ASSAM TIMES POST
অজন্তা তালুকদাৰ
ৰাজ্যখনৰ অৰ্থনীতিত কা-আন্দোলন আৰু ক’ভিড-১৯ এ পেলাইছে প্ৰভাৱ। সম্প্ৰতি এই প্ৰভাৱে বিধ্বস্ত কৰিছে তিনিখনকৈ জিলাই আগুৰি ৰখা কাজিৰঙাকো। চলিত বৰ্ষত বিক্ষিপ্ত পৰিঘটনাত কাজিৰঙাই বৃহৎ পৰিমাণৰ ৰাজহ হেৰুৱাৰ লগতে তচনচ হৈছে কাজিৰঙাৰ অৰ্থনীতি।
কা-আন্দোলন, ক’ভিড-১৯ৰ কবলত কাজিৰঙা পৰ্যটন উদ্যোগ। কিন্তু তাৰ মাজতো আছে আশাপ্ৰদ খবৰ। ২০১৮-১৯ বিত্তীয় বৰ্ষৰ ১,৬৮,৭৩৮ গৰাকী ভাৰতীয় আৰু ৭,৪৪৩ গৰাকী বিদেশী পৰ্যটকৰ বিপৰীতে ২০১৯-২০ বৰ্ষত কাজিৰঙাত ক্ৰমে ১,৫৪,৩৫৭ গৰাকী ভাৰতীয় আৰু ১১,৩৯২ গৰাকী বিদেশী পৰ্যটকে কাজিৰঙা দৰ্শন কৰে।
২০১৮-১৯ বৰ্ষৰ তুলনাত ভাৰতীয় পৰ্যটক কিছু হ্ৰাস হ’লেও বিদেশী পৰ্যটক বৃদ্ধি পালে আশাতীতভাৱে। অৰ্থাৎ ৩,৯৪৯ গৰাকী বিদেশী পৰ্যটক ২০১৯-২০ বৰ্ষত বৃদ্ধি হ’ল। ২০১৮-১৯ বৰ্ষৰ মুঠ পৰ্যটক ১,৭৬,১৮১ গৰাকীৰ বিপৰীতে অৱশ্যে ২০১৯-২০ বৰ্ষত ১,৬৫,৭৪৯ গৰাকীলৈ হ্ৰাস পোৱাৰ লগতে পৰ্যটকৰ পৰা লাভ কৰা ৰাজহো কিছু হ্ৰাস পায়।
২০১৮-১৯ বৰ্ষত ৪,৮২,৪২,২২৯ টকাৰ বিপৰীতে ২০১৯-২০ বৰ্ষত ৰাজহ সংগ্ৰহ হয় ৪,৭৫,৮৩,৪৯১ টকা। বিভিন্ন সুবিধাৰে সজ্জিত উদ্যানখনে পৰ্যটকৰ পৰা শেষৰ বছৰটোত দহ কোটি টকা সংগ্ৰহৰ আশা কৰিছিল।
কিন্তু কা-আন্দোলন আৰু ক’ভিড-১৯ ৰ প্ৰভাৱত দেশীয় পৰ্যটক হ্ৰাস পোৱা আৰু বিদেশী পৰ্যটকৰ বহু বুকিং বাতিল কৰিব লগীয়া হোৱাৰ বাবেই ৰাজহ হ্ৰাস হোৱা বুলি অনুমান কৰা হৈছে। ২০০৯-১০ বৰ্ষৰ পৰা ২০১৯-২০ বৰ্ষৰ মাজত উদ্যানখনে পৰ্যটকৰ পৰা সৰ্বাধিক ৰাজহ লাভ কৰিছিল ২০১৭-১৮ বৰ্ষত। পৰিমাণ আছিল ৫,৬০,২২,২৯৫ টকা।
