ASSAM TIMES POST
অজন্তা তালুকদাৰ
বোকাখাত : বাৰিষা কালত অনেক ৰোগত আক্ৰান্ত হৈ বিনষ্ট হয় আমাৰ পশুধন। তদুপৰি ৰাজ্যখনত এতিয়া আফ্ৰিকান চোৱাইন জ্বৰৰ তাণ্ডৱত বিধ্বস্ত পশুধন। সেয়ে কভিড ১৯ৰ ত্ৰাসৰ মাজতো কিছু সংখ্যক বেচৰকাৰী সংস্থাৰ সহযোগত নিজ দায়িত্ব পালনত আত্মনিয়োগ কৰি গৈছে কাজিৰঙা ৰাষ্ট্ৰীয় উদ্যান কৰ্তৃপক্ষই। বিগত সময়ছোৱাত কাজিৰঙাৰ কৰ্তৃপক্ষই কাজিৰঙা ৰাষ্ট্ৰীয় উদ্যানৰ কাষৰীয় পশুধনৰ কল্যাণ আৰু বন্য প্ৰাণীৰ সুৰক্ষাৰ বাবে জনসাধাৰণৰ পশুধনৰ ৰোগ প্ৰতিষেধক প্ৰদানৰ কাম কৰি আহিছে ৷
বিগত বৰ্ষৰ দৰে এই বছৰো ১ মে’ৰ পৰা এই কাৰ্য আৰম্ভ কৰিছে কাজিৰঙা ৰাষ্ট্ৰীয় উদ্যান কৰ্তৃপক্ষই ৷ কাজিৰঙাত কৰ্মৰত বেচৰকাৰী সংগঠন আৰণ্যক , বিশ্ব প্ৰকৃতি নিধি, ৱাইল্ড লাইফ ট্ৰাষ্ট অৱ ইণ্ডিয়া, ভূমি আৰু কৰবেট ফাউণ্ডেচনৰ সহযোগত আৰম্ভ কৰা পশুধনৰ প্ৰতিষেধক প্ৰদান অভিযান ইতিমধ্যেই ৰাষ্ট্ৰীয় উদ্যানখনৰ বোকাখাত বনাঞ্চলত সম্পূৰ্ণ হৈছে ৷
বোকাখাত বনাঞ্চলত কাষৰীয় গাঁৱৰ পশুধনৰ প্ৰতিষেধক প্ৰদান অভিযানেৰে ব্ৰহ্মপুত্ৰ নদীৰ ৫ টা চাপৰি আৰু ৩ খন গাওঁৰ মুঠ ৩,৩৭৬ টা গৰু ম’হক প্ৰতিষেধক প্ৰদান কৰে ৷ বোকাখাত মহকুমা পশু চিকিৎসা বিভাগৰ বিশেষ সহযোগত বোকাখাত বনাঞ্চলৰ ভক্তে চাপৰিত ২৪২ টা, গাভৰু চাপৰিৰ ৭২৭ টা লালুং চাপৰিৰ ৭৪৪ টা, বিলতীয়া চাপৰিৰ ৩৬৬ টা, চহলা গাওঁৰ ৪২১ টা , শিশুবাৰীৰ ৫২২ টা আৰু ধোবাআটি গাওঁৰ ৩৫৪ টা গৰু ম’হক প্ৰতিষেধক প্ৰদানৰ কাম সমাপ্ত কৰিছে উদ্যান কৰ্তৃপক্ষই ৷
নদীৰ চাপৰি বোৰত নিশা কটাই প্ৰতিষেধক প্ৰদানৰ কাম সম্পাদন কৰা দলটোত বোকাখাত মহকুমা পশু চিকিৎসা বিভাগৰ ডা৹ জানমনি শ্যাম, ডা৹ চৈয়দ মেহতাজ, ডা৹ বিশ্বজিত বৰুৱা, ডা৹ প্ৰনিতা কোঁৱৰ, ডা৹ দেৱব্ৰত ফুকন, ডা৹ অম্লান ফুকন আৰু দীপজ্যোতি হাঞ্চেৰ লগতে বিভাগটোৰ ক্ষেত্ৰ সহায়ক, গোপাল মিত্ৰ আৰু মৈত্ৰী সেৱক সকলে সহযোগ কৰে ৷ সমন্বয়ক হিচাবে দলটোৰ নেতৃত্ব দিয়ে গোলাঘাট জিলাৰ অনাৰেৰী ৱাইল্ড লাইফ ৱাৰ্ডেন তথা বোকাখাত প্ৰেছ ক্লাৱৰ সম্পাদক উত্তম শইকীয়াই ৷
জনসাধাৰণৰ পশুধন কল্যানৰ বাবে সম্পূৰ্ণ বিনামূলীয়াকৈ কৰা এই প্ৰতিষেধক প্ৰদানৰ বাবে বিশ্ব প্ৰকৃতি নিধিৰ তৰফৰ পৰা ঔষধৰ যোগান ধৰা হয় ৷ ট্ৰায়’ ভেক নামৰ এই ঔষধে জহৰ বাত , গল ফুলা নামৰ ৰোগৰ পৰা পশুধনক প্ৰতিৰক্ষা দিব বুলি বিভাগীয় তথ্যত প্ৰকাশ ৷ উল্লেখ্য যে ২০১৭ চনৰ পৰা ধাৰাবাহিক ভাৱে কাজিৰঙাৰ কাষৰীয় গাওঁ আৰু চাপৰিবোৰত এই অভিযান চলাই আহিছে কাজিৰঙা ৰাষ্ট্ৰীয় উদ্যানৰ কৰ্তৃপক্ষই ৷ ইয়াৰ দ্বাৰা কাজিৰঙাৰ বন্যপ্ৰাণীৰ সুৰক্ষাই নহয় কাষৰীয় গাওঁৰ জনসাধাৰণৰ পশুধনো সংক্ৰমিত ৰোগৰ পৰা সুৰক্ষিত হৈছে বুলি জনাইছে কাজিৰঙাৰ ডি এফ অ’ ৰমেশ কুমাৰ গগৈয়ে ৷
