ৰাজ্য চৰকাৰৰ কৰ্মচাৰীৰ বাবে প্ৰৱৰ্তন কৰা হৈছে পাঁচ দিনীয়া কৰ্ম সপ্তাহ। এতিয়াৰে পৰা প্ৰতি শনিবাৰ আৰু দেওবাৰে বন্ধ থাকিব চৰকাৰী কাৰ্যালয়। অৱশ্যে ইয়াৰ পৰিৱৰ্তে সপ্তাহৰ বাকী পাঁচ দিনত কৰ্তব্যৰ সময় বৃদ্ধি কৰা হৈছে।
বুধবাৰে সচিবালয়ত এক সংবাদমেলত কেবিনেটৰ বিভিন্ন সিদ্ধান্তৰ কথা ঘোষণা কৰি এই কথা ঘোষণা কৰে ত্ৰিপুৰাৰ পৰ্যটন মন্ত্ৰী সুশান্ত চৌধুৰীয়ে (Sushanta Choudhury)।
ত্ৰিপুৰাৰ পৰ্যটন মন্ত্ৰীগৰাকীয়ে কয় যে নতুন নিয়ম অনুসৰি চৰকাৰী কাৰ্যালয় পুৱা ১০ বজাৰ পৰিৱৰ্তে ৯.৩০ বজাৰ পৰা আৰম্ভ হ’ব। কৰ্মচাৰীসকলে সন্ধিয়া ৫.৩০ বজাৰ পৰিৱৰ্তে সন্ধিয়া ৬ বজালৈকে কাম কৰিব লাগিব।
একে সময়তে গ্ৰুপ-চি আৰু গ্ৰুপ-ডি কৰ্মচাৰীৰ বাবে শেহতীয়াকৈ প্ৰৱৰ্তন কৰা ৰোষ্টাৰ ব্যৱস্থাও প্ৰত্যাহাৰ কৰা হৈছে। ফলত সকলো চৰকাৰী কৰ্মচাৰীয়ে প্ৰতিদিনে কাৰ্যালয়ত উপস্থিত থাকিব লাগিব।
সংবাদমেলত সুশান্ত চৌধুৰীয়েও কয়, “মধ্যপ্ৰাচ্যৰ শেহতীয়া পৰিস্থিতিৰ প্ৰতি লক্ষ্য ৰাখি প্ৰধানমন্ত্ৰী নৰেন্দ্ৰ মোদীয়ে ব্যয় হ্ৰাসৰ আহ্বানৰ পিছত ৰাজ্য চৰকাৰে কেইবাটাও পদক্ষেপ গ্ৰহণ কৰিছে।
ইয়াৰ ভিতৰত ভাৰ্চুৱেলি চৰকাৰী বৈঠক অনুষ্ঠিত কৰা, বৈদ্যুতিক আৰু চিএনজি বাহনৰ ব্যৱহাৰ বৃদ্ধি কৰা, প্ৰশাসনিক পৰ্যায়ত গাড়ীৰ ব্যৱহাৰ হ্ৰাস কৰা, বৃহৎ পৰিসৰৰ ৰাজনৈতিক সমাৱেশৰ পৰা আঁতৰি থকা আদিৰ ওপৰত বিশেষ গুৰুত্ব দিয়া হৈছে।” জানিব পৰা মতে এই সন্দৰ্ভত ইতিমধ্যে বিভিন্ন চৰকাৰী বিভাগলৈ নিৰ্দেশনা প্ৰেৰণ কৰা হৈছে।
