ASSAM TIMES POST
নগাঁও: পেট্ৰ’ল- ডিজেলৰ অস্বাভাৱিক মূল্যবৃদ্ধিৰ বিৰুদ্ধে আজি নগাঁও জিলা কংগ্ৰেছে প্ৰতিবাদ সাব্যস্ত কৰে । নগাঁও জিলা উপায়ুক্ত কাৰ্যালয়ৰ সমীপত আজি পুৱা কংগ্ৰেছৰ নেতা-কৰ্মী সকল সমৱেত হৈ,”নৰেন্দ্ৰ মোডী হায় হায়” , “অমিত শ্বাহ হায় হায়” , “বিজেপি হায় হায়”আদি শ্ল’গান দিয়ে।
ইয়াৰ পূর্বে নগাঁও চহৰৰ ৰাজপথত মটৰ চাইকেল ঠেলি ঠেলি কংগ্ৰেছ কৰ্মীয়ে অভিনৱ প্ৰতিবাদ সাব্যস্ত কৰে । পাছত তেওঁলোকে জিলা উপায়ুক্তৰ জৰিয়তে ভাৰতবর্ষৰ ৰাষ্ট্ৰপতিলৈ স্মাৰকপত্ৰ প্ৰেৰণ কৰে।
নগাঁও জিলা কংগ্ৰেছৰ উদ্যোগত উপায়ুক্তৰ কাৰ্যালয়ৰ সমীপত ৰূপায়িত এই ধৰ্ণা কাৰ্যসূচীত প্ৰাক্তন মন্ত্ৰী তথা বিৰোধী দলৰ উপ দলপতি ৰকিবুল হুছেইন, নগাঁও জিলা কংগ্ৰেছৰ সভাপতি তপন কুমাৰ শৰ্মা, বিধায়ক নুৰুল হুদা, প্ৰাক্তন বিধায়ক ডাঃ দুৰ্লভ চমুৱা প্ৰমুখ্যে কংগ্ৰেছৰ ভালেসংখ্যক নেতা-কৰ্মীৰ লগতে যুৱ কংগ্ৰেছ, এন এছ ইউ আই আৰু মহিলা কংগ্ৰেছৰ কৰ্মীসকলে অংশগ্ৰহণ কৰে ।
কংগ্ৰেছৰ কৰ্মীসকলে এই প্ৰতিবাদৰ জৰিয়তে পেট্ৰ’ল ডিজেলৰ লগতে অত্যাৱশকীয় সামগ্ৰীৰ মূল্যবৃদ্ধিৰ বিৰোধিতা কৰাৰ উপৰিও টোল গেটৰ বিৰুদ্ধেও সৰৱ হৈ পৰে । ইপিনে , শাসনাধিষ্ঠিত চৰকাৰখনে কৰ’নাক লৈ ৰাজনীতি কৰা বুলি কংগ্ৰেছৰ নেতা-সকলে গুৰুতৰ অভিযোগ উত্থাপন কৰে ।
