ASSAM TIMES POST
ডিফু : সমগ্ৰ দেশৰ লগত সংগতি ৰাখি পাহাৰীয়া জিলাৰ সদৰ চহৰকে ধৰি বিভিন্ন স্থানত আন্তৰ্জাতিক নাৰী দিৱসটি উলহ-মালহেৰে পালন কৰা হয় ৷ ভাৰতীয় জনতা পাৰ্টীৰ মহিলা মৰ্চাৰ উদ্যোগত ডিফু ক্লাৱত অনুষ্ঠিত হোৱা নাৰীদিৱসৰ কাৰ্যসূচীত কাৰবি আংলং স্বায়ত্ত শাসিত পৰিষদৰ কাৰ্যবাহী সদস্য তুলিৰাম ৰংহাঙে কয় যে, বৰ্তমান যুগতো মহিলা সকলো সমাজৰ এক অপৰিহাৰ্য অংগ হৈ পৰিছে ৷ মহিলা সকল পুৰুষৰ সমানে ফেৰ মাৰিব পৰা হৈছে ৷
মহিলাৰ সকলৰ প্ৰতি সম্মান জনাইয়েই আজি পুৱাৰ ভাগত ডিফু – লামডিং পথত ১ কোটি টকা ব্যয় সাপেক্ষে মহিলা নিৱেশৰ এক আধাৰশিলা স্থাপন কৰে ৷ পৰৱৰ্তী পৰ্যায়ত আন্তৰ্জাতিক নাৰী দিৱস এই ভৱনতে অনুষ্ঠিত কৰাৰ উদ্যেশ্যৰে এই ভৱনৰ আধাৰশিলা স্থাপন কৰা হৈছে ৷
পাৰ্বত্য উন্নয়ণ মন্ত্ৰী ছুম ৰংহাঙেও নাৰী দিৱসৰ লগত সংগতি ৰাখি ডিফুত এক মুকলি মঞ্চৰ আধাৰশিলা স্থাপন কৰে ৷ আনহাতে ডিফু কলা কেন্দ্ৰত কেএনচিএ, আইপোৱা, কেএডব্লিউজেএফ আৰু ইউকেডব্লিউজেএফেও যৌথবভাবে আন্তৰ্জাতিক নাৰী দিৱসটি উদযাপন কৰে ৷ এই উদ্যেশ্যে সংগঠন কেইটাই নাৰী ঐক্যৰ উদাহৰণ স্বৰূপে ডিফু চহৰৰ মাজেৰে এক শান্তি সমদল বাহিৰ কৰে ৷
কেএনচিএৰ সভানেত্ৰী প্ৰতিমা ইংহীয়ে সাংবাদিকৰ আগত কয়যে, মহিলা সকলে নিতৌ ন ন সমস্যাৰে ভাৰাক্ৰান্ত হোৱাৰ লগতে প্ৰতিবছৰে মহিলাৰ বাবে ৩৩ শতাংশ আসন সংৰক্ষণৰ বাবে চৰকাৰক দাবী জনাই অহাৰ পিছতো চৰকাৰে মুঠেই গ্ৰাহ্য কৰা নাই, কাৰবি আংলঙত এএছডিচি, চি আই(এম এল)ৰ দিনত নাৰী দিৱসত চৰকাৰী বন্ধৰ দিন ঘোষণা কৰা হৈছিল যদিও পৰিষদীয় চৰকাৰ খনৰ দায়িত্ব কংগ্ৰেছ আৰু বিজেপিয়ে পোৱাৰ পিছত সেই বন্ধ উঠাই দিলে চৰকাৰৰ যিবোৰ নিম্ন মানৰ আঁচনিত মহিলা ১০০ শতাংশ নিযুক্তি প্ৰদান কৰিছে সেইবোৰৰ বাবে মহিলা নিবণুৱা সকলক সস্তীয়া দৰমহাৰে খটুৱাইছে ৷
সেয়ে চৰকাৰৰ নাৰী বিৰোধী স্থিতি সমূহৰ গৰিহণা দিছে সভানেত্ৰী গৰাকীয়ে ৷ আত্ম সহায়ক গোট, এনআৰএলএমতো বিভিন্ন আসোঁৱাহ ৰৈ যোৱা বুলি অভিযোগ কৰিছে নেতৃ গৰাকীয়ে ৷ ইয়াৰোপৰি জিলা মহিলা কংগ্ৰেছ সমিতিয়েও নাৰী দিৱসটি ডিফুত পালন কৰা বুলি জানিব পৰা গৈছে ৷
