ব্ৰিকছ সন্মিলনত অংশগ্ৰহণ কৰিবলৈ ভাৰতলৈ আহিছে চীনৰ ৰাষ্ট্ৰপতি ছি জিনপিং। ইতিমধ্যে তেওঁ বেইজিঙৰ পৰা ৰাওনা হৈছে। শনিবাৰে দুপৰীয়া তেওঁ দিল্লীত অৱতৰণ কৰাৰ কথা। তাৰ আগতে চীনে ভাৰতৰ সৈতে দ্বিপাক্ষিক সম্পৰ্কৰ বিষয়ে মুকলিকৈ কয়। দুয়োখন দেশৰ মাজত থকা মতানৈক্য সন্দৰ্ভতো এক বিশেষ বাৰ্তা প্ৰদান কৰা হয়।
ব্ৰিকছ সন্মিলনৰ মাজতে ভাৰতৰ প্ৰধানমন্ত্ৰী নৰেন্দ্ৰ মোদীৰ সৈতে জিনপিঙে দ্বিপাক্ষিক বৈঠকত মিলিত হ’ব। শনিবাৰে সন্ধিয়া ৫.৪৫ বজাৰ পৰা এই বৈঠক আৰম্ভ হোৱাৰ কথা। ভাৰতত থকা চীনৰ ৰাষ্ট্ৰদূত জু ফেইহঙে শুকুৰবাৰে নিশা ছ’চিয়েল মিডিয়াত এই দ্বিপাক্ষিক বৈঠক নিশ্চিত কৰে। তেওঁ লিখিছে, “প্ৰধানমন্ত্ৰী মোদী আৰু ৰাষ্ট্ৰপতি জিনপিঙৰ মাজত দ্বিপাক্ষিক বৈঠকৰ আয়োজন কৰা হৈছে। এইখন দুয়োগৰাকী নেতাৰ মাজত একেৰাহে তৃতীয়খন বৈঠক। ইয়াৰ পূৰ্বে কাজান আৰু টিয়ানজিনত তেওঁলোকৰ বৈঠক হৈছিল।”
ভাৰত আৰু চীনৰ মাজত দ্বিপাক্ষিক সম্পৰ্কৰ বিষয়ে আলোচনা কৰি চীনৰ ৰাষ্ট্ৰদূতগৰাকীয়ে কয়, “জিনপিং আৰু মোদীৰ কৌশলগত নিৰ্দেশনাত চীন আৰু ভাৰতে একেলগে কাম কৰিব। আমি দীৰ্ঘম্যাদী দৃষ্টিকোণৰ পৰা দ্বিপাক্ষিক সম্পৰ্ক আগুৱাই নিম। দুয়োখন দেশৰ মাজত যোগাযোগ আৰু সহযোগিতা আৰু অধিক বৃদ্ধি পাব।” চীনৰ ৰাষ্ট্ৰদূতগৰাকীয়ে যদি মতানৈক্য থাকে তেন্তে চম্ভালিব বুলিও বাৰ্তা প্ৰদান কৰে। তেওঁ লিখিছে, “আমি মতানৈক্য সঠিকভাৱে চম্ভালিম। এইদৰে চীন আৰু ভাৰতৰ মাজত বন্ধুত্বপূৰ্ণ চুবুৰীয়া সম্পৰ্ক বজাই ৰখা হ’ব। আমি ইখন দেশে সিখন দেশৰ সফলতাৰ অংশীদাৰ হ’ম।”
জিনপিঙে শেষবাৰৰ বাবে ভাৰত ভ্ৰমণ কৰিছিল ২০১৯ চনত। ইয়াৰ পিছত ২০২০ চনত লাডাখৰ গালৱান উপত্যকাত ভাৰত আৰু চীনৰ সেনাই সশস্ত্ৰ সংঘৰ্ষত লিপ্ত হৈছিল। কেইবামাহো ধৰি দুয়োখন দেশৰ সম্পৰ্ক সৰ্বনিম্ন স্তৰত আছিল। কিন্তু ক্ৰমান্বয়ে সম্পৰ্ক উন্নত হৈছে। জিনপিঙক দুবাৰ সাক্ষাৎ কৰিছে মোদীয়ে। অৱশ্যে ৭ বছৰৰ মূৰত ভাৰত ভ্ৰমণলৈ আহিছে চীনৰ ৰাষ্ট্ৰপতিগৰাকী। দেওবাৰলৈ অব্যাহত থাকিব ব্ৰিকছ সন্মিলন। ৰাছিয়াৰ ৰাষ্ট্ৰপতি ভ্লাদিমিৰ পুটিন আৰু ইৰাণৰ ৰাষ্ট্ৰপতি মাছুদ পিজেছকিয়ানেও ইয়াত অংশগ্ৰহণ কৰিবলৈ ভাৰতলৈ আহিছে। মোদীৰ সৈতে দ্বিপাক্ষিক আলোচনাত মিলিত হৈছে। শনিবাৰে বিয়লি জিনপিঙৰ সৈতে হোৱা বৈঠকক লৈও বিভিন্ন মহলত কৌতুহলৰ সৃষ্টি হৈছে।
