বিশ্বকাপৰ পৰা বাহিৰ হোৱাৰ পিছত নেইমাৰ আৰু ক্রিষ্টিয়ানো ৰোনাল্ডোৱে চকুলো টুকি বিদায় লোৱাৰ দৃশ্য সকলোৱে প্ৰত্যক্ষ কৰিছে। কিন্তু ইজিপ্তক পৰাস্ত কৰি বিশ্বকাপৰ কোৱাৰ্টাৰ ফাইনেলত প্ৰৱেশ কৰাৰ পিছতো লিঅ’নেল মেছিয়ে (Leonel Messi) চকুলো নিগৰায় (eyes are watering)। মেচখনৰ অন্তত তেওঁ নিজৰ আৱেগক একেবাৰে নিয়ন্ত্ৰণ কৰিব পৰা নাছিল। তাৰেই বহিঃপ্ৰকাশ ঘটিছিল তেওঁৰ চকুলোত।
আনহাতে, পেনাল্টিত বিফল হোৱাৰ বাবেও তেওঁ নিজকে দোষাৰোপ কৰে। উল্লেখ্য যে ইয়াৰ পূৰ্বে আৰ্জেণ্টিনাই বিশ্বকাপৰ নকআউট মেচত দুটা গ’লত পিছপৰি থকাৰ পিছত কেতিয়াও জয়ী হোৱা নাই। আনকি এটা গ’লৰ পৰাও তেওঁলোকে উভতি ধৰিব পৰা নাই। অৱশ্যে ইজিপ্তৰ বিৰুদ্ধে ০-২ গ’লত পিছপৰি থাকিও ৩-২ গ’লৰ ব্যৱধানত দলটোৱে জয়লাভ কৰে। ইয়াৰ অন্তৰালত কিন্তু মেছিৰ অৱদান আছিল।
মেচৰ অন্তত মেছিয়ে কয়, “মেচৰ পিছত মই অতি সন্তুষ্টি অনুভৱ কৰিছিলোঁ। পেনাল্টিত বিফল হোৱাৰ পিছত মোৰ নিজৰ ওপৰত বহুত খং উঠিছিল। শ্বটটো লোৱা ধৰণটো একেবাৰেই সঠিক নাছিল। এটা গুৰুত্বপূৰ্ণ সময়ত দলটোক নিৰাশ কৰা যেন লাগিছিল। কিন্তু দিনটোৰ শেষত ভগৱানে মোৰ বাবে ভাল কিবা এটা লিখিছিল। মই সমতা স্থাপনৰ গ’লটো দিছিলোঁ। ইমানেই শান্তি আৰু সুখ অনুভৱ কৰিছিলোঁ যে মই ইয়াক প্ৰকাশ কৰিব নোৱাৰোঁ।”
কাবো ভাৰ্ডেৰ বিৰুদ্ধেও আৰ্জেণ্টিনা চাপত পৰিছিল। তাতো অতিৰিক্ত সময়ত জয়ী হ’বলগীয়া হৈছিল। ইজিপ্তৰ বিৰুদ্ধে বিজয়সূচক গ’লটো ষ্টপেজ টাইমত আহিছিল। কিন্তু দুয়োটা দলেই আৰ্জেণ্টিনাৰ দুৰ্বলতা উদঙাই দিলে। মেছিয়ে কয়, “আমি যদি পেনাল্টি স্পটৰ পৰা গ’ল দিলোঁহেঁতেন তেন্তে মেচখন ঘূৰি গ’লহেঁতেন। কাৰণ তাৰ আগতে আমি ভাল খেলি আছিলোঁ। তেওঁলোকে গ’ল দিয়াৰ পিছতো ভাল খেলিছিলোঁ। আমি কিছুমান ডাঙৰ সুযোগ সৃষ্টি কৰিছিলোঁ। মই অতি সুখী।”
