উত্তৰ আৰব সাগৰত নিয়মীয়া টহলদাৰীৰ সময়ত পাকিস্তানৰ নৌসেনাৰ এখন টহলদাৰী জাহাজে ভাৰতীয় নৌসেনাৰ এখন জাহাজত খুন্দা মাৰে। আন্তঃৰাষ্ট্ৰীয় জলসীমাত দুয়োখন দেশৰ জাহাজৰ সংঘৰ্ষৰ ঘটনাৰ পিছতে নতুন দিল্লীয়ে দিল্লীস্থিত পাকিস্তানী দূতাবাসৰ শীৰ্ষ কূটনীতিবিদ ছাদ আহমেদ ৱাৰিচক তলব কৰে। নতুন দিল্লীয়ে এই ঘটনা ‘অপেছাদাৰী আৰু অগ্ৰাহ্যজনক’ বুলিও বাৰ্তা প্ৰদান কৰে। লগতে এনে ঘটনা একেবাৰে অবাঞ্চিত বুলিও মন্তব্য কৰে।
ভাৰতীয় বৈদেশিক পৰিক্ৰমা মন্ত্ৰালয়ৰ সূত্ৰ অনুসৰি, মঙলবাৰে সন্ধিয়া ভাৰতীয় নৌসেনাই উত্তৰ আৰব সাগৰত আন্তঃৰাষ্ট্ৰীয় জলসীমাত টহল দি আছিল। সেই সময়ত পাকিস্তানী নৌসেনাৰ এখন টহলদাৰী জাহাজে তীব্ৰ বেগেৰে আহি ভাৰতীয় নৌসেনাৰ জাহাজখনক খুন্দা মাৰে। অৱশ্যে এই ঘটনাত কোনো বিশেষ ক্ষতি হোৱা নাই বুলি বৈদেশিক পৰিক্ৰমা মন্ত্ৰালয়ৰ সূত্ৰই প্ৰকাশ কৰিছে। অৱশ্যে পাকিস্তানী জাহাজখনৰ গতিবেগ অতি বেছি হোৱাৰ বাবে সংঘৰ্ষ বিপজ্জনক আছিল বুলি অভিযোগ উত্থাপন হৈছে।
নতুন দিল্লীয়ে এই বিষয়টোক কেৱল সামুদ্ৰিক দুৰ্ঘটনা বুলিয়েই ধৰা নাই। দুয়োখন দেশৰ নৌসেনাৰ জাহাজ জড়িত হৈ পৰাত এই ঘটনা কূটনৈতিকভাৱে গুৰুত্বপূৰ্ণ হৈ পৰিছে। ভাৰতৰ বৈদেশিক পৰিক্ৰমা মন্ত্ৰালয়ৰ তথ্য অনুসৰি, পাকিস্তানৰ নৌসেনাৰ এই আচৰণ ১৯৯১ চনৰ ভাৰত-পাকিস্তান চুক্তিৰ দশম অনুচ্ছেদৰ সৈতে মিল নাই। সেই চুক্তি অনুসৰি সামৰিক অনুশীলন, কৌশলগত অনুশীলন বা যুদ্ধজাহাজৰ টহল চলোৱাৰ পূৰ্বে সংশ্লিষ্ট দেশসমূহে পথ আৰু সময় আগতীয়াকৈ অৱগত কৰিব লাগিব। এই ঘটনাত পাকিস্তানৰ নৌসেনাই সেই নিয়ম মানি নচলি চুক্তিখন পোনপটীয়াকৈ উলংঘা কৰাৰ অভিযোগ উত্থাপন হৈছে।
আন্তঃৰাষ্ট্ৰীয় জলসীমাৰ এনে ঘটনাক কূটনৈতিক মহলে পূৰ্বে নঘটা ঘটনা বুলি গণ্য কৰে। কিন্তু এইটোৱে প্ৰথম নহয়, ইয়াৰ পূৰ্বেও ২০১১ চনত পাকিস্তানৰ নৌসেনাৰ জাহাজ ‘বাবৰ’ আৰু ভাৰতৰ নৌসেনাৰ জাহাজ ‘গোদাৱৰী’ৰ মাজত সংঘৰ্ষ হৈছিল। এই ঘটনাক লৈ দুয়োখন দেশৰ মাজত উত্তেজনা শিখৰত উপনীত হয়। ১৫ বছৰৰ পাছতো একে ঘটনা পুনৰাবৃত্তি হোৱাত নতুন দিল্লীয়ে পাকিস্তানী দূতাবাসৰ শীর্ষ কূটনীতিবিদজনক তলব কৰি এক কঠোৰ বার্তা প্রেৰণ কৰে৷
