ব্ৰিকছ সন্মিলনত অংশগ্ৰহণৰ বাবে ভাৰতত উপস্থিত হৈছে ইৰাণৰ ৰাষ্ট্ৰপতি মাছুদ পেজেছকিয়ান। দিল্লীৰ মাটিত থিয় হৈ তেওঁ দুই শত্ৰু আমেৰিকা আৰু ইজৰাইলক সকীয়াই দিয়ে। তেওঁ কয় যে ইৰাণে কেতিয়াও কোনো ধৰণৰ ভাবুকিৰ আগত শিৰ নত নকৰে। ইয়াৰ সমান্তৰালকৈ পেজেস্কিয়ানে ভাৰতৰ আতিথ্যৰ বাবে প্ৰধানমন্ত্ৰী নৰেন্দ্ৰ মোদীক ধন্যবাদো জ্ঞাপন কৰে।
শনিবাৰৰ পৰা অনুষ্ঠিত হৈছে ব্ৰিকছ সন্মিলন। ইয়াৰ পূৰ্বে শুকুৰবাৰে দিল্লীত উপস্থিত হয় ইৰাণৰ ৰাষ্ট্ৰপতিগৰাকী। মোদীৰ সৈতে তেওঁৰ দ্বিপাক্ষিক বৈঠক অনুষ্ঠিত হয়। বৈঠকৰ অন্তত পেজেছকিয়ানে সন্ধিয়াৰ অনুষ্ঠানত ভাৰতীয় ধৰ্মগুৰু, বুদ্ধিজীৱী আৰু ব্যৱসায়ীসকলক সম্বোধন কৰে। তেওঁ কয়, “প্ৰথমে ভাৰত চৰকাৰ আৰু ইয়াৰ প্ৰধানমন্ত্ৰীক এই মহান আতিথ্যৰ বাবে মই প্ৰশংসা নকৰাকৈ থাকিব নোৱাৰো। আমাৰ মাজত অতি ভাল আলোচনা হৈছিল। এই আলোচনাই সংস্কৃতি, বিজ্ঞান, প্ৰযুক্তি, বাণিজ্য, অৰ্থনীতি আৰু অন্যান্য ক্ষেত্ৰত আমাৰ দুয়োখন দেশৰ মাজত সহযোগিতাৰ পথ আৰু অধিক প্ৰশস্ত কৰিব বুলি আশা কৰিছোঁ। আমি একেলগে সেইবোৰ পুনৰুজ্জীৱিত কৰিম।”
আনহাতে, ভাৰতৰ ভূমিত থিয় হৈ পেজেস্কিয়ানে যুদ্ধৰ বাবে ইজৰাইল আৰু আমেৰিকাক তীব্ৰ সমালোচনা কৰে। তেওঁ কয় যে দুয়োখন দেশে ইৰাণক ভয় খুৱাবলৈ চেষ্টা চলাইছে। কিন্তু ইৰাণে কেতিয়াও শিৰ নত নকৰে, বৰঞ্চ বাৰে বাৰে মূৰ দাঙি থিয় হৈ থাকিব। তেওঁ কয়, “ইৰানে ইজৰাইল আৰু আমেৰিকাৰ বিৰুদ্ধে একেলগে থিয় দিবলৈ সক্ষম হৈছে। তেওঁলোকে আমাক দমন কৰিব বিচাৰে। কিন্তু আমি তেনেকুৱা হ’বলৈ নিদিওঁ। আমি কেতিয়াও তেওঁলোকৰ আগত নতিস্বীকাৰ নকৰোঁ। যদি আমাক হেঁচা দিয়া হয়, তেন্তে আমি তেওঁলোকৰ প্ৰতি উত্তৰ দিম।”
পেজেস্কিয়ানে লগতে কয়, “তেওঁলোকে নিজকে মানৱ অধিকাৰৰ সমৰ্থক বুলি দাবী কৰে। কিন্তু সত্যটো হ’ল, তেওঁলোক প্ৰকৃত সন্ত্ৰাসবাদী। কাৰণ, এটা মুহূৰ্ততে তেওঁলোকে নিজৰ আধুনিক প্ৰযুক্তি ব্যৱহাৰ কৰি ১৬৮ জন স্কুলীয়া ছাত্ৰ-ছাত্ৰীক হত্যা কৰিছিল।” আমেৰিকান আৰু ইজৰাইলীক লক্ষ্য কৰি পেজেস্কিয়ানৰ বাৰ্তা আছিল, “আপোনালোকে নিৰ্বিচাৰে মানুহক হত্যা কৰে, বিজ্ঞানীক আক্ৰমণ কৰে, স্কুল-চিকিৎসালয় আক্ৰমণ কৰে আৰু আমাক সন্ত্ৰাসবাদী বুলি কয়? যদি আপোনালোকৰ সাহস আছে তেন্তে সেনাবাহিনীৰ সৈতে যুঁজ দিয়ক। কিয় সাধাৰণ মানুহক হত্যা কৰিছে? ইৰাণৰ জনসাধাৰণে আত্মসমৰ্পণ নকৰে। আমি মানৱতাক বিশ্বাস কৰোঁ। আমি বিশ্বাস কৰোঁ যে সকলো জীৱ, অৰ্থাৎ সকলো মানৱজাতিৰ সৰ্বত্ৰে সমান অধিকাৰ আছে।”
শুকুৰবাৰে পেজেস্কিয়ানৰ সৈতে হোৱা বৈঠকত পশ্চিম এছিয়াৰ পৰিস্থিতি সন্দৰ্ভত ভাৰত চৰকাৰৰ স্থিতিও স্পষ্ট কৰি দিয়ে মোদীয়ে। আলোচনা আৰু কূটনীতিৰ জৰিয়তে সকলো সমস্যা সমাধানৰ আহ্বান জনায়। পশ্চিম এছিয়াত স্থায়ী শান্তি, স্থিতিশীলতা আৰু বাণিজ্যিক যাতায়াতৰ স্বাধীনতা নিশ্চিত কৰাৰ ওপৰত গুৰুত্ব আৰোপ কৰে মোদীয়ে।
