নগাঁও : চলিত বৰ্ষৰ উচ্চ আৰু উচ্চতৰ মাধ্যমিক চূড়ান্ত পৰীক্ষাত ৰাজ্যখনৰ ভিতৰতে স্থান লাভ কৰা নগাঁৱৰ কেইবাগৰাকী ছাত্ৰ-ছাত্ৰীক আজি অসম শিল্প কানন নামৰ সামাজিক-সাংস্কৃতিক অনুষ্ঠানটোৱে ঘৰে ঘৰে গৈ সম্বৰ্ধনা জ্ঞাপন কৰে। তদুপৰি সুখ্যাতিৰে উত্তীৰ্ণ হোৱা দহগৰাকী দৰিদ্ৰ মেধাৱী ছাত্ৰ-ছাত্ৰীকো সম্বৰ্ধনা জনোৱা হয়। আনহাতে, ফলাফলৰ ক্ষেত্ৰত উজ্বলি উঠা নগাঁৱৰ ৰামানুজন কনিষ্ঠ মহাবিদ্যালয়ৰ অধ্যক্ষ দিলীপ কুমাৰ বৰাকো শিল্পী কাননে সম্বৰ্ধনা জ্ঞাপন কৰে।
উল্লেখ্য, চলিত বর্ষৰ উচ্চতৰ মাধ্যমিক চূড়ান্ত পৰীক্ষাৰ কলা আৰু বিজ্ঞান শাখাত ৰামানুজন কনিষ্ঠ মহাবিদ্যালয়ৰ ১৯ গৰাকী ছাত্ৰ-ছাত্ৰীয়ে ৰাজ্যখনৰ ভিতৰতে প্ৰথম ১০টা স্থানৰ ভিতৰত স্থান দখল কৰি ফলাফলৰ ক্ষেত্ৰত এক অভিলেখ সৃষ্টি কৰাৰ লগতে শৈক্ষিক ক্ষেত্রত নগাঁও জিলাক উজ্বলাই তোলে । সম্বৰ্ধনা অনুষ্ঠানত শিল্পী কাননৰ হৈ প্ৰভাত বৰা, মৃগেন শৰ্মা, মামণি দেৱী বৰা, ৰিণি নেওগ বৰা, মিনু হাজৰিকা, মমী শইকীয়া, গুণজিৎ দাস, মৃদুপৱন বৰা আদিয়ে অংশগ্ৰহণ কৰে।
