তেলেংগানাৰ পিছত এইবাৰ বিহাৰ। দুৰ্নীতি বিৰোধী শাখাই এজন চৰকাৰী অভিযন্তাৰ বিপুল সম্পত্তি উদ্ধাৰ কৰে। দুৰ্নীতি নিবাৰক শাখাৰ বিষয়াসকলে অভিযন্তা নাৰদকুমাৰ দাসৰ ঘৰকে ধৰি কেইবাটাও ঠিকনাত তালাচী অভিযান আৰম্ভ কৰে। সূত্ৰ অনুসৰি, নাৰদ পৰিকল্পনা আৰু উন্নয়ন বিভাগৰ কাৰ্যবাহী অভিযন্তা। বহু দিন ধৰি তেওঁৰ বিৰুদ্ধে অসমতাপূৰ্ণ সম্পত্তিৰ অভিযোগৰ সন্মুখীন হৈ আহিছে। সেই অভিযোগৰ ভিত্তিত দুৰ্নীতি বিৰোধী শাখাই অভিযান চলায়।
দুৰ্নীতি নিবাৰক শাখাৰ ডিআইজি মানৱজিৎ সিং ধিলনে জনোৱা মতে, মুজাফ্ফৰপুৰৰ অভিযন্তাজনৰ ঘৰত বিছনাৰ তলৰ পৰা ৫০০ টকীয়া নোটৰ বাণ্ডিল উদ্ধাৰ কৰা হৈছে। প্ৰথমাৱস্থাত জানিব পৰা মতে, ৫০ লাখ টকা নগদ ধন উদ্ধাৰ কৰা হৈছে। ইয়াৰ উপৰি অভিযন্তাগৰাকীৰ পাটনা, ভাগলপুৰ আৰু মুংগেৰৰ কেইবাটাও ঠিকনাত অনুসন্ধান চলোৱা হয়। তদন্তকাৰীৰ সূত্ৰ অনুসৰি, নাৰদৰ ভাগলপুৰ আৰু পাটনাত দুটা ঘৰ আছে।
তদুপৰি মুজাফ্ফৰপুৰত এটা ফ্লেট আৰু মুংগেৰত আন এটা বিলাসী ফ্লেট পোৱা গৈছে। অভিযন্তাজনৰ নামত আন বহু সম্পত্তি থকা বুলিও তদন্তকাৰীয়ে সন্দেহ প্ৰকাশ কৰিছে। সেই সম্পত্তিসমূহ বিচাৰি উলিয়াবলৈ অনুসন্ধান চলোৱা হৈছে। নগদ ধনৰ উপৰি গহনা আৰু স্থাৱৰ সম্পত্তিৰ কেইবাটাও নথি জব্দ কৰা হৈছে বুলি তদন্তকাৰীয়ে জানিবলৈ দিয়ে।
আনহাতে, দুৰ্নীতি নিবাৰক শাখাই জুলাই মাহত তেলেংগানাৰ এজন অভিযন্তাৰ ঘৰত অসমতাপূৰ্ণ সম্পত্তিৰ অভিযোগত তালাচী চলাইছিল। তদন্তকাৰীয়ে তেওঁৰ কেইবাটাও ঠিকনাত তালাচী চলাই ১০০ কোটি টকাৰ সম্পত্তি উদ্ধাৰ কৰে। অভিযন্তাৰ এটা ঠিকনাৰ পৰা উদ্ধাৰ হৈছে ৪ লাখ টকাৰ নগদ ধন। বেংকত আছে ৪৫ লাখ টকা। ইয়াৰ উপৰি আন এটা ঠিকনাৰ পৰা ডেৰ কেজি সোণ, ১৩ কেজি ৰূপ, প্ৰায় ১৮ লাখ টকাৰ আচবাব, ৯.৫ লাখ টকাৰ ইলেক্ট্ৰনিক গেজেট আৰু কেইবাখনো বিলাসী গাড়ী উদ্ধাৰ কৰা হয়।
