এতিয়াৰে পৰা প্লাষ্টিক বা এলুমিনিয়াম ফয়েলৰ পেকেট (Plastic or aluminum foil packet)ত বিক্ৰী কৰিব নোৱাৰিব পাণমচলা (Cannot sell Pan Masala)। ভাৰতীয় খাদ্য সুৰক্ষা আৰু মানক কৰ্তৃপক্ষই এই কথা ঘোষণা কৰিছে। লগতে পাণমচলাৰ পেকেট কিহেৰে তৈয়াৰ কৰিব লাগে সেই কথাও জনাইছে। কেন্দ্রীয় স্বাস্থ্য আৰু কল্যাণ মন্ত্র্যালয়ৰ অধীনস্থ সংস্থাটোৱে এক অধিসূচনা প্রকাশ কৰি পাণমচলাৰ পেকেট কিহৰ পৰা তৈয়াৰ কৰিব লাগে সেই কথা উল্লেখ কৰিছে৷
খাদ্য সুৰক্ষা আৰু মানক (পেকেজিং) নিয়ন্ত্ৰণ নীতি (Food safety and standards (packaging) control policy), ২০১৮ সংশোধন কৰি পাণমচলাৰ সৈতে জড়িত নিয়মসমূহ অন্তৰ্ভুক্ত কৰা হৈছে। এফএছএছএআয়ে খাদ্য সুৰক্ষা আৰু মানক (পেকেজিং) নিয়ন্ত্ৰণ সংশোধনী নীতি, ২০২৬ৰ জৰিয়তে নতুন নিয়মসমূহৰ বিষয়ে অৱগত কৰিছে। সোমবাৰে গেজেট অধিসূচনাও প্ৰকাশ কৰিছে। তাত লিখা আছে যে প্লাষ্টিকৰ বাহিৰে আন যিকোনো সামগ্ৰীৰে তৈয়াৰী পেকেটত পাণমচলা বিক্ৰী কৰিব লাগিব।
পাণমচলাৰ পেকেটবোৰ কাগজ, পেপাৰবোৰ্ড, চেলুল’জ আদি সামগ্ৰীৰে তৈয়াৰ কৰিব লাগে বুলি এফএছএছএআয়ে প্ৰকাশ কৰিছে। কোনো কাৰণতে পেকেজিঙত প্লাষ্টিক ব্যৱহাৰ কৰিব নোৱাৰিব। পাণমচলাৰ পেকেট পলিইথাইলিন, পলিপ্ৰ’পাইলিন, পলিয়েষ্টাৰ, পলিভিনাইল ক্ল’ৰাইডৰ দৰে সামগ্ৰীৰে তৈয়াৰ কৰিব নোৱাৰিব। পাণমচলাৰ পেকেটত এলুমিনিয়াম ফয়েল বা মেটালাইজড লেয়াৰৰ দৰে কোনো বস্তুৰে তৈয়াৰ কৰিব নোৱাৰিব। অৱশ্যে টিন বা কাঁচৰ পাত্ৰত পাণমচলা বিক্ৰী কৰিব পাৰিব।
সংশোধিত নীতিত উল্লেখ আছে যে এতিয়াৰে পৰা প্লাষ্টিক আৱৰ্জনা ব্যৱস্থাপনা নীতি, ২০১৬ আৰু পৰিৱেশ (সুৰক্ষা) আইন, ১৯৮৬ অনুসৰি পাণমচলা পেকেজিং কৰিব লাগিব। তেওঁলোকে ইয়াৰ ওপৰত সাধাৰণ জনতাৰ মতামত জানিব বিচাৰিছিল। তাৰ উত্তৰ বাবে ৬০ দিন দিয়া হয়। সাধাৰণ জনতাৰ মতামত বিবেচনা কৰি চূড়ান্ত সংশোধনী প্ৰকাশ কৰা হৈছে বুলি এফএছএছএআয়ে প্ৰকাশ কৰে।
কিন্তু কেন্দ্রীয় চৰকাৰৰ অধিসূচনাত এই কথাও উল্লেখ আছে যে দেশত কোনো ধৰণৰ পাণমচলা নিষিদ্ধ কৰা হোৱা নাই৷ বৰঞ্চ এইবাৰ ইয়াক কেনেকৈ পেকেজ কৰা হ’ব সেই সম্পৰ্কে নীতি প্ৰস্তুত কৰা হৈছে।
