ASSAM TIMES POST
ষ্টাফ ৰিপ’ৰ্টাৰ,ডিফু:
এজনো কৰ’ণাক্ৰান্ত নথকা তিনি পাৰ্বত্য জিলাত অস্বাভাৱিক ভাবে ক্ৰমাৎ বৃদ্ধি পাব ধৰিছে ক’ৰোনা ৰোগীৰ আক্ৰান্তৰ সংখ্যাই ৷ কালি বোকাজানত দুজনকৈ লোক ক’ভিড19 ত আক্ৰান্ত ৰোগীৰ খবৰ পোৱাৰ পিছত আজি পুণৰ কাৰবি আংলঙ জিলাৰ বকলীয়াঘাটত আন দুজন লোক ক’ভিড আক্ৰান্ত বুলি স্বাস্থ্য মন্ত্ৰী ডাঃ হিমন্ত বিশ্ব শৰ্মাৰ টুইটৰ পিছতে জিলাখনত তীব্ৰ চাঞ্চল্যৰ সৃষ্টি হৈছে ৷
ক’ভিড আক্ৰান্ত লোক বকলীয়াঘাটৰ ৰূকাচেন মহাবিদ্যালয়ৰ সমীপত কোৱাৰেণ্টাইন হৈ থকা বুলি জানিব পৰা গৈছে লগতে দুয়োগৰাকীৰ দেহত ক’ভিড 19 ৰ উপস্থিতি পোৱা গৈছে বুলি জানিব পৰা গৈছে ৷ নতুনকৈ আক্ৰান্ত যুৱক দুজন ক্ৰমে, তাৰাবাছাৰ ৰাজীৱ তেৰাঙ(২৪) আৰু আনজন মিৰ্দু পথাৰ মুৰা গাঁৱৰ বালা বাগলাৰী(২১) বুলি চিনাক্ত কৰা হৈছে ৷ ইয়াৰে ৰাজীৱ তেৰাঙ হায়দৰাবাদৰ পৰা অহাৰ বিপৰীতে বালা বাগলাৰী আহিছিল চেন্নাইৰ পৰা ৷
দুয়ো ২১ মে’ত অসমলৈ অহাৰ পিছত ২২ মে’ৰ পৰা দুয়ো বকলীয়াঘাট কোৱাৰেণ্টাইন হৈ আছিল ৷ দুয়োৰে দেহত মাৰাত্মক কৰ’ণা ভাইৰাছৰ উপস্থিতি ধৰা পেলোৱাৰ পিছত দুয়োকে চিকিৎসাৰ বাবে ডিফু চিকিৎসা মহাবিদ্যালয়ৰ পুৰণি বিল্ডিঙৰ ক’ৰোনা চিকিৎসা কোষলৈ প্ৰেৰণৰ ব্যৱস্থা কৰা হয় ৷
উল্লেখযোগ্যযে ইয়াকে লৈ তিনি পাৰ্বত্য জিলা ক’ৰোনা ত আক্ৰান্তৰ সংখ্যা ১৭ জনলৈ বৃদ্ধি পাইছে ৷ ইয়াৰে কাৰবি আংলঙত ৬ জন, পশ্চিম কাৰবি আংলঙত ৪ জন আৰু ডিমা হাচাওত ৭ জন ৷ পাৰ্বত্য জিলা তিনিখনৰ বৰ্দ্ধিত ক’ৰোনা ৰোগীয়ে সচেতন মহলক শংকিত কৰি তোলা পৰিলক্ষিত হৈছে ৷
