ছ’চিয়েল মিডিয়াকে ধৰি বিভিন্ন ডিজিটেল প্লেটফৰ্মত শিশু সুৰক্ষা সুনিশ্চিত কৰাৰ লগতে শিশুৰ যৌন শোষণ সম্পৰ্কীয় এক গোচৰত কেন্দ্ৰীয় চৰকাৰকে ধৰি সকলো পক্ষকে উচ্চতম ন্যায়ালয়ে জাননী জাৰি কৰিছে। অনলাইনত শিশুৰ বাবে অধিক শক্তিশালী সুৰক্ষা ব্যৱস্থাৰ বাবে দাখিল কৰা আবেদন সন্দৰ্ভত কেন্দ্ৰৰ মতামত বিচাৰিছে উচ্চতম ন্যায়ালয়ে।
‘জাষ্ট ৰাইটছ ফৰ চিলড্ৰেন এলায়েন্স’ নামৰ এটা সংস্থাই দাখিল কৰা আবেদনত ছ’চিয়েল মিডিয়া আৰু অন্যান্য ডিজিটেল সেৱা ব্যৱহাৰ কৰাৰ সময়ত নাবালকৰ সঠিক সুৰক্ষা নিশ্চিত কৰাৰ বাবে প্ৰয়োজনীয় ব্যৱস্থা বিচাৰিছে। তথ্য প্ৰযুক্তি (মধ্যস্থতাকাৰী নিৰ্দেশনা আৰু ডিজিটেল মিডিয়া এথিক্স কোড) আইন, ২০২১ত প্ৰয়োজনীয় সংশোধনীৰ বাবে নিৰ্দিষ্ট নিৰ্দেশনা প্ৰণয়নৰ দাবী জনোৱাৰ লগতে ১৮ বছৰৰ তলৰ নাবালকসকলে যাতে পিতৃ-মাতৃ বা আইনী অভিভাৱকৰ সন্মতি অবিহনে কোনো ডিজিটেল প্লেটফৰ্মৰ সৈতে চুক্তিবদ্ধ হ’ব নোৱাৰে তাৰ বাবেও অনুৰোধ জনোৱা হৈছে।
আবেদনকাৰীয়ে যুক্তি আগবঢ়ায় যে এই প্ৰকাৰৰ ডিজিটেল সেৱাৰ লগত বিভিন্ন বিপদ জড়িত হৈ আছে। য’ত এনে জড়িত থকাৰ প্ৰয়োজন হয়, তেনে ক্ষেত্ৰত অভিভাৱক বা আইনী অভিভাৱকৰ পৰিচয় পৰীক্ষণ বা ই-কেৱাইচি কৰিবলৈ দাবী জনোৱা হৈছে। আবেদনখনত শিশুৰ ডিজিটেল প্লেটফৰ্মত স্বতন্ত্ৰভাৱে প্ৰৱেশৰ সৈতে জড়িত কেইবাটাও বিপদৰ ওপৰত আলোকপাত কৰা হৈছে। ইয়াৰ উদাহৰণ হ’ল অনলাইন গ্ৰুমিং, যৌন শোষণ, সৰবৰাহৰ, চাইবাৰ বুলিং, আচৰণৰ প্ৰফাইলিং, ব্যক্তিগত তথ্যৰ অপব্যৱহাৰ আৰু অনুপযুক্ত বিষয়বস্তুৰ সন্মুখীন হোৱা।
উল্লেখ্য যে কিছু মাহ পূৰ্বে জেপ ফাউণ্ডেশ্যন নামৰ এটা সংস্থাই নিৰাপত্তাজনিত কাৰণত ১৩ বছৰৰ তলৰ শিশুৱে ছ’চিয়েল মিডিয়া ব্যৱহাৰ কৰাত সম্পূৰ্ণ নিষেধাজ্ঞা আৰোপ কৰি উচ্চতম ন্যায়ালয়ত গোচৰ তৰিছিল। আবেদনকাৰীৰ অধিবক্তাই আদালতত কয় যে ছ’চিয়েল মিডিয়াৰ অত্যধিক ব্যৱহাৰে শিশুৰ বাবে বিপদৰ সৃষ্টি কৰিছে। ফলত শিশুৰ শৰীৰ আৰু মনৰ ওপৰত ইয়াৰ প্ৰভাৱ পৰিছে। অতি কম বয়সতে বিভিন্ন মানসিক সমস্যাৰ উন্মেষ ঘটিছে। কিন্তু সেই সময়ত ন্যায়াধীশ বি আৰ গভাই আৰু ন্যায়াধীশ অগাষ্টিন জৰ্জ মাছিৰ বিচাৰপীঠে কয় যে বিষয়টো নীতিগত বিষয়, গতিকে উচ্চতম ন্যায়ালয়ে ইয়াত হস্তক্ষেপ নকৰে।
