বালাকোট (Balakoat) বিমান আক্ৰমণৰ সময়ত তেওঁ পাকিস্তানৰ এখন যুদ্ধ বিমান ধ্বংস কৰিছিল। তেওঁৰ বিমানখনো পাকিস্তানৰ মাটিত দুৰ্ঘটনাগ্ৰস্ত হয়। ফলত তেওঁক পাকিস্তানত তিনিদিন ধৰি বন্দী কৰি ৰখা হৈছিল। পিছত ঘৰলৈ উভতি আহি বীৰ চক্ৰ পদক লাভ কৰে। সেনাবাহিনীৰ পৰা অৱসৰ লোৱাৰ পাছত এইবাৰ ভাৰতীয় বায়ুসেনাৰ প্ৰাক্তন গ্ৰুপ কেপ্টেইন অভিনন্দন বৰ্তমানে (Abhinandan Varthaman) নতুন ভূমিকা গ্ৰহণ কৰিছে। সূত্ৰ অনুসৰি, তেওঁ এটা ব্যক্তিগত বিমান কোম্পানীত যোগদান কৰিছে।
পিটিআইৰ সূত্ৰ অনুসৰি, অভিনন্দনে ‘ফ্লাই৯১’ নামৰ এটা বাণিজ্যিক বিমান কোম্পানীত পাইলট হিচাপে যোগদান কৰিছে। জানিব পৰা মতে, যোৱা মাহত তেওঁ গোৱাত এই কোম্পানীত যোগদান কৰিছিল। অৱশ্যে এই সন্দৰ্ভত কোনো মন্তব্য কৰা নাই বিমান কোম্পানীটোৱে। ‘ফ্লাই৯১’ৰ সৈতে যোগাযোগ কৰাত কর্মচাৰীসকলৰ ব্যক্তিগত তথ্য গোপনীয় বুলি জানিবলৈ দিয়ে৷ এই সন্দৰ্ভত তেওঁলোকে কোনো মন্তব্য দিব বিচৰা নাছিল।
২০১৯ চনৰ ২৬ ফেব্ৰুৱাৰীত ভাৰতীয় বায়ুসেনাৰ মিৰাজ-২০০০ যুদ্ধ বিমানে পাকিস্তানৰ খাইবাৰ-পাখতুনখোৱা প্ৰদেশৰ বালাকোট চহৰৰ সমীপত থকা সন্ত্ৰাসবাদী শিবিৰত অভিযান চলাইছিল। ইয়াৰ প্ৰতিক্ৰিয়া স্বৰূপে পিছদিনা ২৭ ফেব্ৰুৱাৰীত পাকিস্তান বায়ুসেনাই ভাৰতীয় আকাশমাৰ্গ উলংঘা কৰি আক্ৰমণ চলায়। সেইদিনা পাকিস্তানী এফ-১৬ যুদ্ধ বিমান ভাৰতীয় আকাশমাৰ্গত প্ৰৱেশ কৰে। অভিনন্দনে মিগ-২১ বাইছন যুদ্ধ বিমানেৰে বিমানখনক খেদি ফুৰি অৱশেষত পাকিস্তানী যুদ্ধ বিমানখন ধ্বংস কৰে। অৱশ্যে তেওঁৰ বিমানখনো দুৰ্ঘটনাগ্ৰস্ত হয়। বিমান দুৰ্ঘটনাগ্ৰস্ত হোৱাৰ আগতেই অভিনন্দন বিমানখনৰ পৰা নামি আহে। তেওঁ বতাহত উৰি গৈ যি ঠাইত পৰিল, সেই ঠাইখন পাকিস্তানৰ ভূখণ্ড আছিল। তাতেই অভিনন্দনক পাকিস্তানী সেনাই বন্দী কৰে। তিনিদিন ধৰি তেওঁক পাকিস্তানে বন্দী কৰি ৰাখিছিল।
তীব্ৰ চাপৰ মাজতো অভিনন্দনে সেই সময়ত বায়ুসেনাৰ কোনো গোপন কথা প্ৰকাশ কৰা নাছিল। অৱশেষত ভাৰত আৰু আন্তঃৰাষ্ট্ৰীয় মহলৰ হেঁচাত পাকিস্তানে তেওঁক মুকলি কৰি দিয়ে। অভিনন্দনক বীৰ চক্ৰৰে সন্মানিত কৰা হয়।
