শুকুৰবাৰে পুৱাতেই চলিত এছিয়ান গেমছত (Asian Games 2026) ভাৰতে দুটাকৈ স্বৰ্ণ পদক লাভ কৰে। তাৰে এটা আহে অসমকন্যা লাভলীনাৰ হাতেৰে। লাভলীনা বৰগোঁহায়ে (Lavlina Borgohain) মহিলাৰ ৭৫ কেজি বক্সিং শাখাত স্বৰ্ণ পদক লাভ কৰে। আনহাতে, মহিলাৰ ৰিকাৰ্ভ আৰ্ছাৰীৰ দলীয় ইভেণ্টতো সোণৰ পদক লাভ কৰে। অৱশ্যে ৰিকাৰ্ভ আৰ্ছাৰীৰ মিক্সড দলীয় ইভেণ্টত ভাৰতীয় দলটোৱে ৰূপৰ পদক লাভ কৰিয়েই সন্তুষ্ট হ’বলগীয়া হয়।
আশা কৰা মতেই নাগোয়া গেমছত লাভলীনাই সোণৰ পদক লাভ কৰে। অলিম্পিকৰ পদক বিজয়ী ভাৰতীয় বক্সাৰগৰাকীয়ে ফাইনেলত চীনৰ বাও জিয়ায়ীক পৰাস্ত কৰে। ফাইনেলৰ আৰম্ভণিৰে পৰাই লভলীনাই আগ্ৰাসী ৰূপ ধাৰণ কৰিছিল। প্ৰথম ৰাউণ্ডত ৩-২ ব্যৱধানত জয়লাভ কৰে। দ্বিতীয় ৰাউণ্ডত লাভলীনাই নিজৰ গতি আৰু বৃদ্ধি কৰে। তেওঁ জিয়ায়ীক কোনো সুযোগ নিদিলে। ফলত লাভলীনাৰ পক্ষত পইণ্টৰ ব্যৱধান ৪-১ হয়। তৃতীয় ৰাউণ্ডতো লাভলীনাৰ সুবিধা ল’ব নোৱাৰিলে চীনা বক্সাৰগৰাকীয়ে। তৃতীয় ৰাউণ্ডত ৪-১ ব্যৱধানত জয়লাভ কৰে লাভলীনাই। বিগত এছিয়ান গেমছত লাভলীনাই ৰূপৰ পদক লাভ কৰিছিল। এইবাৰ তেওঁ পদকৰ ৰং সলনি কৰিলে। তেওঁৰ জন্মদিনতেই প্ৰাক্তন বিশ্ব চেম্পিয়ন অসমকন্যা লাভলীনাই এছিয়ান গেমছৰ স্বৰ্ণ পদক লাভ কৰে। উল্লেখ্য যে শুকুৰবাৰে লাভলীনাই ২৯ বছৰ সম্পূৰ্ণ কৰিলে।
লাভলীনাৰ পূৰ্বে মহিলা খেলুৱৈসকলেও দেশৰ বাবে দিনটোৰ প্ৰথমটো সোণৰ পদক কঢ়িয়াই আনিছিল। মহিলাৰ ৰিকাৰ্ভ আৰ্ছাৰী দলীয় ইভেণ্টত ভাৰতে স্বৰ্ণ পদক লাভ কৰে। ছেমিফাইনেলত অংকিতা ভকত, কীৰ্তি আৰু কুমকুম মহম্মদে চীনক ৫-১ ব্যৱধানত পৰাস্ত কৰে। ভাৰতীয় দলটোৱে প্ৰথম ছেটত ৫৩-৫১ ব্যৱধানত জয়লাভ কৰে। দ্বিতীয় ছেট ৫৪-৫২ পইণ্টেৰে জয়ী হয়। তৃতীয় ছেটত ৫১-৫১ পইণ্টৰ ড্ৰ’ হৈছিল, গতিকে চতুৰ্থ ছেট খেলাৰ কোনো প্ৰয়োজন নাছিল। ফাইনেলত ভাৰতৰ প্ৰতিদ্বন্দ্বী আছিল দক্ষিণ কোৰিয়া। ৫-৩ পইণ্টেৰে ফাইনেলত জয়লাভ কৰে ভাৰতে। দুই দলৰ মাজত কঠোৰ যুঁজ হয়। প্ৰথম ছেটত ৫৪-৫৪ পইণ্টত ড্ৰ’ হয়। দ্বিতীয় ছেটতো দুয়োটা দলে ৫৬ পইণ্ট লাভ কৰে। তৃতীয় ছেটত ভাৰতীয় দলে অগ্ৰগতি লাভ কৰে। ৫৫-৫১ ব্যৱধানত জয়লাভ কৰি আৰামদায়ক স্থানলৈ গতি কৰে। চতুৰ্থ ছেটত পুনৰ ৫৪-৫৪ পইণ্টেৰে ড্ৰ’ হয়। ইয়াৰ লগে লগে ভাৰতীয় ধনুৰ্বিদসকলে এইবাৰৰ গেমছত চাৰিটাকৈ স্বৰ্ণ পদক লাভ কৰে।
মহিলা ইভেণ্টত জয়ী হোৱাৰ পাছতো ভাৰতে ৰিকাৰ্ভ আৰ্ছাৰীৰ মিক্সড দলীয় ইভেণ্টত পৰাস্ত হয়। ভাৰতীয় দলটোৱে ছেমিফাইনেলত জাপানক ৫-৩ ব্যৱধানত পৰাস্ত কৰি ফাইনেলত প্ৰৱেশ কৰে। কিন্তু ফাইনেলত চীনৰ হাতত ৩-৫ ব্যৱধানত পৰাস্ত হয়। কুমকুম-ধীৰাজ বোম্মাদেৱৰ যুটিয়ে ফাইনেলত ভাল আৰম্ভণি কৰিব পৰা নাছিল। প্ৰথম ছেটত ৩৪-৩৮ আৰু দ্বিতীয় ছেটত ৩৫-৩৭ ব্যৱধানত পৰাস্ত হৈ ভাৰতীয় যুটিটোৱে চাপত পৰিছিল। তৃতীয় ছেটত ৩৭-৩৬ ব্যৱধানত জয়লাভ কৰি আশা সজীৱ কৰি ৰাখে যদিও সেয়া সফল নহ’ল। চতুৰ্থ ছেটত ৩৭-৩৭ পইণ্টত ড্ৰ’ হয়।
