ASSAM TIMES POST
নিউজ ডেস্ক:
লকডাউনৰ ফলত দেশত অন্যান্য খণ্ডৰ লগতে শিক্ষা খণ্ডতো ব্যাপক ক্ষতি হৈছে৷ ছাত্ৰ-ছাত্ৰীক ম’বাইল ফোনৰ জৰিয়তে শিক্ষা প্ৰদান কৰা হৈছে৷ কিন্তু একাংশ ছাত্ৰ-ছাত্ৰী এনে শিক্ষা দানৰ পৰা বিৰত থাকিব লগা হৈছে৷ যিহেতু দৰিদ্ৰ শ্ৰেণীৰ পৰিয়ালত নাই পাঠ গ্ৰহণ কৰিব পৰাকৈ উপযুক্ত ম’বাইল ফোন৷ এনে সময়তে কেন্দ্ৰীয় চৰকাৰে অহা জুলাই মাহত দেশৰ বিদ্যালয়সমূহ খোলাৰ চিন্তা-চৰ্চা কৰিছে। উল্লেখ্য যে যোৱা মাৰ্চ মাহৰ পৰা বন্ধ হৈ আছে বিদ্যালয়বোৰ৷ এই বিদ্যালয়বোৰ জ’ন হিচাপে খোলাৰ পৰিকল্পনা হাতত লৈছে। প্ৰথম অৱস্থাত গ্ৰীন আৰু অৰেঞ্জ জ’নত খোলা হ’ব বিদ্যালয়বোৰ। কিন্তু, বিদ্যালয়ত উপস্থিত থাকিব কেৱল ৩০ শতাংশ ছাত্ৰ–ছাত্ৰী। অষ্টম শ্ৰেণীলৈ ছাত্ৰ–ছাত্ৰীসকলে পূর্ণ পৰ্যায়ত বিদ্যালয় খোলালৈ অপেক্ষা কৰিব লাগিব।আনহাতে নৱম শ্ৰেণীৰ পৰা ছাত্ৰ-ছাত্ৰীসকল বিদ্যালয়লৈ যাব পাৰিব৷ তদুপৰি কণ কণ শিশুসকলক ঘৰতে পঢ়িবলৈ আহ্বান জনাইছে কেন্দ্ৰীয় চৰকাৰে। বিদ্যালয় খোলাৰ সম্পৰ্কত নীতি–নিৰ্দেশনাসমূহক লৈ চূড়ান্ত সিদ্ধান্ত গ্ৰহণ কৰাৰ পিছত এই সপ্তাহৰ অন্তিমফালে জাৰি কৰিব।
১৬ মাৰ্চৰ পৰা বন্ধ হৈ থকা বিদ্যালয়সমূহ খুলিলে ৩০ শতাংশ ছাত্ৰ–ছাত্ৰীৰ উপস্থিতিৰে দুটাকৈ ছিফ্টত পাঠদান হ’ব বুলি প্ৰাপ্ত তথ্যত প্ৰকাশ৷ আনহাতে কেন্দ্ৰীয় মানৱ সম্পদ দপ্তৰে যিবোৰ নিৰ্দেশনা জাৰি কৰিব এই সকলোবোৰ মানিব লাগিব বিদ্যালয়ৰ শিক্ষক-শিক্ষয়িত্ৰীসকলে। বিশেষকৈ সামাজিক দূৰত্বৰ ওপৰত প্ৰদান কৰা হ’ব গুৰুত্ব। তিনিখন আসন থকা এখন বেঞ্চত বহিব পাৰিব কেবল দুজন শিক্ষাৰ্থী। ছাত্ৰ-ছাত্ৰীয়ে সামাজিক দূৰত্ব মানিছে নে নাই, এই সকলো চি চি টিভিত পৰ্যবেক্ষণ কৰিবলৈ শিক্ষক-শিক্ষয়িত্ৰীসকলক নিৰ্দেশ প্ৰেৰণ কৰা হৈছে তদুপৰি প্ৰতিখন জিলাৰ শিক্ষা বিষয়া অথবা বিদ্যালয় পৰিদর্শকক সকলো দিশ চোৱা-চিতা কৰাৰ দায়িত্ব প্ৰদান কৰা হৈছে। আনহাতে ছাত্ৰ-ছাত্ৰীসকলৰ উপৰি শিক্ষক-শিক্ষয়িত্ৰীসকলে পৰিধান কৰিব লাগিব মাস্ক। উল্লেখযোগ্য যে ছিকিমৰ সকলো বিদ্যালয় আৰু মহাবিদ্যালয় ১৫ জুনৰ পৰা খোলাৰ সিদ্ধান্ত গ্ৰহণ কৰিছে।
