ষ্টাফ ৰিপ’ৰ্টাৰ:
নগাঁও : প্ৰাক্তন কেন্দ্রীয় ৰেলৰাজ্য মন্ত্ৰী ৰাজেন গোঁহাই আৰু নগাঁও সদৰ সমষ্টিৰ বিধায়ক ৰূপক শৰ্মাৰ মাজত বৰ্তমান চলি থকা সংঘাতৰ কথা সৰ্বজনবিদিত। বিগত লোকসভা নিৰ্বাচনত ৰাজেন গোঁহাইৰ পৰিৱৰ্তে ৰূপক শৰ্মাক বিজেপি দলে নগাঁও লোকসভা সমষ্টিৰ প্ৰাৰ্থী হিচাপে প্ৰক্ষেপ কৰাৰ পিচতে প্ৰাক্তন ৰেলৰাজ্য মন্ত্ৰী গোঁহাই আৰু বিধায়ক ৰূপক শৰ্মাৰ মাজত সম্পৰ্কৰ দ্ৰুত অৱনতি ঘটিবলৈ ধৰে।
শেহতীয়াভাৱে প্ৰাক্তন মন্ত্ৰী ৰাজেন গোঁহাইয়ে সংবাদ মেলৰ আয়োজন কৰি নগাঁৱৰ উন্নয়ণৰ কৃতিত্ব কেৱল তেওঁৰহে বুলি দাবী কৰিছিল। আনকি অনাগত বিধানসভা নিৰ্বাচনত গোঁহাইয়ে নগাঁও অথবা বঢ়মপুৰ বিধানসভা সমষ্টিত দলীয় টিকট বিচাৰিব বুলিও ঘোষণা কৰে। আনহাতে প্ৰাক্তন কেন্দ্রীয় ৰেলৰাজ্য মন্ত্ৰী ৰাজেন গোঁহাইৰ এনে মন্তব্যৰ পিচতে বিধায়ক ৰূপক শৰ্মাই নগাঁৱৰ উন্নয়ণৰ কৃতিত্ব কেৱল কেন্দ্ৰ আৰু ৰাজ্যৰ শাসনত থকা বিজেপি চৰকাৰৰহে বুলি উল্লেখ কৰে।
এই উন্নয়ণৰ দাবীদাৰ কোনো ব্যক্তিবিশেষৰ নহয় বুলিও বিধায়ক শৰ্মাই স্পষ্ট কৰি দিয়ে। ইপিনে সংবাদ মাধ্যমত ৰাজেন গোঁহাই আৰু ৰূপক শৰ্মাৰ সংঘাতৰ বিষয়েও ব্যাপক চৰ্চা চলিব ধৰে। আনহাতে আজি নগাঁও খগেন মহন্ত প্ৰেক্ষাগৃহত প্ৰধানমন্ত্ৰী আৱাস যোজনাৰ দ্বিতীয় পৰ্য্যায়ৰ আধাৰশিলা অনুষ্ঠানত দীৰ্ঘ সময় বিৰতিৰ পাচত একেখন মঞ্চতে আসন গ্ৰহণ কৰিলে প্ৰাক্তন মন্ত্ৰী ৰাজেন গোঁহাই আৰু বিধায়ক ৰূপক শৰ্মাই।
মুখ্যমন্ত্ৰী সৰ্বানন্দ সোণোৱাল, মন্ত্ৰী কেশৱ মহন্ত আৰু পীযূষ হাজৰিকাই অংশগ্ৰহণ কৰা এই অনুষ্ঠানৰ আদৰণি পৰ্বত দেখা এক দৃশ্যই বহুতৰে দৃষ্টি আকৰ্ষণ কৰে । মুখ্যমন্ত্ৰী আৰু মন্ত্ৰী দ্বয়ক আদৰণি জনোৱাৰ পিচতে বিধায়ক ৰূপক শৰ্মাক জিলা প্ৰশাসনে আদৰণি জনাবলৈ আগবাঢ়ি আহে । কিন্তু সেই সময়ত বিধায়ক শৰ্মাই তেওঁৰ পৰিৱৰ্তে প্ৰথম ৰাজেন গোঁহাইক আদৰণি জনাবলৈ অনুৰোধ জনায়।
জিলা প্ৰশাসনে ৰূপক শৰ্মাৰ অনুৰোধ ৰক্ষা কৰি বিজেপিৰ জ্যেষ্ঠ নেতা প্ৰাক্তন মন্ত্ৰী ৰাজেন গোঁহাইক আদৰণি জনায়। গোঁহাইক আদৰণি জনোৱাৰ পাচত বিধায়ক ৰূপক শৰ্মাক আদৰণি জনোৱা হয় । বৰ্তমানৰ ৰাজনৈতিক পৰিৱেশত বিধায়ক গৰাকীৰ এনে কাৰ্যক একাংশই জ্যেষ্ঠজনৰ প্ৰতি সন্মান বুলি অভিহিত কৰাৰ বিপৰীতে আন একাংশই আকৌ ইয়াক ৰাজনৈতিক তিক্ততা দূৰীকৰণৰ প্ৰচেষ্টা বুলিও কব খোজে ।
