই’ বুলি আক্ৰমণ কৰা হৈছিল। এতিয়া মিশ্ৰীক এনেদৰে দোষাৰোপ কৰা হৈছে যেন তেওঁ অকলেই যুদ্ধবিৰতিৰ সিদ্ধান্ত লৈছিল। আচলতে মোডীৰ আই টি চেলৰ সৃষ্টি এতিয়া তেওঁৰ বিৰুদ্ধে গৈ আছে।”
উল্লেখ্য যে বৈদেশিক সচিব হিচাপে বিক্ৰম মিশ্ৰীয়ে ‘অপাৰেচন সিন্দুৰ’ৰ সময়ত পাকিস্তানৰ বিৰুদ্ধে কঠোৰভাৱে মাত মাতিছিল। মুম্বাই আক্ৰমণৰ তদন্তত পাকিস্তানে সহযোগ নকৰা আৰু ভাৰতীয় গণতন্ত্ৰৰ শক্তিক লৈ তেওঁৰ মন্তব্য বিশেষভাৱে প্ৰশংসা কৰা হৈছে।
দিল্লীৰ হিন্দু কলেজ আৰু জামছেদপুৰৰ এক্সএলআৰআইত শিক্ষা গ্ৰহণ কৰি আইএফএছত যোগদান কৰাৰ পূৰ্বে মিশ্ৰীয়ে বিজ্ঞাপন জগতত কাম কৰিছিল। ২০২৪ চনৰ জুলাই মাহত তেওঁ বৈদেশিক সচিব হিচাপে কাৰ্যভাৰ গ্ৰহণ কৰে।
