ভাৰত চৰকাৰৰ তথ্য আৰু সম্প্ৰচাৰ মন্ত্ৰালয়ৰ অধীনৰ কেন্দ্ৰীয় যোগাযোগ ব্যুৰোৰ উদ্যোগত ডিফুত (Diphu) বিশেষ প্ৰচাৰ কাৰ্যসূচী। কেন্দ্ৰীয় যোগাযোগ ব্যুৰো ডিফুৰ উদ্যোগত আৰু ক্লিৰদাপ শংকৰদেৱ শিশু নিকেতনৰ সহযোগত নিকেতনৰ প্ৰেক্ষাগৃহত আজি নিচামুক্ত ভাৰত আৰু বাল্য বিবাহমুক্ত ভাৰত অভিযান সন্দৰ্ভত সমন্বিত যোগাযোগ আৰু প্ৰচাৰ কাৰ্যসূচীৰ আয়োজন কৰা হয়।
ডিফুৰ ক্ষেত্ৰীয় কাৰ্যালয়ৰ ভাৰপ্ৰাপ্ত বিষয়া বিকাশ ৰাজবংশীয়ে সঞ্চালনা কৰা অনুষ্ঠানত মুখ্য অতিথি হিচাপে উপস্থিত থাকে ডিফু চৰকাৰী মহাবিদ্যালয়ৰ ইতিহাস বিভাগৰ মুৰব্বী অধ্যাপক ডঃ কাদম বিনি তেৰাংপী। তেওঁ সুস্থ-সবল সমাজৰ বাবে মাদকদ্ৰব্যৰ অপকাৰিতা আৰু বাল্য বিবাহৰ সামাজিক প্ৰভাৱৰ ওপৰত বিস্তৃত ব্যাখ্যা আগবঢ়ায়। তেওঁ লগতেনিচামুক্ত ভাৰত আৰু বাল্য বিবাহমুক্ত ভাৰত সঁচা অৰ্থত প্ৰতিষ্ঠা কৰিবলৈ এই কাৰ্যসূচীত অংশগ্ৰহণ কৰিবলৈ ছাত্ৰ-ছাত্ৰী তথা অভিভাৱকসকলক আহ্বান জনায়। অনুষ্ঠানত নিকেতনৰ ছাত্ৰ-ছাত্ৰীসকলে কবিতা, গীত পৰিবেশন কৰাৰ লগতে মাদকদ্ৰব্যৰ বদঅভ্যাসে কেনেদৰে এজন ব্যক্তিৰ জীৱন আৰু পৰিয়াল ধ্বংস কৰে তাৰ ওপৰত নাট প্ৰদৰ্শন কৰে।
