কেৰালামত (Keralam) সংঘটিত এক মৰ্মান্তিক গাড়ী দুৰ্ঘটনাত (tragic acciden) ইঞ্জিনিয়াৰিঙৰ ৮ গৰাকী ছাত্ৰৰ মৃত্যু (Death of 8 students) হয়। তেওঁলোক তামিলনাডুৰ পৰা কেৰালামলৈ গৈ আছিল। শুকুৰবাৰে নিশা তেওঁলোকৰ গাড়ীখনে পথৰ কাষত ৰখাই থোৱা এখন ট্ৰাকত খুন্দা মাৰে। ফলত গাড়ীখন ছিন্নভিন্ন হৈ পৰে। এই দুৰ্ঘটনাত ৬ জন ছাত্ৰৰ থিতাতে মৃত্যু হয়। বাকী দুজনক উদ্ধাৰ কৰি চিকিৎসালয়লৈ লৈ যোৱা হয় যদিও চিকিৎসকে তেওঁলোকক মৃত ঘোষণা কৰে। তামিলনাডুৰ পৰা তেওঁলোক কিয় কেৰালামলৈ গৈছিল সেয়া এতিয়াও স্পষ্ট হোৱা নাই। পৰিয়ালৰ তৰফ পৰাও এই সন্দৰ্ভত কোনো তথ্য দিব পৰা নাই।
কেৰালামৰ ত্ৰিশূৰত ৰাষ্ট্ৰীয় ঘাইপথ ৬৬ৰ এফালে এখন ট্ৰাক ৰখাই থোৱা আছিল। আৰক্ষীৰ মতে, পথত অবৈধভাৱে ৰখাই থোৱা আছিল ট্ৰাকখন। ঘটনাৰ পিছৰে পৰা পলাতক চালকজন। মহাৰাষ্ট্ৰৰ পৰা আহিছিল ট্ৰাকখন। প্ৰাথমিক তদন্তত প্ৰকাশ পাইছে যে শুকুৰবাৰে নিশা প্ৰায় ১১.৪০ বজাত ছাত্ৰসকলৰ গাড়ীখনে ট্ৰাকখনত খুন্দা মাৰে। আৰক্ষীয়ে জনোৱা মতে, গুৰুৱায়ুৰ মন্দিৰৰ দিশৰ পৰা গাড়ীখন কোডুংগালুৰ অভিমুখে গৈ আছিল। প্ৰথম অৱস্থাত এই ঘটনাৰ পিছতে আৰক্ষীয়ে এফআইআৰ ৰুজু কৰিছে। তাত অবৈধভাৱে পাৰ্কিং কৰাৰ অভিযোগ উত্থাপন হৈছে ট্ৰাকচালকজনৰ বিৰুদ্ধে। তদুপৰি ভাৰতীয় ন্যায় সংহিতাৰ সংশ্লিষ্ট ধাৰাত চালকজনৰ বিৰুদ্ধে অনিচ্ছাকৃত হত্যাৰ গোচৰ ৰুজু কৰা হৈছে।
আৰক্ষীৰ সূত্ৰ অনুসৰি, ৰাষ্ট্ৰীয় ঘাইপথৰ এফালে সংস্কাৰৰ কাম চলি আছিল। ৰাস্তাত বেৰিকেড আছিল। তাৰ ওচৰতে সোঁফালে ট্ৰাকখন ৰখাই থোৱা আছিল। তীব্ৰ বেগেৰে গৈ আছিল ছাত্ৰসকলৰ গাড়ীখন। নিশাৰ আন্ধাৰত পথৰ বেৰিকেড চালকজনে দেখা নাপালে বুলি অনুমান কৰা হৈছে। আন কোনো কাৰণত গাড়ীখনে নিয়ন্ত্ৰণ হেৰুৱাইছে নেকি সেই তদন্তও অব্যাহত ৰাখিছে আৰক্ষীয়ে।
নিহত আটাইকেইজনেই তামিলনাডুৰ ডিণ্ডিগুল চহৰৰ এখন অভিযান্ত্ৰিক মহাবিদ্যালয়ত অধ্যয়ন কৰি আছিল। ছয়জনৰ পৰিচয় জানিব পৰা গৈছে। ইয়াৰ ভিতৰত সূৰ্য, যুৱসঞ্জিত, বিশ্ব আৰু জাহুৱা ডিণ্ডিগুলৰ বাসিন্দা। সন্তোষ আৰু প্ৰসন্নৰ ঘৰ মাদুৰাইত। বাকী দুজনক এতিয়াও চিনাক্ত কৰিব পৰা হোৱা নাই। মহাবিদ্যালয়ৰ পৰিচয়-পত্ৰ চাই মৃতকৰ পৰিয়ালৰ সৈতে আৰক্ষীয়ে যোগাযোগ কৰিছে। তেওঁলোকৰ বহুতৰে পৰিয়ালে গম পোৱা নাছিল যে তেওঁলোক কেৰালামলৈ গৈছে। পৰিয়ালৰ লোক ত্ৰিশূৰ মেডিকেল কলেজ পোৱাৰ লগে লগে মৃতদেহৰ মৰণোত্তৰ পৰীক্ষা কৰা হ’ব।
