শুনানিৰ প্ৰথমদিনাই অনুপস্থিত আছিল চিবিআইৰ অধিবক্তা। চিকিৎসা প্ৰৱেশ পৰীক্ষা (NEET-UG) ২০২৬ প্ৰশ্নকাকত ফাদিল গোচৰত (Paper leak case) গঠন হোৱা ফাষ্ট ট্ৰেক আদালতত শুনানিৰ দ্বিতীয়দিনা ন্যায়াধীশগৰাকীক বদলি কৰা হয়। প্ৰশ্নকাকত ফাদিল গোচৰত গঠন হোৱা ফাষ্ট ট্ৰেক আদালতৰ বিশেষ ন্যায়াধীশ অনু গ্ৰ’ভাৰ বালিগাই (Justice Anu Grover Baliga) ২৫ জুলাইত দায়িত্ব লৈছিল। কিন্তু মাত্ৰ এসপ্তাহতে তেওঁ বদলি (Transfer within a week) হয়।
ইয়াৰ পূৰ্বে নীটৰ আন এক প্ৰশ্নকাকত ফাদিল গোচৰৰ শুনানিৰ অভিজ্ঞতা থকা ন্যায়াধীশ অজয় গুপ্তাক ২০২৬ চনৰ প্ৰশ্নকাকত ফাদিল গোচৰত ফাষ্ট ট্ৰেক আদালতৰ দায়িত্ব দিয়া হয়। সন্ত্ৰাসবাদৰ গোচৰৰ বিচাৰৰ বাবে ৰাষ্ট্ৰীয় অনুসন্ধান সংস্থা (এন আই এ) আইনৰ অধীনত গঠন কৰা বিশেষ আদালতলৈ বদলি কৰা হৈছে ন্যায়াধীশ বালিগাক। সোমবাৰে দিল্লী উচ্চ ন্যায়ালয়ৰ অধীনস্থ আদালতৰ ১৩৮ গৰাকী ন্যায়াধীশক সালসলনি কৰা হয়। এই তালিকাত আছে ন্যায়াধীশ বালিগা আৰু ন্যায়াধীশ গুপ্তা।
উল্লেখ্য যে ২৭ জুলাইৰ প্ৰথম দিনটোত ফাষ্ট ট্ৰেক আদালতৰ ন্যায়াধীশ বালিগাই অভিযুক্ত বিকাশ বিৱাল আৰু দীনেশ বিৱালৰ জামিন আবেদনৰ শুনানি গ্ৰহণ কৰি আছিল। কিন্তু পুৱা ১০.৪৫ বজালৈকে চিবিআইৰ হৈ কোনো চৰকাৰী আইনজীৱী উপস্থিত নথকাৰ বাবে গভীৰ অসন্তুষ্টি প্ৰকাশ কৰি শুনানি স্থগিত ৰাখে। ভৱিষ্যতে এনে অপ্ৰীতিকৰ পৰিস্থিতিৰ পৰা হাত সাৰিবলৈ তেওঁ ‘অভিযোগ সঞ্চালক’ক তৎক্ষণাত এজন বিশেষ চৰকাৰী অধিবক্তা নিযুক্তি দিবলৈ নিৰ্দেশ দিয়ে।
নীট প্ৰশ্নকাকত ফাদিলক লৈ ককৰোচ জনতা পাৰ্টীৰ আন্দোলনৰ মাজতে ২৩ জুলাইৰ পুৱা প্ৰধানমন্ত্ৰী নৰেন্দ্ৰ মোদীয়ে ঘোষণা কৰিছিল যে ২০২৬ চনৰ নীট প্ৰশ্নকাকত ফাদিলৰ সৈতে জড়িত লোকসকলক ক্ষিপ্ৰ আৰু কঠোৰ শাস্তি নিশ্চিত কৰিবলৈ ‘ফাষ্ট ট্ৰেক কোৰ্ট’ গঠন কৰা হ’ব। উল্লেখ্য যে সেইদিনা দুপৰীয়া চিবিআয়ে ২০২৪ চনৰ নীট প্ৰশ্নকাকত ফাদিল গোচৰৰ মূল অভিযুক্ত সঞ্জীৱ মুখিয়াক ৰেহাই দি আদালতত কয় যে তেওঁৰ বিৰুদ্ধে প্ৰশ্নকাকত চুৰি বা বিক্ৰী কৰাৰ কোনো প্ৰমাণ নাই। যদিও বিহাৰ আৰক্ষীয়ে প্ৰথমে মুখিয়াক অভিযুক্ত হিচাপে ঘোষণা কৰিছিল, চিবিআইৰ এই ৰেহাইক লৈও ইতিমধ্যে প্ৰশ্ন উত্থাপন হৈছে।
