বিচ্ছিন্নতাবাদী সংগঠন জম্মু কাশ্মীৰ লিবাৰেশ্যন ফ্ৰণ্টৰ নেতা ইয়াচিন মালিকে এইবাৰ শ্ৰীনগৰ আদালতত শপতনামা দাখিল কৰিছে। ১৯৯০ চনত কাশ্মীৰী পণ্ডিত সম্প্ৰদায়ৰ নাৰ্ছ সৰলা ভাটক ধৰ্ষণ কৰি হত্যা কৰাৰ অভিযোগত বুধবাৰে শ্ৰীনগৰৰ বিশেষ আদালতত ২৫ পৃষ্ঠাৰ শপতনামা দাখিল কৰে। ‘টাইমছ অৱ ইণ্ডিয়া’ৰ তথ্য অনুসৰি, ইয়াছিনে শপতনামাত তেওঁৰ বাবে মৃত্যুদণ্ড বিচাৰিছে। তেওঁ কয় যে তেওঁ এই গোচৰৰ বিৰুদ্ধে যুঁজ নিদিয়ে। একে সময়তে তেওঁ এই হত্যাকাণ্ডত তেওঁৰ কোনো ভূমিকা নাই বুলিও দাবী কৰে।
২০১৯ চনৰ পৰা দিল্লীৰ তিহাৰ কাৰাগাৰত বন্দী য়াছিন। ধৰ্ষণ আৰু হত্যাৰ গোচৰত অভিযুক্ত য়াছিনৰ বিৰুদ্ধে সন্ত্ৰাসবাদক সহায় কৰা আৰু বিচ্ছিন্নতাবাদী কাৰ্যকলাপত জড়িত হোৱাৰ অভিযোগো উত্থাপন হৈছে। তাতে নিম্ন আদালতে ২০২২ চনত তেওঁক যাৱজ্জীৱন কাৰাদণ্ডৰ শাস্তি প্ৰদান কৰে। বৰ্তমান য়াছিন তিহাৰ জেলত বন্দী।
সৰলা হত্যাকাণ্ডৰ ৩৫ বছৰৰ পাছত যোৱা বছৰৰ আগষ্ট মাহত জম্মু-কাশ্মীৰৰ চোৰাংচোৱা সংস্থা ৰাজ্যিক অনুসন্ধান সংস্থাই নতুনকৈ তদন্ত আৰম্ভ কৰিছিল। যোৱা জুন মাহত তদন্তকাৰীয়ে শ্ৰীনগৰৰ আদালতত ৭৩৭ পৃষ্ঠাৰ অভিযোগনামা দাখিল কৰিছিল। এইবাৰ য়াছিনে এই গোচৰত শপতনামা দাখিল কৰে।
টাইমছ অব ইণ্ডিয়াত প্ৰকাশিত বাতৰি অনুসৰি ইয়াছিনে শপতনামাত লিখিছে, ”মোৰ ব্যক্তিগত পৰিস্থিতিৰ প্ৰতি লক্ষ্য ৰাখি বহু চিন্তা-চৰ্চাৰ অন্তত মই এই বিচাৰত অংশগ্ৰহণ নকৰাৰ সিদ্ধান্ত লৈছোঁ। মোক মৃত্যুদণ্ড দিয়া উচিত। অৱশ্যে মোৰ সিদ্ধান্তক অপৰাধ স্বীকাৰোক্তি হিচাপে লোৱা উচিত নহয়।” কাৰাগাৰত থকা বিচ্ছিন্নতাবাদী নেতাগৰাকীয়ে দাবী কৰে যে তেওঁ এই গোচৰত “মিছাকৈ জড়িত কৰা হৈছে”। শপতনামাত তেওঁ কয়, “আদালত বা তদন্তকাৰী সংস্থাৰ বিৰুদ্ধে মোৰ কোনো অভিযোগ নাই। অৱশ্যে ৰাজনৈতিক পৰিস্থিতি আৰু সিদ্ধান্তৰ বাবেই এই গোচৰটো উদ্ভৱ হৈছে বুলি মোৰ বিশ্বাস। এই গোচৰত মোক মিছাকৈ জড়িত কৰা হৈছে বুলি মই বিশ্বাস কৰোঁ।”
