গাড়ী চুৰিক লৈ উদ্বেগ। সেই ভয়ৰ বাবেই বিহাৰৰ গোপালগঞ্জৰ এটা পৰিয়ালে আচৰিত সিদ্ধান্ত ল’লে। নতুনকৈ ক্ৰয় কৰা স্ক’ৰপিঅ’ (Scorpio car) এখন চুৰিৰ পৰা বচাবলৈ তেওঁলোকে ক্ৰেন ব্যৱহাৰ কৰি গাড়ীখন পোনে পোনে তেওঁলোকৰ ঘৰৰ দ্বিতীয় মহলাৰ ছাদত তুলি দিয়ে।
ইতিমধ্যে এই ঘটনাৰ এটা ভিডিঅ’ ছ’চিয়েল মিডিয়াত ভাইৰেল হৈ পৰিছে। ভাইৰেল ভিডিঅ’টোত দেখা গৈছে যে এখন বগা ৰঙৰ স্ক’ৰপিঅ’ ক্লাছিক ক্ৰেন ব্যৱহাৰ কৰি ৰছীৰে ওলোমাই লোৱা হৈছে। গাড়ীখন লাহে লাহে ওপৰলৈ তুলি লোৱা হৈছে। তাৰ পিছত দুমহলীয়া ঘৰটোৰ ছাদত সাৱধানে নমাই দিয়া হয়। জানিব পৰা মতে, গাড়ীখনৰ মালিক মনোজ যাদৱ।
শেহতীয়াকৈ তেওঁ এই গাড়ীখন কিনিছিল। তেওঁ কৰ্মসূত্ৰে ইজৰাইলত থাকে। তেওঁৰ অনুপস্থিতিত গাড়ীখনৰ যত্ন লোৱাৰ দায়িত্ব আছিল এজন চালকৰ। কিন্তু পিছত চালকজনে চাকৰি এৰে। ইয়াৰ পিছতে গাড়ীখনৰ সুৰক্ষাৰ প্ৰতি চিন্তিত হৈ পৰে পৰিয়ালটো। চুৰিৰ ভয়ত অৱশেষত গাড়ীখন ঘৰৰ ছাদত থোৱাৰ সিদ্ধান্ত লোৱা হ’ল। সেই সিদ্ধান্ত কাৰ্যকৰী কৰিবলৈ ক্ৰেন ব্যৱহাৰ কৰা হয়। অৱশ্যে ঘৰৰ ছাদত ইমান গধুৰ গাড়ী ৰখাৰ বাবে চাদৰ বোজা বহন ক্ষমতাৰ কোনো তথ্য পোহৰলৈ অহা নাই।
গাড়ীখন ছাদত ৰখাটো কিমান নিৰাপদ সেই সন্দৰ্ভতো কোনো নিৰ্দিষ্ট তথ্য উপলব্ধ নহয়। স্থানীয় ৰাইজৰ দাবী আৰু ভাইৰেল ভিডিঅ’টোৱে ইতিমধ্যে অঞ্চলটোত কৌতুহলৰ সৃষ্টি কৰিছে। ‘ছাদৰ ওপৰত স্ক’ৰপিঅ’ক লৈও ছ’চিয়েল মিডিয়াত বিভিন্ন আলোচনা আৰু ধেমেলীয়া মন্তব্য চলিছে।
