শুকুৰবাৰে নিশাৰ পৰা মণিপুৰৰ পাহাৰীয়া অঞ্চলত আৰক্ষী আৰু অৰ্ধসামৰিক বাহিনীয়ে অবিৰতভাৱে তালাচী অভিযান চলাই আহিছে। শনিবাৰে বিয়লিলৈকে যৌথ বাহিনীয়ে ৫টা অটোমেটিক ৰাইফল আৰু ১৫৪ গ্ৰাম ড্ৰাগছ উদ্ধাৰ কৰিছে। আৰক্ষীৰ দাবী, ম্যানমাৰৰ এজন ড্ৰাগছ সৰবৰাহকাৰীকে ধৰি চাৰিজন লোকক গ্ৰেপ্তাৰ কৰা হৈছে। শনিবাৰে বিয়লি মণিপুৰ আৰক্ষীয়ে এক বিবৃতিত কয় যে বেইহাং আৰক্ষী আৰু অসম ৰাইফলছৰ যৌথ দলে ম্যানমাৰ সীমান্তৰ ৪১নং পিলাৰৰ সমীপত টহল দি থকা অৱস্থাত ৩৬ বছৰীয়া এজন যুৱকক গ্ৰেপ্তাৰ কৰে। জেৰাৰ সময়ত জানিব পৰা গৈছে যে তেওঁ ম্যানমাৰৰ ভাংলাই গাঁৱৰ বাসিন্দা। তেওঁৰ পৰা ১৫৪ গ্ৰাম ড্ৰাগছ উদ্ধাৰ হয়।
আনহাতে, শুকুৰবাৰে নিশা চোৰাংচোৱাৰ তথ্যৰ ভিত্তিত চুৰচান্দপুৰ জিলাৰ হেঙেলেপ মহকুমাৰ মুনপি গাঁৱত ৰাজ্যিক আৰক্ষী আৰু অসম ৰাইফলছৰ যুটীয়া দল এটাই অভিযান চলায়। তাত থকা সন্দেহযুক্ত কুকি উগ্ৰপন্থীৰ এটা গুহাৰ পৰা তিনিজন লোকক গ্ৰেপ্তাৰ কৰা হয়। উদ্ধাৰ হৈছে ৫টা অটোমেটিক ৰাইফল। মণিপুৰ আৰু ম্যানমাৰৰ ৩৯৮ কিলোমিটাৰ দৈৰ্ঘ্যৰ সীমান্তত প্ৰায় ৫৫ কিলোমিটাৰ বেৰ দিয়া হৈছে যদিও বাকীখিনি মুকলি। তাৰ পৰাই ড্ৰাগছ আৰু অস্ত্ৰ-শস্ত্ৰ সৰবৰাহৰ অভিযোগ উত্থাপন হৈছে। উল্লেখ্য যে মিজোৰাম আৰক্ষীয়ে চলিত সপ্তাহত একেৰাহে তিনিদিন ম্যানমাৰ সীমান্তত সক্ৰিয় সৰবৰাহকাৰী চক্ৰৰ বিৰুদ্ধে অভিযান চলাইছিল। তাত গ্ৰেপ্তাৰ হৈছে ম্যানমাৰৰ ছয়টা সৰবৰাহকাৰী। উদ্ধাৰ হৈছে ১৪ কোটি টকাৰ ড্ৰাগছ।