য়াছিনে কয় যে সৰলাৰ হত্যাৰ সময়ত তেওঁ গুৰুতৰভাৱে আহত হৈ চিকিৎসাধীন হৈ আছিল। তেওঁ দাবী কৰে, “১৯৯০ চনৰ এপ্ৰিল মাহত সেই সময়ত মই গুৰুতৰভাৱে আহত হৈছিলোঁ। মই অচেতন আছিলোঁ। চিকিৎসা চলি আছিল। ফলত তেওঁ প্ৰতিশোধ ল’বলৈ সৰলা ভাটক হত্যাৰ নিৰ্দেশ দিছিল বুলি উত্থাপন কৰা অভিযোগ সম্পূৰ্ণ মিছা।” শপতনামাত য়াছিনে লগতে দাবী কৰিছে যে অচেতন ব্যক্তিয়ে কেনেকৈ এই অপৰাধ সংঘটিত কৰিব পাৰে সেয়া বুজিব নোৱৰা কথা।
পাকিস্তানী পত্নী মুছাল মালিকৰ পৰাও বিচ্ছিন্ন হোৱাৰ সিদ্ধান্ত লৈছে য়াছিনে। তেওঁৰ দাবী যে তেওঁ এই সিদ্ধান্ত লৈছিল যাতে তেওঁৰ পত্নীয়ে বিধৱাৰ জীৱন যাপন কৰিব নালাগে। য়াচিনে পত্নীলৈ লিখিছে, “তুমি মোতকৈ ২০ বছৰ সৰু। মই নিবিচাৰোঁ যে তুমি মোৰ বোজা সমগ্ৰ জীৱন কঢ়িয়াই ফুৰিবা। তোমাৰ জীৱনৰ নতুন অধ্যায় এটা আৰম্ভ কৰাৰ সাহসী সিদ্ধান্ত লোৱা। মই ফাঁচিৰ আগতেই বিবাহ বিচ্ছেদ কৰাৰ সিদ্ধান্ত লৈছোঁ।”
নব্বৈৰ দশকৰ আৰম্ভণিতে পাকিস্তান সমৰ্থিত সন্ত্ৰাসবাদী আৰু দুষ্কৃতিকাৰীৰ হিংসাৰ বাবে কাশ্মীৰী পণ্ডিতসকলে কাশ্মীৰ উপত্যকাৰ পৰা পলায়ন কৰিবলৈ বাধ্য হৈছিল। সেই সময়ত কাশ্মীৰী পণ্ডিতসকলক সন্ত্ৰাসবাদীয়ে নিৰ্বাচিতভাৱে অত্যাচাৰ চলাইছিল। শ্ৰীনগৰৰ শ্বেৰ-ই-কাশ্মীৰ ইনষ্টিটিউট অব মেডিকেল ছায়েন্সৰ নাৰ্ছ সৰলা সেই সময়ত নিৰ্যাতনৰ বলি হৈছিল। ১৯৯০ চনৰ ১২ এপ্ৰিলৰ নিশা সৰলা চিকিৎসালয়ৰ পৰা কেম্পাছৰ ভিতৰত অৱস্থিত নিজৰ হোষ্টেললৈ উভতি আহি আছিল। অভিযোগনামাত উল্লেখ আছে যে সেই সময়ত মূল ষড়যন্ত্ৰকাৰী য়াছিনৰ সহযোগীয়ে সৰলাক অপহৰণ কৰিছিল। তেওঁক বন্দী কৰি নিষ্ঠুৰভাৱে অত্যাচাৰ আৰু ধৰ্ষণ কৰা হৈছিল। ইয়াৰ পিছতে তেওঁক গুলীয়াই হত্যা কৰা হয়। তিনিদিন পিছত শ্ৰীনগৰৰ এটা পথত পেলাই দিয়া হয় তেওঁৰ নিৰ্যাতনৰ চিহ্নযুক্ত আৰু গুলীবিদ্ধ মৃতদেহ।
