ASSAM TIMES POST
নিউজ ডেস্ক:
মাহ দিয়েক পূৰ্বে বঙ্গত তাণ্ডৱ চলাইছিল ঘূৰ্ণিবতাহ বুলবুলে। এইবাৰ তাতে যোগ দিলে আমফানে। আমফানৰ তাণ্ডৱত ধ্বংস হৈ গৈছে বঙ্গ। বুধবাৰে মন্ত্ৰী পৰিষদৰ লগত বহি এনেকুৱা এটাই জনালে মুখ্যমন্ত্রী মমতা বেনাৰ্জীয়ে। তেওঁ জনায়, ধুমুহাৰ সম্পূৰ্ণখিনিয়ে বঙ্গৰ ওপৰেদিয়ে গৈছে। ইয়াৰ ফলত যোগাযোগ বিচ্ছিন্ন হৈ গৈছে। প্রচুৰ ক্ষয়ক্ষতি হৈছে। কমপক্ষেও ১০-১২ জনৰ মৃত্যুৰ খবৰ পোৱা গৈছে বুলিও জনায় মুখ্যমন্ত্রীয়ে।
আমফানৰ প্রভাৱত মঙ্গলবাৰৰ পৰা বৃষ্টিপাত আৰম্ভ হৈছিল ৰাজ্যৰ বিভিন্ন জিলাত। বুধবাৰে সেয়া চৰম আকাৰ ধাৰণ কৰে। গোটেই দিন বৰষুণ আৰু ধুমুহা। সন্ধ্যা ৬.৩০টাত সুন্দৰবনত আমফানে খুন্দা মাৰি পৰিস্থিতি চৰম আকাৰ ধাৰণ কৰে। সন্ধ্যা ৭.২০ত কলকাতাত আমফানৰ গতিবেগ আছিল সর্বোচ্চ, ঘণ্টাত ১৩৩ কিলোমিটাৰ। ৮টাৰ পিছত পৰিস্থিতি কিছু শান্ত হ’লেও, বিপদ সম্পূৰ্ণ আঁতৰা নাই বুলি উল্লেখ কৰে মমতাই।
আনহাতে, ধ্বংসৰ সামগ্ৰিক ছবিখন বুজিবলৈ ১০-১২ দিন লাগিব বুলিও তেওঁ প্ৰকাশ কৰে।
