জয়চিং টকবি:
আজি শুভদিনত অসম সাহিত্য সভাৰ সম্পাদক (ডিফু আঞ্চলিক কাৰ্যালয়)ৰ আমন্রণ ক্রমে ভাৰতবৰ্ষৰ অন্যতম শ্ৰেষ্ঠ উপন্যাস ৰংমিলিৰ হাঁহিৰ স্ৰষ্টা, অসম সাহিত্য সভাৰ প্ৰাক্তন সভাপতি পদ্মশ্ৰী ৰংবং তেৰাং ছাৰ ৰাংছিনা ভৱনত উপস্থিত হয়। ইতিমধ্যে মূল অসমীয়াৰ পৰা বাংলা, হিন্দী, কাৰবি, বড়ো ভাষালৈ অনুদিত হোৱা ৰংমিলিৰ হাঁহি জনপ্ৰিয় উপন্যাসৰ ইংৰাজী ভাষালৈ অনুদিত হৈছে।
ডঙ্কামোকামৰ ৰাংছিনা কলেজৰ অধ্যাপক কাচ্ছে টেৰণপীয়ে মূল অসমীয়াৰ পৰা ইংৰাজী ভাষালৈ অনুবাদ কৰা Rongmili, The Horizon গ্ৰন্থখনৰ উন্মোচনী অনুষ্ঠানলৈ অংশ গ্ৰহণ কৰিবলৈ অহা তেৰাং ছাৰে গ্ৰন্থ উন্মোচনৰ আগে আগে ৰাংছিনা ভৱনত উপস্থিত হয়।
কাৰবি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ বদান্যতা আৰু অর্থ সাহায্যত ৰাংছিনা ভৱন অৱৰক্ষণ সমিতিৰ কার্যকৰী সভাপতি নীপুচৰণ দত্ত, উপ সভাপতি মাধৱ বৰা আৰু টিংক্রেং ৰংপিৰ নেতৃত্বত ৰাংছিনা ভৱনটোক নতুন ৰূপত সজাই পৰাই আটকধুনীয়া কৰি তোলা হয়। অসম সাহিত্য সভাৰ প্ৰাক্তন সভাপতি পদ্মশ্ৰী ৰংবং তেৰাঙে অসম সাহিত্য সভাৰ ডিফু আঞ্চলিক কাৰ্যালয়ৰ নতুন ৰূপৰ কায়াকল্প দেখি পৰম সন্তোষ প্ৰকাশ কৰি অসম সাহিত্য সভাৰ বুজ লয়।
