ASSAM TIMES POST
অজন্তা তালুকদাৰ
বোকাখাত : বোকাখাত আৰক্ষী থানা চৌহদত আৰক্ষীৰ বাবে নিৰ্মান হ’ব ২.৫০ কোটি টকাৰ অত্যাধুনিক আৱাসিক প্ৰকল্প ৷ আজি বোকাখাত আৰক্ষী থানাত স্থানীয় সাংবাদিকেৰে হোৱা এক সৌজন্যমূলক বাৰ্তালাপত এই কথা ঘোষণা কৰে অসম আৰক্ষীৰ সঞ্চালক প্ৰধান ভাস্কৰ জ্যোতি মহন্তই ৷ গুৱাহাটিৰ পৰা দেৰগাওঁলৈ বুলি অহা সঞ্চালক প্ৰধান গৰাকীয়ে বোকাখাত আৰক্ষী থানাত বোকাখাতৰ সাংবাদিকৰ এক সঁজাতি দলৰ সৈতে সৌজন্যমূলক বাৰ্তালাপ কৰে ৷
বোকাখাত মহকুমাৰ সমূহ সাংবাদিকৰ হৈ জ্যেষ্ঠ সাংবাদিক ক্ৰমে জিতু শৰ্মা ৰজখোৱা , বুবুল দত্ত , নীলু আচাৰ্য আৰু উত্তম শইকীয়াই কভিড ১৯ ৰ সংক্ৰমন প্ৰতিৰোধৰ বাবে অসম আৰক্ষীয়ে লোৱা গুৰুত্বপূৰ্ণ ভূমিকাৰ বাবে সঞ্চালক প্ৰধান গৰাকীক ধন্যবাদ জ্ঞাপন কৰে ৷ এই আলোচনাতে বোকাখাত আৰক্ষী থানা চৌহদত বোকাখাত আৰক্ষীৰ সুবিধাৰ্থে আৱাসিক প্ৰকল্পৰ কাম আৰম্ভ কৰাৰ কথা তেওঁ ঘোষণা কৰে ৷ এই আৱসিক প্ৰকল্পৰ কাম গোলাঘাট জিলাৰ কেউটা মহকুমাতে হ’ব বুলিও তেওঁ জনায় ৷ সৌজন্যমূলক এই আলোচনাত গোলাঘাটৰ আৰক্ষী অধীক্ষক পুস্পৰাজ সিং আৰু বোকাখাতৰ মহকুমা আৰক্ষী বিষয়া পৃথ্বীৰাজ ৰাজখোৱাও উপস্থিত থাকে ৷
