ষ্টাফ ৰিপ’ৰ্টাৰ:
লকডাউন-সান্ধ্য আইন ভংগ কৰি গুৱাহাটীত ব্ৰহ্মপুত্ৰৰ বুকুত বিলাসী জাহাজত মদ আৰু সুৰাৰে নৈশ ভোজ অংশীদাৰী হোৱা আৰক্ষী বিষয়াক শাস্তিমূলক বদলি।পানবজাৰ থানাৰ সহকাৰী আৰক্ষী আয়ুক্ত লৱ কুমাৰ ডেকাৰ জন্মদিনৰ পাৰ্টীত অংশগ্ৰহণ কৰা আৰক্ষীৰ বিষয়া সকলক গুৱাহাটীৰ আৰক্ষী আয়ুক্তালয়ে শাস্তিমূলক বদলি কৰিছে।
মুখ্যমন্ত্ৰী সোনোৱালৰ নিৰ্দেশ মৰ্মে গৃহবিভাগে শাস্তিমূলকভাৱে বদলি কৰিছে মদে-মাংসই পাৰ্টী কৰা আৰক্ষী বিষয়াকেইজনক।বদলি কৰা আৰক্ষীৰ বিষয়া সকলৰ ভিতৰত আছে এজন উপ আৰক্ষী আয়ুক্ত, চাৰিগৰাকী সহকাৰী আৰক্ষী আয়ুক্ত, দুগৰাকী আৰক্ষী উপ পৰিদৰ্শক আৰু এগৰাকী সহকাৰী উপ-পৰিদৰ্শক।
গৌতম বৰাক গুৱাহাটী মধ্যম আৰক্ষী জিলাৰ ডিচিপিৰ দায়িত্ব দিয়া হৈছে। কাহিলিপাৰাৰ ১০নং এপিবিএনৰ কামাণ্ডেণ্ট আছিল। তেওঁৰ ঠাইত কাছাৰৰ এছপি মানৱেন্দ্ৰ দেৱ ৰয়ক উক্ত স্থানত নিয়োগ কৰা হৈছে।
ডিচিপি লংনিট টেৰণক বিআইইঅৰ আৰক্ষীৰ অধীক্ষক হিচাপে বদলি।মাত্ৰ দুটা দিন পূৰ্বে বিআইইঅ এছপি ৰূপে যোগদান কৰা স্বপ্ননীল ডেকাক বদলি কৰা হৈছে শদিয়ালৈ।
নুনমাটিৰ এচিপি জিকিৰাণী মহন্তক মান্দাকাটাৰ বেটেলিয়নলৈ বদলি কৰা হৈছে।জন্ম দিন আয়োজন কৰা পাণবজাৰ এচিপি লৱ কুমাৰ ডেকাক চতুৰ্থ অসম আৰক্ষী বেটেলিয়নলৈ বদলি কৰি তেওঁৰ ঠাইত বঙাইগাঁৱৰ ডিচিপি মৈত্ৰেয়ী ডেকাক পাণবজাৰত নিয়োগ কৰা হৈছে।
পানবজাৰৰ মহিলা আৰক্ষী থানাৰ এচিপি অৰুণিমা ভূঞাক চতুৰ্থ অসম আৰক্ষী বেটেলিয়নলৈ বদলি কৰা হৈছে।তেওঁৰ ঠাইত নিয়োগ কৰা হৈছে জালুকবাৰীৰ এচিপিৰ ৰ’জী তালুকদাৰক।
বিআইইঅ ডিএছপি অমৃতৰাজ চৌধুৰীক বঙাইগাঁৱলৈ বদলি কৰা হয়।পাণবজাৰ থানাৰ অচি হেমেন দাসক উত্তৰ শালমাৰালৈ বদলি কৰা হৈছে।
