নীট প্ৰশ্নকাকত (NEET question paper) ফাদিল গোচৰ (Leak case)ত এইবাৰ মহাৰাষ্ট্ৰৰ প্ৰশাসনে পুনেত গ্ৰেপ্তাৰ (Arrested in Pune) হোৱা ৰসায়ন বিজ্ঞানৰ অধ্যাপক (Professor of Chemistry) পি ভি কুলকাৰ্ণী (P V Kulkarni)ৰ ঘৰত চলালে বুলড’জাৰ। অধ্যাপকজনৰ ঘৰৰ এটা অংশ বুলড’জাৰেৰে ভাঙি পেলোৱা হয়। স্থানীয় প্ৰশাসনে দাবী কৰিছে যে ঘৰটোৰ উক্ত অংশটো অবৈধভাৱে নিৰ্মাণ কৰা হৈছিল। সেইবাবেই ইয়াক ভাঙি পেলোৱা হৈছে। পৌৰ নিগমে দাবী কৰিছে যে অভিযুক্ত অধ্যাপকগৰাকীৰ ঘৰ ভাঙি পেলোৱা অংশটো নিৰ্মাণৰ বাবে কোনো অনুমতি লোৱা হোৱা নাছিল। ইয়াৰ পিছত অধ্যাপকজনলৈ জাননী পঠিওৱা হয়। জাননীত ঘৰটোৰ উক্ত অংশটো ভাঙি পেলাবলৈ কোৱাৰ লগতে তেওঁক সকীয়াই দিয়াও হয়। অভিযোগ কৰা হৈছে যে তাৰ পিছতো অধ্যাপকগৰাকীয়ে কোনো ব্যৱস্থা গ্ৰহণ কৰা নাছিল। ইয়াৰ পিছত মঙলবাৰে অধ্যাপকজনৰ ঘৰত বুলড’জাৰ উপস্থিত হয়। লগত আছিল পৌৰ নিগমৰ বিষয়াসকল। আৰক্ষী আৰু পৌৰ নিগমৰ বিষয়াৰ উপস্থিতিত অধ্যাপকগৰাকীৰ অবৈধ নিৰ্মাণকাৰ্য ভাঙি পেলোৱা হয়।
উল্লেখ্য যে যোৱা ৩ মে’ত অনুষ্ঠিত নীটৰ অলপ সময়ৰ পিছতে গম পোৱা যায় যে পৰীক্ষাৰ প্ৰশ্নকাকত ফাদিল হৈছে। এই ঘটনাত সমগ্ৰ দেশ স্তম্ভিত হৈ পৰে। ইয়াৰ পিছতে ১২ মে’ত নীট পৰীক্ষা বাতিল কৰাৰ কথা ঘোষণা কৰা হয়। আৰক্ষীয়ে তদন্ত আৰম্ভ কৰি এজনৰ পিছত আনজনকৈ অভিযুক্তক গ্ৰেপ্তাৰ কৰে। এই ঘটনাৰ তদন্ত চিবিআইৰ হাতত অৰ্পণ কৰা হয়। প্ৰশ্নকাকত ফাদিল গোচৰৰ অন্যতম অভিযুক্ত কুলকাৰ্ণীক যোৱা ১৫ মে’ত গ্ৰেপ্তাৰ কৰা হৈছিল। তেওঁ ঘৰতে গোপনে নীটৰ কোচিং দি আছিল। চিবিআইৰ সূত্ৰৰ পৰা জানিব পৰা মতে, ফাদিল হোৱা প্ৰশ্নকাকতখন তেওঁ নিজৰ প্ৰশিক্ষকসকলৰ হাতত লাখ টকাৰ বিনিময়ত গতাই দিয়ে। উল্লেখ্য যে এই অধ্যাপকজন নীটৰ প্ৰশ্নকাকত প্ৰস্তুত কৰিবলৈ গঠন কৰা পেনেলত আছিল।
